អធិការបតីអាល្លឺម៉ង់លោក Olaf Scholz បានឱ្យដឹងនៅក្នុងទីក្រុងម៉ាឌ្រីដ ប្រទេសអេស្ប៉ាញ នៅថ្ងៃពុធនេះថា សម្ព័ន្ធមិត្តទាំងឡាយរបស់អង្គការណាតូ (NATO) ត្រៀមខ្លួនរួចជាស្រេចក្នុងការបន្តផ្គត់ផ្គង់សព្វាវុធគ្រប់ប្រភេទតាមតម្រូវការចាំបាច់ដល់អ៊ុយក្រែន ដើម្បីជួយឱ្យប្រទេសនេះ អាចតទល់នឹងសង្គ្រាមឈ្លានពានរបស់រុស្ស៊ី។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងប្រាប់អ្នកយកព័ត៌មានក្នុងកិច្ចប្រជុំកំពូលថ្ងៃទី២ របស់អង្គការយោធាណាតូ អធិការបតីអាល្លឺម៉ង់រូបនេះលើកឡើងថា៖ «វាគឺជារឿងដ៏ល្អក្នុងការដែលមានប្រទេសជាច្រើន ចូលរួមចំណែក និងផ្ដល់ការគាំទ្រដើម្បីជួយឱ្យអ៊ុយក្រែនអាចការពារខ្លួនបាន តាមរយៈការផ្តល់ជាមធ្យោបាយហិរញ្ញវត្ថុ ជំនួយមនុស្សធម៌ រួមទាំងការផ្តល់អាវុធនានាដែលអ៊ុយក្រែនត្រូវការជាចាំបាច់ផងដែរ»។
លោកបន្ថែមថា៖ «តាមរយៈសារនេះ គឺយើងចង់បញ្ជាក់ឱ្យបានច្បាស់ថា យើងនឹងបន្តធ្វើដូច្នេះ [ជួយគាំទ្រអ៊ុយក្រែន] និងធ្វើឱ្យបានខ្លាំងក្លា ដើម្បីជួយឱ្យអ៊ុយក្រែនអាចការពារខ្លួនពួកគេបាន»។
គួរបញ្ជាក់ថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនមកលើអ៊ុយក្រែនតាមផ្លូវគោក ផ្លូវអាកាស និងសមុទ្រកាលពីថ្ងៃទី២៤ ខែកុម្ភៈ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ក៏បានភៀសខ្លួនចេញពីប្រទេសផងដែរ។
ទោះជាយ៉ាងណា លោក Olaf Scholz ធ្លាប់បានអះអាងកាលពីពេលកន្លងទៅថា រុស្ស៊ីនឹងមិនឈ្នះសង្គ្រាមរបស់ខ្លួននៅអ៊ុយក្រែនឡើយ ហើយលោកប្រធានាធិបតី វ្លាឌីមៀរ ពូទីន ក៏មិនអាចកំណត់លក្ខខណ្ឌនៃកិច្ចព្រមព្រៀងសន្តិភាពណាមួយសម្រាប់អ៊ុយក្រែនផងដែរ៕
