ក្រសួងពាណិជ្ជកម្ម បានពន្យារពេលផាកពិន័យចំពោះដាក់ពាក្យស្នើសុំលិខិតអនុញ្ញាត ឬអាជ្ញាបណ្ណពាណិជ្ជកម្មតាមប្រព័ន្ធអេឡិចត្រូនិច (អនឡាញ) រហូតដល់ល្ងាចថ្ងៃទី០៣ ខែកក្កដា ឆ្នាំ២០២២។
សេចក្តីជូនដំណឹងរបស់ក្រសួងពាណិជ្ជកម្ម ចុះថ្ងៃទី៣០ ខែមិថុនា ឆ្នាំ២០២២ បានលើកឡើងថា ដោយសារមានសន្ទុះនៃម្ចាស់អាជីវកម្មតាមប្រព័ន្ធអេឡិចត្រូនិចបាននាំគ្នាសម្រុកទៅចុះបញ្ជីនៅក្រសួង ដើម្បីចៀសវាងរងការផាកពិន័យនោះ ក្រសួងសម្រេចប្រកាសពន្យារពេលការផាកពិន័យចំពោះការដាក់ពាក្យស្នើសុំលិខិតអនុញ្ញាត ឬអាជ្ញាបណ្ណពាណិជ្ជកម្មតាមប្រព័ន្ធអេឡិចត្រូនិច រហូតដល់ម៉ោង១៧រសៀល ថ្ងៃទី៣ ខែកក្កដា ឆ្នាំ២០២២។
កាលពីថ្ងៃទី២ ខែមីនា ឆ្នាំ២០២២ ក្រសួងបានចេញសេចក្តីជូនដំណឹងមួយ ស្តីពីការពន្យារពេលការផាកពិន័យចំពោះភាពយឺតយ៉ាវសម្រាប់ការដាក់ពាក្យស្នើសុំអាជ្ញាបណ្ណនេះម្តងរួចមកហើយ ដោយកំណត់កាលបរិច្ឆេទនៃការពន្យារពេលនោះ ត្រឹមថ្ងៃទី១ ខែកក្កដា ឆ្នាំ២០២២។
ក្រសួងពាណិជ្ជកម្ម បានបញ្ជាក់ថា៖ «ចំពោះអាជីវកម្មដែលធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូនិច ដោយមិនមានការអនុញ្ញាតពីក្រសួងពាណិជ្ជកម្ម អាជីវកម្មនោះនឹងត្រូវទទួលការផាកពិន័យជាប្រាក់ និងអាចមានការផ្តន្ទាទោស ដូចមានចែងក្នុងច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិច»៕
