ក្រុមកូដករណាហ្គាវើលដ៍អះអាងថា ពួកគេនឹងធ្វើកូដកម្មដោយអហិង្សាជាថ្មីទៀត ទោះដឹងថាត្រូវប្រឈមជាមួយសមត្ថកិច្ចក្តី ដើម្បីទាមទារឱ្យរដ្ឋាភិបាល និងស្ថាប័នពាក់ព័ន្ធជំរុញទៅថៅកែក្រុមហ៊ុនល្បែងមួយនេះឱ្យពន្លឿនការដោះស្រាយបញ្ចប់វិវាទការងារតាមផ្លូវច្បាប់។
កូដករណាហ្គាវើលដ៍ កញ្ញា អៀន គន្ធា មានប្រសាសន៍នៅថ្ងៃអាទិត្យនេះថា រយៈពេលជិតកន្លះខែកន្លងមកនេះ ដែលពួកគាត់បានយកញត្តិដាក់ទៅខុទ្ទកាល័យលោកនាយករដ្ឋមន្ត្រី ហ៊ុន សែន និងរដ្ឋសភា ឱ្យជួយអន្តរាគមន៍ដោះស្រាយវិវាទការងារជាមួយថៅកែកាស៊ីណូណាហ្គាតាមផ្លូវច្បាប់ ប៉ុន្តែរហូតមកដល់ថ្ងៃនេះ មិនទាន់មានការឆ្លើយតបជាវិជ្ជមានណាមួយនៅឡើយ។
ករណីនេះ កញ្ញាបញ្ជាក់ថា ពួកគាត់នៅបន្តចេញធ្វើកូដកម្មបែបអហិង្សាជាថ្មីទៀតនៅដើមសប្តាហ៍ក្រោយនេះ ដើម្បីទាមទារឱ្យរដ្ឋាភិបាល និងស្ថាប័នពាក់ព័ន្ធជំរុញទៅថៅកែក្រុមហ៊ុនឱ្យពន្លឿនដោះស្រាយបញ្ចប់វិវាទការងារជូនកម្មករឱ្យបានឆាប់។
កញ្ញានិយាយថា៖ «ខាងរដ្ឋាភិបាល និងរដ្ឋសភាមិនទាន់ឆ្លើយតបញត្តិពួកយើងទេបង។ បើគេអត់ឆ្លើយតប ពួកខ្ញុំនៅតែបន្តធ្វើកូដកម្មនៅដើមសប្តាហ៍ក្រោយទៀត…និយាយរួមលែងខ្លាចរងហិង្សាជាមួយសមត្ថកិច្ចហើយ វាស៊ាំហើយ។ គេវាយទាត់ធាក់រាល់ថ្ងៃហើយ បើយើងអត់ធ្វើទេ គេអត់អើពើទេ បើយើងធ្វើសកម្មភាពទៅបានមហាជនគេឃើញខ្លះ»។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ និយាយថា រយៈពេលជាង៦ខែមកហើយ ដែលកូដករណាហ្គាវើលដ៍បានធ្វើកូដកម្មតវ៉ាទាមទាររកដំណោះស្រាយ ក្រោយថៅកែបានបញ្ឈប់ពួកគេទាំងអយុត្តិធម៌ និងមិនអនុលោមតាមច្បាប់។ កញ្ញាបន្ថែមថា ការជួបចរចាចំនួន ១២លើករវាងតំណាងកូដករ តំណាងសហជីព និងតំណាងក្រុមហ៊ុន ក្រោមការសម្របសម្រួលរបស់ក្រសួងការងារ ក៏នៅតែពុំទាន់មានលទ្ធផលជាវិជ្ជមាននៅឡើយ។ ករណីនេះកញ្ញាថា ពួកគេនៅតែទទូចសុំឱ្យរដ្ឋាភិបាល និងរដ្ឋសភា ជួយពន្លឿនការដោះស្រាយវិវាទការងារមួយនេះឱ្យបានឆាប់។
កញ្ញាបន្ថែមថា បើរដ្ឋាភិបាល មិនជួយជំរុញទៅថៅកែក្រុមហ៊ុនពន្លឿនដោះស្រាយបញ្ចប់វិវាទការងារជូនកម្មករឱ្យបានឆាប់ទេ នោះពួកគេនៅតែបន្តធ្វើកូដកម្មរហូតមានដំណោះស្រាយ។
កញ្ញាបញ្ជាក់ដូច្នេះថា៖ «បើតាមព័ត៌មានដែលនាងខ្ញុំទទួលបានពីក្រុមកម្មករដែលពួកគាត់បានប្រជុំពិភាក្សាគ្នា គឺពួកគាត់នឹងធ្វើការតស៊ូមតិមិនថាមធ្យោបាយណាទេ រហូតមានដំណោះស្រាយ»។
