មន្ត្រីជាន់ខ្ពស់អាមេរិកមួយរូបបានឱ្យដឹងនៅថ្ងៃព្រហស្បតិ៍ម្សិលមិញថា គិតរហូតមកដល់ពេលនេះ សហរដ្ឋអាមេរិកនៅមិនទាន់សង្កេតឃើញករណីប្រទេសចិនផ្ដល់ឧបករណ៍យោធាដល់រុស្ស៊ី ឬធ្វើសកម្មភាពណាមួយក្នុងការជួយឱ្យប្រទេសមួយនេះរួចផុតចេញពីផលប៉ះពាល់នៃការដាក់ទណ្ឌកម្មឡើយ។
ជាមួយគ្នានេះ មន្ត្រីអាមេរិករូបនោះក៏បានព្រមានអំពីផលវិបាក រួមទាំងការដាក់ទណ្ឌកម្មដែលចិនអាចនឹងទទួលបានផងដែរ ប្រសិនបើប្រទេសមួយនេះផ្តល់ការគាំទ្រជាសម្ភារដល់សង្គ្រាមឈ្លានពានរបស់រុស្ស៊ី។
ទោះជាយ៉ាងណា ប្រភពដដែលបន្ថែមថា៖ «[គិតរហូតមកដល់ពេលនេះ] ពួកគេនៅមិនទាន់រកឃើញមានករណីផ្ដល់ការគាំទ្រផ្នែកយោធា និងសេដ្ឋកិច្ចណាមួយពីប្រទេសចិនដល់រុស្ស៊ីនៅឡើយទេ»។
ថ្លែងប្រាប់ទីភ្នាក់ងារសារព័ត៌មាន Reuters មន្រ្តីរដ្ឋបាលប្រធានាធិបតីអាមេរិក លោក ចូ បៃឌិន មួយរូបដែលសុំមិនបញ្ចេញឈ្មោះ បានឱ្យដឹងថា៖ «ជារួម ប្រទេសចិនទាំងមូលនៅមិនទាន់ឃើញមានផ្តល់ការគាំទ្រជាសម្ភារ [ដល់រុស្ស៊ី] នោះទេ។»
មន្ត្រីដដែលបន្ថែមថា៖ «យើងមិនទាន់សង្កេតឃើញសាធារណរដ្ឋប្រជាមានិតចិន [PRC] ចូលរួមក្នុងសកម្មភាពណាមួយក្នុងការជួយឱ្យរុស្ស៊ីរួចផុតចេញពីផលប៉ះពាល់នៃការដាក់ទណ្ឌកម្ម ឬផ្តល់ឧបករណ៍យោធាអ្វីឡើយ»។
គួរបញ្ជាក់ថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែនតាមផ្លូវគោក ផ្លូវអាកាស និងសមុទ្រ កាលពីថ្ងៃទី២៤ ខែកុម្ភៈ ដែលបានបង្កឱ្យជនស៊ីវិលរាប់ពាន់នាក់បានស្លាប់ តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ក៏បានភៀសខ្លួនចេញពីប្រទេសផងដែរ។
ទាក់ទិននឹងករណីនេះ ថ្នាក់ដឹកនាំនៃក្រុមប្រទេសមានសេដ្ឋកិច្ចជឿនលឿនទាំង៧ (G7) កាលពីពេលថ្មីៗនេះ ក៏បានជំរុញដល់ប្រទេសចិនឱ្យប្រើប្រាស់ឥទ្ធិពលរបស់ខ្លួនជាមួយរុស្ស៊ី ដើម្បីឱ្យប្រទេសមួយនេះបញ្ឈប់ការឈ្លានពានរបស់ខ្លួនលើអ៊ុយក្រែនផងដែរ។
ទោះជាយ៉ាងណា ប្រទេសចិនបានឆ្លើយតបថា ការដាក់ទណ្ឌកម្មនានាលើរុស្ស៊ី គឺមិនអាចដោះស្រាយវិបត្តិនៅអ៊ុយក្រែនបានឡើយ ខណៈខ្លួនក៏បានរិះគន់សហរដ្ឋអាមេរិក និងសម្ព័ន្ធមិត្តរបស់ខ្លួន ចំពោះការផ្គត់ផ្គង់អាវុធដល់អ៊ុយក្រែន៕
