ក្រសួងសុខាភិបាលបានប្រកាសពីការរកឃើញអ្នកឆ្លងជំងឺកូវីដ-១៩ ចំនួន៧ករណីបន្ថែមទៀត កាលពីថ្ងៃម្សិលមិញ ខណៈមិនមានអ្នកជាសះស្បើយ និងអ្នកស្លាប់នោះទេ។
សេចក្តីជូនដំណឹងរបស់ក្រសួងសុខាភិបាល ចុះថ្ងៃទី០៦ ខែកក្កដា ឆ្នាំ២០២២ ឱ្យដឹងថា ករណីឆ្លងជំងឺកូវីដ-១៩ថ្មីដែលបានរកឃើញទាំង៧នាក់នោះ ជាការឆ្លងវីរុសប្រភេទអូមីក្រុង ហើយក្នុងនោះមាន៤នាក់ជាអ្នកដែលស្នើសុំវិញ្ញាបនបត្រទៅក្រៅប្រទេស។
ពាក់ព័ន្ធនឹងបញ្ហាកូវីដ-១៩នៅកម្ពុជានេះដែរ លោកនាយករដ្ឋមន្ត្រី ហ៊ុន សែន បានថ្លែងក្នុងកម្មវិធីជួបសំណេះសំណាលជាមួយគណៈប្រតិភូកីឡាអាស៊ានប៉ារ៉ាហ្គេម (ASEAN Para Games) នៅថ្ងៃពុធនេះថា ពេលនេះ ជំងឺកូវីដ-១៩បានចាប់ផ្តើមផ្ទុះឡើងវិញហើយ ហើយរលកនៃការឆ្លងជំងឺនេះឡើងវិញ គឺត្រូវទាមទារឱ្យប្រជាពលរដ្ឋទាំងអស់បង្កើនការយកចិត្តទុកដាក់ការពារខ្លួនឡើងវិញ កុំឱ្យមានការផ្ទុះរាលដាលខ្លាំង។
តែទោះជាយ៉ាងណា លោកបញ្ជាក់ថា រហូតមកដល់ពេលនេះ កម្ពុជាមិនមានភាពចាំបាច់ណាមួយត្រូវបិទក្រុង បិទសាលារៀន បិទរោងចក្រ ដូចកាលពីមុនទៀតនោះទេ ព្រោះកម្ពុជាមានវ៉ាក់សាំងជាបង្អែកដ៏រឹងមាំ។
បើតាមក្រសួងសុខាភិបាល គិតត្រឹមព្រឹកថ្ងៃពុធនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន១៣៦ ៣០៨នាក់ ក្នុងនោះជាសះស្បើយ ១៣៣ ២០៦នាក់ និងស្លាប់ចំនួន៣ ០៥៦នាក់៕
