ក្រោយចំណាយពេលសួរដេញដោលអស់រយៈពេលជាច្រើនម៉ោង នៅព្រឹកថ្ងៃពុធនេះ ប្រធានក្រុមប្រឹក្សាជំនុំជម្រះសម្រេចមិនឃុំខ្លួនលោក កឹម សុខា បណ្ដោះអាសន្នឡើងវិញទេ ដោយត្រឹមចេញសាលក្រមព្រមានដាក់ក្នុងរបាយការណ៍របស់ក្រឡាបញ្ជី មិនឱ្យធ្វើសកម្មភាពនយោបាយ ដែលតុលាការចាត់ទុកថា មេបក្សប្រឆាំងរូបនេះបានអនុវត្តបំពានកាតព្វកិច្ចត្រួតពិនិត្យតាមផ្លូវតុលាការ។
លោក កូយ សៅ ដែលជាប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ នៅថ្ងៃទី២៩ ខែមិថុនានេះ បានសម្រេចផ្តល់សិទ្ធិសេរីភាពឱ្យលោក កឹម សុខា នៅក្រៅឃុំបណ្តោះអាសន្នដដែល។ ប៉ុន្តែតុលាការបានកម្រិតសកម្មភាពមិនឱ្យលោក កឹម សុខា ធ្វើសកម្មភាពដូចសព្វមួយដង ដែលតុលាការចាត់ទុកថា សកម្មភាពនោះវាជារូបភាពនយោបាយ ហើយថែមទាំងបានចេញសាលក្រមដោយកំណត់ឱ្យក្រឡាបញ្ជីធ្វើរបាយការណ៍អំពីបម្រាមធ្វើនយោបាយ។ បន្ថែមពីលើនេះ លោក កូយ សៅ បញ្ជាក់ថា តុលាការនឹងបន្តត្រួតពិនិត្យពីសកម្មភាពរបស់លោក កឹម សុខា ទៀត ប្រសិនបើរកឃើញថា ជនជាប់ចោទនៅបន្តប្រព្រឹត្តកំហុសនេះ តុលាការនឹងចេញដីកាឱ្យចាប់ខ្លួនតែម្តង។
ផ្តល់បទសម្ភាសន៍ជាមួយក្រុមអ្នកសារព័ត៌មាននៅខាងមុខតុលាការ នៅព្រឹកថ្ងៃពុធនេះ សហមេធាវីការពារសិទ្ធិឱ្យលោក កឹម សុខា គឺលោក ផែង ហេង ឱ្យដឹងថា មេធាវីការពារសិទ្ធិឱ្យជនជាប់ចោទគោរពតាមសេចក្តីសម្រេចរបស់តុលាការ ប៉ុន្តែសហមេធាវីយល់ឃើញថា សកម្មភាពលោក កឹម សុខា ដែលចុះទៅតាមខេត្តនោះ វាគ្រាន់តែជាសកម្មភាពធម្មតាប៉ុណ្ណោះ មិនមែនជាសកម្មភាពនយោបាយឡើយ។
លោកថា៖ «គាត់ [លោក កឹម សុខា] ទៅបុណ្យទាន ទៅចូលរួម[មង្គល]ការ ទៅចូលប្រគេនចង្ហាន់ព្រះសង្ឃ ទៅជួបនៅតំបន់ទេសចរណ៍អី ហើយមានពលរដ្ឋបួនដប់នាក់មកហូបជុំគ្នា មិនជានេះទេ[មិនមែនជាសកម្មភាពនយោបាយទេ]។ អ៊ីចឹងយើងពិបាកកំណត់ ហើយក្នុងច្បាប់ស្តីពីគណបក្សនយោបាយក៏មានកំណត់ថាស្អីជាសកម្មភាពនយោបាយ ស្អីមិនមែនជាសកម្មភាពនយោបាយនោះទេ»។
សម្រាប់សវនាការលើកទី៤៦ នៅថ្ងៃពុធនេះ តុលាការមិនបានបើកការជំនុំជម្រះទៅលើអង្គសេចក្តីអំពីអង្គហេតុ «ប្រទូសរ៉ាយ» បន្តពីសប្តាហ៍មុននោះទេ។ គេសង្កេតឃើញថា សម្រាប់សវនាការលើកនេះហាក់ចាប់ផ្តើមយឺតយ៉ាវជាងសវនាការដែលធ្លាប់មានកន្លងទៅ ដែលតុលាការបានបន្តអូសបន្លាយពេលវេលារហូតដល់ម៉ោងជាង៩ ទើបចាប់ផ្តើមសវនាការ។ ជាធម្មតា សវនាការតែងប្រព្រឹត្តទៅចន្លោះម៉ោង៨ជាងប៉ុណ្ណោះ។
