អាជ្ញាធរប្រយុទ្ធប្រឆាំងគ្រឿងញៀន បាននិងកំពុងបន្តកិច្ចសហការជាមួយប៉ូលិសអាំងទែប៉ូល ដើម្បីស្វែងរកចាប់ខ្លួនមេខ្លោងដែលជាឧក្រិដ្ឋជនគ្រឿងញៀននាំចូលសារធាតុគីមីផ្សំជាង៣០០តោនមកកម្ពុជា ដើម្បីកែច្នៃនិងផលិតជាគ្រឿងញៀនដោយខុសច្បាប់កាលពីឆ្នាំ២០២១។
អគ្គស្នងការរងនគរបាលជាតិទទួលផែនប្រឆាំងគ្រឿងញៀន លោក ម៉ក់ ជីតូ មានប្រសាសន៍នៅថ្ងៃចន្ទនេះថា កាលពីចុងឆ្នាំ២០២១ ដល់ខែមីនា ឆ្នាំ២០២២ សមត្ថកិច្ចចាប់បានសារធាតុគីមីជាង៣០០តោនសម្រាប់យកមកផ្សំធ្វើជាគ្រឿងញៀន។ ប៉ុន្តែលោកថា ក្រោយពីសមត្ថកិច្ចរឹបអូសបានសារធាតុគីមីជាង៣០០តោននោះ រហូតមកដល់ថ្ងៃទី៧ ខែកក្កដានេះ សមត្ថកិច្ចនៅតែមិនទាន់ចាប់មេខ្លោងយកមកអនុវត្តទោសតាមច្បាប់នៅឡើយ។
ទោះជាបែបនេះក្ដី លោក ម៉ក់ ជីតូ បញ្ជាក់ថា បច្ចុប្បន្ននេះ កម្ពុជាបានសហការជាមួយសមាជិកប៉ូលិសអាំងទែប៉ូលដែលមាននៅតាមបណ្ដាប្រទេសជាង១០០ ដើម្បីស្វែងរកចាប់ខ្លួនមេខ្លោងដែលជាឧក្រិដ្ឋជនគ្រឿងញៀននោះផងដែរ។
លោកមានប្រសាសន៍ថា៖ «យើងដាក់ឱ្យខាងប៉ូលិសអាំងទែប៉ូលជាង១០០ប្រទេស យើងដាក់ជិត១ឆ្នាំ ឱ្យជួយតាមចាប់ហើយ ហើយមេខ្លោងគ្រឿងញៀននោះភាគច្រើនជាជនជាតិចិនតៃវ៉ាន់ តែឥលូវអត់ទាន់មានចម្លើយអ្វីទេ»។
កាលពីថ្ងៃទី២៦ ខែមិថុនា ឆ្នាំ២០២២ ក្នុងទិវាអន្តរជាតិប្រយុទ្ធប្រឆាំងគ្រឿងញៀន រដ្ឋមន្ត្រីក្រសួងមហាផ្ទៃ លោក ស ខេង បង្ហាញការព្រួយបារម្ភខ្លាចអន្តរជាតិដាក់ធនាគារជាតិនៃកម្ពុជាក្នុងបញ្ជីខ្មៅ ជាហេតុធ្វើឱ្យប្រឈមហានិភ័យធំធេងផ្នែកសេដ្ឋកិច្ចនិងនយោបាយ ប្រសិនបើសមត្ថកិច្ចមិនស្រាវជ្រាវឱ្យដល់ឫសគល់ក្នុងការបង្រ្កាបបទល្មើសគ្រឿងញៀននោះទេ។
ក្នុងពិធីនោះ ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង ថ្លែងថា បញ្ហាគ្រឿងញៀននេះជាបញ្ហាមួយដែលផ្សារភ្ជាប់នឹងការអនុវត្តគោលការណ៍របស់អង្គការសហប្រជាជាតិ ទាក់ទងការប្រយុទ្ធប្រឆាំងអំពើភេរវកម្ម និងសម្អាតប្រាក់ ទប់ស្កាត់កុំឱ្យមានការរីកសាយអាវុធប្រល័យផងដែរ ស្របពេលដែលកម្ពុជាក៏ជាប្រទេសហត្ថលេខីក្នុងការប្រយុទ្ធប្រឆាំងអំពើទាំងនេះ។
លោកថា បទល្មើសគ្រឿងញៀនជាបទល្មើសមួយដែលក្រុមឧក្រិដ្ឋជនស្រូបយកប្រាក់កម្រៃនិងធនធានជាច្រើន ដើម្បីយកទៅបម្រើលើកិច្ចការផ្សេងៗទៀត ក្នុងនោះអាចយកទៅពង្រីកអាវុធមហាប្រល័យ ខណៈបច្ចុប្បន្នកម្ពុជាត្រូវបានអន្តរជាតិដាក់ក្នុងបញ្ជីប្រផេះ ពាក់ព័ន្ធរឿងហិរញ្ញវត្ថុនៅធនាគារ។
លោក ស ខេង បញ្ជាក់ថា រឿងហិរញ្ញវត្ថុនេះជាដើមចមដែលធ្វើឱ្យអន្តរជាតិដាក់កម្ពុជាក្នុងបញ្ជីប្រផេះរហូតដល់បច្ចុប្បន្ន។ លោកបន្តថា ប្រសិនបើកម្ពុជាមិនអាចដោះស្រាយបញ្ហានៃការលាងលុយកខ្វក់បានទេ អន្តរជាតិនឹងដាក់ធនាគារជាតិនៃកម្ពុជាក្នុងបញ្ជីខ្មៅ ដែលធ្វើឱ្យប្រទេសកំពុងអភិវឌ្ឍន៍មួយនេះប្រឈមហានិភ័យធំ សម្រាប់ផ្នែកសេដ្ឋកិច្ចនិងនយោបាយជាក់ជាមិនខាន។
ករណីនេះ លោកស្នើទៅសមត្ថកិច្ចស្រាវជ្រាវឱ្យដល់ឫសគល់នៃម្ចាស់ក្រុមហ៊ុន ដែលសមត្ថកិច្ចបានបង្រ្កាប និងរឹបអូសគ្រឿងញៀនបាន។
លេខាធិការដ្ឋានបោសសម្អាតលុយកខ្វក់អន្តរជាតិ (Financial Action Task Force-FATF) កន្លងមក បានដាក់ប្រទេសកម្ពុជា និងប្រទេស៩ទៀត ចូលក្នុងបញ្ជីប្រផេះរបស់ខ្លួន សម្រាប់តាមដានការលាងលុយកខ្វក់ពីលំហូរហិរញ្ញវត្ថុ វិនិយោគ និងពាណិជ្ជកម្ម ចេញនិងចូលក្នុងប្រទេសនេះ ខណៈបច្ចុប្បន្ន ប្រទេសចំនួន២ត្រូវបានដាក់ចូលក្នុងបញ្ជីខ្មៅ រួមមាន ប្រទេសអ៊ីរ៉ង់ និងកូរ៉េខាងជើង៕