ប្រជាពលរដ្ឋចំនួន៧គ្រួសារ រស់នៅភូមិត្រពាំងកញ្ឆែត ឃុំកំពង់សំរោង ស្រុកទឹកឈូ ខេត្តកំពត បានចោទមន្រ្តីនគរបាលម្នាក់ថាបានរំលោភយកដីស្រែរបស់ពួកគាត់ជិត១ហិកតាដើម្បីសាងសង់ផ្ទះ និងហាមពួកគាត់មិនឱ្យចូលធ្វើស្រែលើដីរបស់ពួកគាត់។
ប្រជាពលរដ្ឋរស់នៅភូមិត្រពាំងកញ្ឆែត លោក ផាត រដ្ឋា បានឱ្យដឹងនៅថ្ងៃសុក្រនេះថា មន្ត្រីនគរបាលម្នាក់ឈ្មោះ ភួង ម៉ារិណ បានចាក់ដីសម្រាប់សាងសង់ផ្ទះនៅលើដីចំណីថ្នល់ និងក្បាលដីស្រែរបស់ពួកគាត់ ដែលមានទំហំជិត១ហិកតា ចាប់តាំងពីឆ្នាំ២០២០មក ហើយបច្ចុប្បន្ន មន្ត្រីរូបនោះថែមទាំងបានរារាំងពួកគាត់មិនឱ្យចូលធ្វើស្រែលើដីរបស់ពួកគាត់ថែមទៀត។
លោកបន្តថា កាលពីថ្ងៃម្សិលមិញ នៅពេលដែលរូបគាត់ទៅមើលដីរបស់គាត់ដែលកំពុងមានវិវាទនេះ ក៏ស្រាប់តែមន្ត្រីរូបនោះបានចោទរូបគាត់ថាទៅបំផ្លាញផលដំណាំរបស់ខ្លួនថែមទៀត។
លោកថា៖ «គេអត់ឱ្យចូល គេថាខ្ញុំហ្នឹងទៅបំផ្លាញផលដំណាំរបស់គេ។ តាមពិត ដីរបស់ខ្ញុំសោះ តែគាត់អត់មានដីទេ ហើយដីដែលចាក់ដីថ្មីៗមិនមែនជារបស់គាត់ទេ តែគាត់រំលោភយកទៀត។ ពេលយូរៗទៅ គាត់យកទាំងអស់ហ្មង»។
ពលរដ្ឋម្នាក់ទៀត អ្នកស្រី ឯម សុភ័ន ដែលមានវិវាទដីធ្លីជាមួយមន្ត្រីនគរបាលនោះដែរ បានឱ្យដឹងថា ដីរបស់ពួកគាត់មានការទទួលស្គាល់ពីអាជ្ញាធរមូលដ្ឋាន ហើយពួកគាត់ក៏បានប្តឹងករណីនេះទៅកាន់អាជ្ញាធរខេត្តឱ្យជួយដោះស្រាយផងដែរ ប៉ុន្តែមកដល់ពេលនេះនៅមិនទាន់មានដំណោះស្រាយនៅឡើយ។
អ្នកស្រីថា៖ «ពេលគេដូរចៅហ្វាយខេត្ត ក៏ឯកឧត្ដម ម៉ៅ ធនិន មក! តែគេថាចាំបន្តិចដោះស្រាយៗ។ នៅតែរាល់ថ្ងៃហ្នឹង ខ្ញុំដាក់ទៅស្រុកបួនដប់ដង នៅតែអត់សម្រេច […] អ៊ីចឹងខ្ញុំចង់ថា នៅលើលោកនេះអត់មានយុត្តិធម៌អីទេ»។
វីអូឌី មិនអាចសុំការអត្ថាធិប្បាយជុំវិញករណីនេះពីមេឃុំកំពង់សំរោង លោក ជាវ នាង និងមន្ត្រីនគរបាល លោក ភួង ម៉ារិណ ដែលរងការចោទនោះបានទេ នៅថ្ងៃនេះ។
ចំណែក មេប៉ុស្ដិ៍ឃុំកំពង់សំរោង លោក ចាប់ ឌុល បានលើកឡើងថា លោក ភួង ម៉ារិណ បានមករស់នៅលើដីចំណីផ្លូវអស់រយៈពេល២ឆ្នាំមកហើយ ខណៈដែលអាជ្ញាធរភូមិឃុំអនុញ្ញាតឱ្យលោករស់នៅ ដោយសារតែគាត់មិនមានដីធ្វើផ្ទះ។
លោកថា៖ «នគរបាលហ្នឹងមករស់នៅ២ឆ្នាំហើយ យើងមិនអនុញ្ញាតឱ្យនៅទេ តែបើគាត់ជាមន្រ្តីប៉ូលិសដែរ អ៊ីចឹងខាងភូមិខាងអីចេះតែយោគយល់ គាត់អត់មានដីនៅដែរ»។
មន្រ្តីសម្របសម្រួលផ្នែកសិទ្ធិមនុស្សនៃអង្គការលីកាដូប្រចាំខេត្តកំពត លោក ប៉ែន វុទ្ធា បានលើកឡើងថា ក្នុងនាមជាមន្រ្តីរាជការដែលរស់នៅលើដីចំណីផ្លូវ និងហាមឃាត់មិនឱ្យប្រជាពលរដ្ឋទៅរស់នៅឬអាស្រ័យផលដីរបស់ពួកគេ គឺជារឿងដែលមិនសមស្របនោះទេ ហើយអាជ្ញាធរមូលដ្ឋានគួរតែដោះស្រាយឱ្យបានឆាប់រហ័សលើករណីនេះ ដើម្បីឱ្យប្រជាពលរដ្ឋអាចចូលទៅអាស្រ័យផលលើដីរបស់ខ្លួនដូចដើមវិញ៕