ភ្លាមៗ ប្រធានក្រុមប្រឹក្សាជំនុំជម្រះ លោក កូយ សៅ បានចែកឯកសារឱ្យគ្រប់ភាគីពាក់ព័ន្ធនៅក្នុងសំណុំរឿងអំពីបណ្តឹងនិងសេចក្តីសន្និដ្ឋានរបស់តំណាងអយ្យការ ស្នើសុំឱ្យតុលាការឃុំខ្លួនជនជាប់ចោទបណ្តោះអាសន្នឡើងវិញ ដោយរកឃើញថា លោក កឹម សុខា បានបំពាននឹងបម្រាមតុលាការ។
មិនបង្អង់យូរ ប្រធានក្រុមប្រឹក្សាតម្រូវឱ្យព្រះរាជអាជ្ញារង លោក ប្លង់ សុផល ធ្វើការកំណត់សម្គាល់ទៅលើបណ្តឹងរបស់ខ្លួន។
តាមរយៈបណ្តឹងនេះ លោក ប្លង់ សុផល បង្ហាញថា យោងលើរបាយការណ៍ពីនគរបាលប្រឆាំងភេរវកម្មនៃក្រសួងមហាផ្ទៃ រកឃើញថាលោក កឹម សុខា បានជួបអតីតសហការីរបស់ខ្លួននៅខេត្តកំពត ខេត្តកំពង់ចាម ខេត្តសៀមរាប និងរាជធានីភ្នំពេញ ជាដើម ក្នុងទិសដៅសួរសុខទុក្ខនិងពង្រឹងស្មារតីសម្រាប់សកម្មភាពនយោបាយ។
ចំណែកសហមេធាវីការពារសិទ្ធិឱ្យជនជាប់ចោទវិញ ក៏បានឡើងជំទាស់ម្តងជាពីរដងថា សុំឱ្យតុលាការផ្អាកសវនាការ ដោយសារមិនមានពេលគ្រប់គ្រាន់ ដើម្បីពិនិត្យឯកសារដែលតុលាការបញ្ជូនមក ប៉ុន្តែត្រូវបានប្រធានក្រុមប្រឹក្សាជំនុំជម្រះបដិសេធ និងបន្តឱ្យភាគីពាក់ព័ន្ធក្នុងរឿងក្តីបន្តនីតិវិធីទៅមុខទៀត។
បើទោះជាបែបណា គេសង្កេតឃើញថា តុលាការបានព្រមានចាប់ខ្លួនលោក កឹម សុខា ភ្លាមៗដែរ ប្រសិនបើលោក អាង ឧត្តម ដែលជាសហមេធាវីការពារសិទ្ធិឱ្យជនជាប់ចោទ បន្តដើរចេញពីបន្ទប់សវនាការ និងមិនបន្តនីតិវិធីជំនុំជម្រះ។ ជាបន្តបន្ទាប់មក រហូតដល់ពេលប្រកាសក្រម សហមេធាវីការពារសិទ្ធិឱ្យលោក កឹម សុខា មានលោក ចាន់ ចេន និងលោក អាង ឧត្តម ត្រូវរងការព្រមានជាច្រើនដងពីតុលាការ ដោយសារការធ្វើសេចក្តីសន្និដ្ឋានរបស់ពួកគេ តុលាការយល់ឃើញថា ចាកឆ្ងាយពីនីតិវិធី និងច្រើនដៀមដាមនិងផ្លែផ្កាឱ្យភាគីម្ខាងទៀត។
សម្រាប់មន្រ្តីសមាគមការពារសិទ្ធិមនុស្សអាដហុក ដែលឃ្លាំមើលសវនាការដោយផ្ទាល់ លោក យី សុខសាន្ត យល់ឃើញថា ការជម្រះក្តីព្រឹកមិញនេះ ប្រព្រឹត្តទៅដោយតក់ក្រហល់ ហើយមេធាវីការពារសិទ្ធិឱ្យជនជាប់ចោទមិនមានពេលគ្រប់គ្រាន់ ដើម្បីពិនិត្យមើលសំណុំរឿងជាមុនថែមទៀតផង។ លោកបន្តថា បើទោះជាលោក កឹម សុខា អាចមានសេរីភាពបណ្តោះអាសន្ននៅពេលនេះ ប៉ុន្តែការដែលធ្វើឡើងដោយប្រញប់ប្រញាល់បែបនេះ ឆ្លុះបញ្ចាំងឱ្យឃើញពីការកម្រិតសិទ្ធិជនជាប់ចោទចង្អៀតហួសពីការស្មាន។