មន្ត្រីខុទ្ទកាល័យនាយករដ្ឋមន្ត្រី ហ៊ុន សែន លោក គង់ ចំរើន មានប្រសាសន៍ថា ចំពោះញត្តិដែលក្រុមកូដកម្មដាក់មកខុទ្ទកាល័យនាយករដ្ឋមន្ត្រីកន្លងមកនេះ គាត់បានបញ្ជូនទៅថ្នាក់លើហើយប៉ុន្តែលោកថា រាល់ការសម្រេចយ៉ាងណានោះ អាស្រ័យលើថ្នាក់ដឹកនាំ។
លោកមានប្រសាសន៍ថា៖ «យើងបានទទួលពាក្យគាត់ហើយ។ លើកក្រោយនេះយើងបានទទួលលិខិតបន្ថែមរបស់ពួកគាត់ទៀត ហើយខ្ញុំបានរាយការណ៍ជូនទៅថ្នាក់លើអស់ហើយ។ បើថ្នាក់ដឹកនាំសម្រេចថាម៉េច យើងនឹងរាយការណ៍ជូនទៅពួកគាត់វិញ»។
យ៉ាងណាក៏ដោយលោក គង់ ចំរើន ទទូចទៅក្រុមកូដករទាំងអស់មានការអត់ធ្មត់ និងគោរពតាមសេចក្តីសម្រេចរបស់តុលាការ ដោយកុំបន្តធ្វើកូដកម្មខុសច្បាប់បន្តទៀត។
មន្ត្រីស៊ើបអង្កេតជាន់ខ្ពស់នៅសមាគមការពារសិទ្ធិមនុស្សអាដហុក លោក ស៊ឹង សែនករុណា មានប្រសាសន៍ថា ជម្លោះរវាងក្រុមកូដករ និងក្រុមហ៊ុនណាហ្គាវើលដ៍ បានអូសបន្លាយជាច្រើនខែមកហើយ។ ករណីនេះ លោកថា បើរដ្ឋាភិបាលនិងស្ថាប័នពាក់ព័ន្ធមិនជំរុញ ឬអន្តរាគមន៍ទៅក្រុមហ៊ុនពន្លឿនដោះស្រាយជូនក្រុមកូដករទេ នឹងបង្កផលប៉ះពាល់កាន់តែខ្លាំងដល់ជីវភាពរបស់កូដករ និងមុខមាត់រដ្ឋាភិបាលជាដើម។
លោកមានប្រសាសន៍ថា៖ «ថ្នាក់ដឹកនាំមិនគួរព្រងើយកន្តើយទុកបញ្ហាបណ្តែតបណ្តោយឱ្យមានអូសបន្លាយពេលយូរបែបហ្នឹងដែរ។ យើងយកគោលការណ៍ច្បាប់ គោរពសិទ្ធិដល់កម្មករ និងក្រុមកូដករ ដើម្បីបញ្ចប់វិវាទហ្នឹងទៅ វានឹងបញ្ចប់ហើយ។ ប៉ុន្តែបើសិនជានៅតែបណ្តែតបណ្តោយបែបនេះ យើងមានការព្រួយបារម្ភមានបញ្ហាផ្សេងៗ ដូចជា មានហិង្សាផ្សេងៗកើតមានឡើងលើកម្មករជាមួយក្រុមសមត្ថកិច្ចទប់ស្កាត់ខាងកូដករបន្តទៀត»។
បើតាមក្រុមកូដករ ញត្តិដែលពួកគេបានដាក់កាលពីថ្ងៃទី២០ ខែមិថុនា មានខ្លឹមសារស្នើលោកនាយករដ្ឋមន្ត្រី ហ៊ុន សែន និងរដ្ឋសភា ជួយអន្តរាគមន៍ដោះស្រាយវិវាទការងារចំនួន៣ចំណុច ក្នុងនោះ ស្នើឱ្យជួយជំរុញទៅក្រុមហ៊ុនទទួលយកកូដករដែលនៅសេសសល់ប្រមាណ២០០នាក់ចូលធ្វើការវិញ និងទូទាត់សំណងឱ្យបានត្រឹមត្រូវតាមផ្លូវច្បាប់ ព្រមទាំងស្នើសុំឱ្យមានការទម្លាក់បទចោទទៅលើថ្នាក់ដឹកនាំ និងសមាជិកសហជីពទាំង ១៥នាក់វិញ។
វិវាទការងារក្រុមហ៊ុនណាហ្គាវើលដ៍នេះបានកើតឡើងអស់រយៈពេលជាង១ឆ្នាំមកហើយ ក្រោយពេលដែលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។ ប៉ុន្តែសម្រាប់កូដករ និងសហជីពដែលធ្វើការងារលើវិស័យនេះមើលឃើញថា ការបញ្ឈប់បុគ្គលិកជាទ្រង់ទ្រាយធំនោះ គឺក្រុមហ៊ុនណាហ្គាវើលដ៍មានចេតនាលុបបំបាត់សហជីពដែលហ៊ានការពារសិទ្ធិកម្មករក្នុងក្រុមហ៊ុនច្រើនជាងបញ្ហាហិរញ្ញវត្ថុ៕
