គណៈកម្មការព្រៃសហគមន៍សង្ឃរុក្ខាវ័ន នឹងរៀបចំពិធីបុណ្យរុក្ខទិវា ក្រោមប្រធានបទ «រួមគ្នាដាំកូនឈើ ដើម្បីជីវិតនិងភពផែនដី» នៅថ្ងៃទី១៧ ខែកក្កដា ឆ្នាំ២០២២នេះ នៅក្នុងដែនជម្រកសត្វព្រៃមួយនេះ ដើម្បីជាសារដាស់ស្មារតីឱ្យពលរដ្ឋកាន់តែច្រើននាំគ្នាចូលរួមថែរក្សាព្រៃឈើ។
បើតាមសេចក្ដីជូនដំណឹងរបស់សហគមន៍នេះបានឱ្យដឹងថា នៅក្នុងកម្មពិធីបុណ្យរុក្ខទិវានេះមានការដង្ហែកូនឈើពីទីរួមខេត្តឧត្ដរមានជ័យ ទៅកាន់ដែនជម្រកសត្វព្រៃសង្ឃរុក្ខាវ័ន និងការដាំកូនឈើសាមគ្គី ចំនួន៦ ០០០ដើម លើផ្ទៃដីទំហំ៥ហិកតា ស្ថិតនៅភូមិឈូកមាស សង្កាត់កូនក្រៀល ក្រុងសំរោង ខេត្តឧត្ដរមានជ័យ។
ប្រភពដដែលបន្ថែមថា ក្នុងពិធីបុណ្យរុក្ខទិវានេះមានការចែករំលែកពីការយល់ដឹងពីជំនឿ បទពិសោធន៍ ចំណេះដឹង កិច្ចការពារ អភិរក្ស បរិស្ថាន ធនធានធម្មជាតិរបស់សាសនាផ្សេងៗ ដែលនឹងមានការចូលរួមពីព្រះពុទ្ធសាសនា ឥស្លាមសាសនា គ្រិស្តសាសនា និងជំនឿជនជាតិដើមភាគតិច ព្រមទាំងការចុះល្បាតព្រៃ និងការថតរូបភាពបង្ហាញពីធនធានធម្មជាតិនិងសត្វព្រៃ។
ប្រធានព្រៃសហគមន៍សង្ឃរុក្ខាវ័ន ព្រះតេជព្រះគុណ ថូ ធូរស់ មានថេរដីកាប្រាប់វីអូឌីនៅថ្ងៃចន្ទនេះថា ការដាំកូនឈើចំនួន៦ ០០០ដើមថ្ងៃខាងមុខនេះ នឹងមានអ្នកចូលរួមជាង១ពាន់នាក់និងអង្គ ដោយមានគ្រប់សាសនាទាំងអស់ចូលរួម ព្រមទាំងអង្គការដៃគូជាច្រើនទៀត។ ព្រះអង្គបានឱ្យដឹងថា កូនឈើទាំងនេះបានមកពីសប្បុរសជន ការអំពាវនាវរបស់ព្រះអង្គ និងបានពីការស្នើសុំទៅអាជ្ញាធរអប្សរាខេត្តសៀមរាបមួយចំនួនផងដែរ។
ព្រះតេជព្រះគុណ ថូ ធូរស់ បានលើកឡើងថា ការដាំកូនឈើនេះ គឺដើម្បីស្ដារព្រៃឈើដែលបានបាត់បង់នាពេលកន្លងទៅ និងជាសារក្រើនរម្លឹកដល់ពលរដ្ឋខ្មែរចូលរួមថែរក្សាព្រៃឈើ ព្រមទាំងជាការបណ្ដុះស្មារតីស្រឡាញ់ព្រៃឈើផងដែរ។
ព្រះអង្គមានថេរដីកាថា៖ «ការដាំកូនឈើនេះ ក្នុងគោលបំណងទី១ ក្នុងការស្ដារព្រៃឈើមានភាពរេចរឹល ជាពិសេសគឺមានការបាត់បង់ពីមួយថ្ងៃទៅមួយថ្ងៃ។ ជាសារមួយសម្រាប់ផ្សព្វផ្សាយឱ្យកុលបុត្រខ្មែរយើងថែរក្សានិងអភិរក្សព្រៃឈើ។ ហើយទី៣ គឺជាការបណ្ដុះនូវស្មារតីរបស់យុវជនជំនាន់ក្រោយឱ្យចេះស្រឡាញ់ធនធានធម្មជាតិ ដាំដើមឈើឡើងវិញ»។
ប្រធានព្រៃសហគមន៍សង្ឃរុក្ខាវ័នអង្គនេះ ក៏បានអំពាវនាវឱ្យមានការចូលរួមពីពលរដ្ឋគ្រប់ទិសទីទាំងអស់ក្នុងយុទ្ធនាការដាំកូនឈើ ក្រោមប្រធានបទ «យើងរួមគ្នាដាំដើមឈើ ដើម្បីជីវិតនិងភពផែនដី» នេះ ដើម្បីរួមចំណែកក្នុងការថែរក្សាព្រៃឈើទាំងអស់គ្នា។
ព្រះអង្គបន្ដថា៖ «ការធ្វើកិច្ចការងារមួយនេះមិនសំដៅលើសាសនាមួយណាទេ ជាកាតព្វកិច្ចនិងតួនាទីរបស់ប្រជាពលរដ្ឋ ក៏ដូចជាមនុស្សក្នុងពិភពលោក ដែលយើងចូលរួមគ្នាយ៉ាងស្អិតល្មួតក្នុងការថែទាំនិងការថែរក្សាអភិរក្សព្រៃឈើ»។
ព្រៃសហគមន៍សង្ឃរុក្ខាវ័ន មានទំហំសរុប៣០ ២៥៦ហិកតា លាតសន្ធឹងក្នុងស្រុកចំនួន៣ រួមមាន ក្រុងសំរោង ស្រុកចុងកាល់ និងស្រុកអន្លង់វែង ខេត្តឧត្ដរមានជ័យ។ កាលពីឆ្នាំ២០១៨ រាជរដ្ឋាភិបាលបានសម្រេចរក្សាដីព្រៃជាង៣ម៉ឺនហិកតានេះទុកជាដែនជម្រកសត្វព្រៃ ឬជាតំបន់ព្រៃការពារ ដែលមានឈ្មោះថា «សង្ឃរុក្ខាវ័នដែនជម្រកសត្វព្រៃ»៕