លោកបន្តថា៖ «មុនសវនាការលើក ប្រហែលតែ១នាទី ឬពីរនាទី ដូច្នេះពួកគាត់ [មេធាវីការពារសិទ្ធិឱ្យលោក កឹម សុខា] អត់មានឱកាសក្នុងការពិភាក្សា ពួកគាត់អត់មានឱកាសក្នុងការជជែកគ្នាជាមួយកូនក្តីរបស់គាត់ទេ។ អ៊ីចឹងហើយបានពួកគាត់ស្នើសុំឱ្យលើកពេល ដើម្បីទុកពេលឱ្យពួកគាត់បានពិភាក្សាសិន ប៉ុន្តែបើទោះជាមានការស្នើសុំយ៉ាងណាក៏ដោយ ក៏លោកចៅក្រមជំនុំជម្រះមិនអនុញ្ញាតទេ សុខចិត្តព្រមានលើកទី១ លើកទី២» ។
លោក កឹម សុខា ត្រូវបានរងការចោទប្រកាន់ពីបទ «សន្ទិដ្ឋិភាពត្រូវរ៉ូវជាមួយរដ្ឋបរទេស» ចង់ផ្តួលរំលំរដ្ឋាភិបាល និងធ្លាប់ត្រូវបានឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ អស់ជាង១ឆ្នាំ និងក្រោយមកបញ្ជូនទៅឃុំខ្លួននៅផ្ទះរបស់លោកដែលស្ថិតនៅខណ្ឌទួលគោក រាជធានីភ្នំពេញ។ លោកត្រូវបានតុលាការបិទសិទ្ធិធ្វើនយោបាយប្រមាណ៤ឆ្នាំមកហើយ គិតចាប់ពីថ្ងៃចាប់ខ្លួនកាលពីខែកញ្ញា ឆ្នាំ២០១៧។
បើទោះជាលោក កឹម សុខា ត្រូវបានតុលាការដោះលែងឱ្យនៅក្រៅឃុំជាបណ្តោះអាសន្ន ប៉ុន្តែលោកត្រូវបានដាក់ឱ្យស្ថិតនៅក្រោមការត្រួតពិនិត្យរបស់តុលាការ ដោយហាមមិនឱ្យធ្វើសកម្មភាពមួយចំនួន រួមមាន មិនឱ្យធ្វើសកម្មភាពនយោបាយ ត្រូវបង្ហាញខ្លួនរាល់ពេលមានការកោះរបស់តុលាការ និងហាមមិនឱ្យធ្វើដំណើរចេញទៅក្រៅប្រទេស។
គេសង្កេតឃើញថា នៅនាទីចុងក្រោយនៃការសំណូមពរ លោក កឹម សុខា បានស្នើសុំតុលាការដើម្បីបានសិទ្ធិទៅព្យាបាលនៅក្រៅប្រទេស ដូចអ្វីដែលោកបានពិគ្រោះយោបល់ជាមួយលោកនាយករដ្ឋមន្រ្តី ហ៊ុន សែន នៅក្នុងពិធីបុណ្យសពលោក ហ៊ុន ណេង ក្នុងខេត្តកំពង់ចាម។ ប៉ុន្តែសំណើសុំរបស់លោក កឹម សុខា នេះ តុលាការមិនបានលើកមកពិចារណាក្នុងពេលដែលប្រកាសសាលក្រមនោះទេ។
បើទោះបែបណា ក្នុងពេលប្រកាសសាលក្រម តុលាការចាត់ទុកថា សកម្មភាពរបស់លោក កឹម សុខា គឺជាការធ្វើនយោបាយ ប៉ុន្តែដោយសារការទទូចសុំពីមេធាវីទាំងបួនរូប រួមទាំងលោក កឹម សុខា ផង ថាប្រសិនបើតុលាការរកឃើញថាខ្លួនបានប្រព្រឹត្តកំហុស ស្នើសុំឱ្យតុលាការព្រមានបានហើយ។ មួយវិញទៀត ក្នុងនាមជាជនជាប់ចោទ លោក កឹម សុខា បានសន្យាថា លោកក៏នឹងមិនប្រព្រឹត្តឱ្យមានកំហុសណាមួយទៀតទេ៕