កូដករនិងតំណាងសហជីពប្រមាណ១០០នាក់ នៅថ្ងៃអង្គារនេះ បានព្យាយាមទៅប្រមូលផ្ដុំធ្វើកូដកម្មជាថ្មីទៀត នៅមុខក្រុមហ៊ុនកាស៊ីណូណាហ្គាវើលដ៍ ក្នុងខណ្ឌចំការមន រាជធានីភ្នំពេញ ដើម្បីទាមទារឱ្យមានដំណោះស្រាយវិវាទការងារ ប៉ុន្តែត្រូវបានសមត្ថកិច្ចជាច្រើននាក់ដាក់របាំងបិទកំណាត់ផ្លូវសុធារស ក្បែរសួននាគបាញ់ទឹក មិនឱ្យពួកគាត់ដើរទៅមុខក្រុមហ៊ុនឡើយ។
ក្រុមកូដករណាហ្គាវើលដ៍ បានចេញដំណើរពីផ្សារទំនើបអ៊ីអន១ ដោយចងក្រណាត់ខៀវនៅលើក្បាល និងក្នុងដៃមានកាន់បដា ហើយដើរឆ្ពោះទៅកាន់នាគបាញ់ទឹក ក្បែរទីតាំងក្រុមហ៊ុនល្បែងមួយនេះ ប៉ុន្តែត្រូវបានសមត្ថកិច្ចរារាំង។
ក្នុងពេលធ្វើកូដកម្មនៅថ្ងៃនេះ ក្រុមកូដករណាហ្គាបានស្រែកទាមទាររកដំណោះស្រាយ និងផ្តល់ភាពយុត្តិធម៌ដល់ពួកគេ ដែលត្រូវបានក្រុមហ៊ុនបញ្ឈប់ពីការងារទាំងអយុត្តិធម៌ និងទាមទារឱ្យទម្លាក់ចោលបទចោទប្រកាន់ទៅលើថ្នាក់ដឹកនាំនិងសមាជិកសហជីពនៅក្នុងក្រុមហ៊ុននេះផងដែរ។
អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ មានប្រសាសន៍ថា វិវាទការងាររបស់កូដករណាហ្គាវើលដ៍ បានអូសបន្លាយប្រមាណ១ឆ្នាំមកហើយ នៅតែមិនទាន់មានដំណោះស្រាយរហូតមកដល់ពេលនេះ។ ករណីនេះ លោកថា អង្គការ-សមាគម សហព័ន្ធសហជីព សហជីព និងសមាគម ចំនួន៣៧ស្ថាប័ន ដែលធ្វើការផ្នែកលើកកម្ពស់សិទ្ធិមនុស្សនិងសិទ្ធិការងារ បន្តអំពាវនាវដល់រាជរដ្ឋាភិបាលពន្លឿនការដោះស្រាយដល់កូដករឱ្យឆាប់ ដើម្បីបញ្ចប់វិវាទដ៏រ៉ាំរ៉ៃនេះ។
លោកថា៖ «យើងអត់ចង់ឃើញឱ្យមានការពន្យារពេល[ដោះស្រាយ]ទៀតទេ យើងចង់ឱ្យមានដំណោះស្រាយ […] យើងចង់ឃើញការទាមទារដោយសន្តិវិធីក្នុងការរកយុត្តិធម៌របស់ពួកគាត់ ត្រូវបានយកចិត្តទុកដាក់ដោះស្រាយដោយអាជ្ញាធររដ្ឋ»។
លោក ឃុន ថារ៉ូ ក៏បានអំពាវនាវដល់សមត្ថកិច្ចបញ្ឈប់ការប្រើប្រាស់អំពើហិង្សាទៅលើកូដករជាស្ត្រីដែលប្រើប្រាស់សិទ្ធិរបស់ពួកគាត់ក្នុងការតវ៉ាទាមទាររកយុត្តិធម៌នេះផងដែរ។
ប្រធានសហព័ន្ធសហជីពកម្ពុជា លោកស្រី យ៉ាង សុភ័ណ្ឌ បានព្រមានថា បើសិនជាមិនមានដំណោះស្រាយក្នុងរយៈពេល២ទៅ៣សប្តាហ៍ខាងមុននេះទេ នោះសមាជិកសហព័ន្ធសហជីព អង្គការ-សមាគម និងសហជីពនៅតាមមូលដ្ឋាន នឹងសម្រេចចូលរួមជាមួយកូដករ ដើម្បីតវ៉ាទ្រង់ទ្រាយធំ ដើម្បីទាមទារឱ្យមានដំណោះស្រាយ។
លោកស្រីថា៖ «បើសិនអាជ្ញាធរមិនដោះស្រាយ មិនជំរុញទៅក្រុមហ៊ុនឱ្យធ្វើការដោះស្រាយទេ វាមិនចំណេញដល់ពួកគាត់ទេ វារឹតតែបង្កនូវភាពមិនទុកចិត្តពីមហាជន ពីកូដករ ពីយើងខ្ញុំជាសហជីព ព្រោះយើងដឹងហើយថា ការបោះឆ្នោតជាតិនឹងមកដល់នៅឆ្នាំ២០២៣ខាងមុខ»។
គួរបញ្ជាក់ថា វិវាទការងារក្រុមហ៊ុន ណាហ្គាវើលដ៍ នេះបានកើតឡើងអស់រយៈពេលជាង១ឆ្នាំមកហើយ ក្រោយពេលដែលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ កញ្ញា ឈឹម ស៊ីថរ បានប្រាប់វីអូឌីក្នុងពេលថ្មីៗនេះថា ការជួបចរចាជាង១០ដង រវាងតំណាងកូដករ តំណាងសហជីព និងតំណាងក្រុមហ៊ុន ក្រោមការសម្របសម្រួលរបស់ក្រសួងការងារ ក្រោយកូដករចេញធ្វើកូដកម្មរយៈពេលជាង៦ខែមកនេះ គឺពុំមានលទ្ធផលជាផ្លែផ្កានៅឡើយ ទើបពួកគេសម្រេចចិត្តរកការអន្តរាគមន៍ពីស្ថាប័នពាក់ព័ន្ធនានា រួមទាំងលោកនាយករដ្ឋមន្ត្រី ហ៊ុន សែន និងបន្តធ្វើកូដកម្មតវ៉ាដើម្បីទាមទារកដំណោះស្រាយ៕