លោកនាយករដ្ឋមន្ត្រី ហ៊ុន សែន សម្រេចអនុញ្ញាតឱ្យម្ចាស់រថយន្តចង្កូតស្ដាំ អាចបង់ពន្ធបាន ដោយមិនចាំបាច់ដូរចង្កូត ប៉ុន្តែការអនុញ្ញាតនេះសម្រាប់តែរថយន្តចង្កូតស្ដាំដែលធ្វើចរាចរនៅកម្ពុជាប៉ុណ្ណោះ ហើយសម្រាប់ការនាំចូលរថយន្តចង្កូតស្ដាំបន្ថែម គឺហាមដាច់ខាត។
ក្នុងកម្មវិធីជួបសំណេះសំណាលជាមួយគណៈប្រតិភូកីឡាអាស៊ានប៉ារ៉ាហ្គេម (ASEAN Para Games) នៅថ្ងៃពុធនេះ លោកនាយករដ្ឋមន្ត្រី ហ៊ុន សែន បានថ្លែងថា កាលពីថ្ងៃម្សិលមិញ មានម្ចាស់រថយន្តចង្កូតស្តាំមួយចំនួនបាននាំគ្នាតវ៉ានៅកំណាត់ផ្លូវជាតិលេខ២ និងលេខ៣ ដោយស្នើសុំបង់ពន្ធ តែសុំមិនដូរចង្កូត។ ករណីនេះ លោកបញ្ជាក់ថា លោកយល់ស្របជាមួយនឹងសំណើរបស់ពួកគេ ដោយតម្រូវឱ្យម្ចាស់រថយន្តចង្កូតស្តាំ ដែលមិនទាន់បានបង់ពន្ធអាករទាំងអស់ ត្រូវទៅបង់ពន្ធ ដោយមិនចាំបាច់ដូរចង្កូតរថយន្ត។
លោកបានថ្លែងថា៖ «អ្នកដែលបានដូរ[ចង្កូតស្ដាំ]ហើយ ដូរឱ្យបានចប់ទៅ តែអ្នកដែលមិនទាន់បានដូរ ត្រូវចូលមកបង់ពន្ធ រួចហើយក្រសួងសាធារណការ ត្រូវចេញស្លាក[លេខ]ឱ្យគេ […] តាមកន្លងទៅ រថយន្តចង្កូតស្តាំមួយចំនួនបានចូលមកធ្វើការកក់ប្រាក់រួចហើយទៅកែចង្កូត ឥលូវអ្នកដែលបានកក់ប្រាក់ហើយ ហើយទៅដូរចង្កូត ដោយមិនទាន់បានដូរ មិនចាំបាច់ដូរទេ ប្រសិនបើមិនទាន់បានដូរ តែត្រូវចូលមកបង់ពន្ធឱ្យបានដាច់»។
លោកនាយករដ្ឋមន្ត្រី ហ៊ុន សែន បានគូសបញ្ជាក់ថា ការអនុញ្ញាតនេះធ្វើឡើងសម្រាប់តែរថយន្តចង្កូតស្តាំដែលកំពុងចរាចរលើដងផ្លូវនៅក្នុងប្រទេសកម្ពុជាប៉ុណ្ណោះ ហើយសម្រាប់រថយន្តចង្កូតស្តាំដែលនាំចូលថ្មី គឺហាមដាច់ខាតលើការនាំចូល បើទោះជារថយន្តទាំងនោះមកដល់ព្រំដែនក៏ដោយ។
លោកគូសបញ្ជាក់ថា៖ «ខ្ញុំសូមបញ្ជាក់ សុពលភាពរបស់វា គឺនៅថ្ងៃទី៦ ខែ៧ ឆ្នាំ២០២២ ចាប់ពីថ្ងៃស្អែកទៅ! រថយន្តដែលនាំចូលថ្មីជាចង្កូតស្តាំ មិនបាច់បង់ពន្ធ មិនបាច់ដូរចង្កូត គឺចាប់ទាំងអស់»។
បើតាមលោកនាយករដ្ឋមន្ត្រី ហ៊ុន សែន រថយន្តចង្កូតស្តាំដែលមិនទាន់បង់ពន្ធមានចំនួនជាង៦ ០០០គ្រឿង ក្នុងនោះបានកែចង្កូតរួចចំនួន៤ ០០០គ្រឿង និងមិនទាន់កែចង្កូតមានចំនួន២ ៥០០គ្រឿង។
កាលពីថ្ងៃម្សិលមិញ ក្រុមអ្នកបើកបររថយន្តចង្កូតស្តាំប្រមាណ២០០នាក់បានប្រមូលផ្ដុំគ្នាតវ៉ា ដោយបិទផ្លូវសាធារណៈនៅចំណុចរង្វង់មូលកួរស្រូវ ក្នុងខណ្ឌដង្កោ រាជធានីភ្នំពេញ ដើម្បីសុំគោលការណ៍បង់ពន្ធធម្មតា តែមិនកែចង្កូតពីស្តាំមកឆ្វេង។
ការតវ៉ារបស់ក្រុមអ្នកបើកបររថយន្តចង្កូតស្តាំនេះ បានធ្វើឡើងក្រោយពីយុទ្ធនាការប្រមូលពន្ធនិងអាករនាំចូលលើរថយន្តគ្មានពន្ធមានស្រាប់ក្នុងប្រទេស បានផុតកំណត់នៅថ្ងៃទី៣០ ខែមិថុនា ហើយចាប់ពីថ្ងៃទី១ ខែកក្កដា ឆ្នាំ២០២២តទៅ អគ្គនាយកដ្ឋានគយ និងរដ្ឋាករកម្ពុជា បានព្រមានថានឹងអនុវត្តវិធានការបង្ក្រាបយ៉ាងម៉ឺងម៉ាត់ ក្នុងករណីបង្ក្រាបបានចំពោះរថយន្តចង្កូតស្តាំ ដែលជាប្រភេទទំនិញហាមឃាត់ការនាំចូល នឹងត្រូវកម្ទេចចោល ឬដោះបំបែកជាគ្រឿងបន្លាស់តាមនីតិវិធីជាធរមាន។
ម្ចាស់រថយន្តចង្កូតស្ដាំ លោក ផល ប្រុសនិត សាទរចំពោះការសម្រេចរបស់ប្រមុខរដ្ឋាភិបាល ដែលអនុញ្ញាតឱ្យម្ចាស់រថយន្តចង្កូតស្ដាំមិនបាច់ទៅកែចង្កូតពីស្ដាំទៅឆ្វេង ដោយគ្រាន់តែទៅបង់ពន្ធនោះ។ តែយ៉ាងណា លោកស្នើដល់រដ្ឋាភិបាលពន្យារពេលសម្រាប់ការបង់ពន្ធ ដោយសារតែពួកគាត់មួយចំនួនកំពុងជួបបញ្ហាហិរញ្ញវត្ថុ និងត្រូវខ្ចីគេដើម្បីយកទៅបង់ពន្ធ។
លោកថា៖ «វាលឿនពេកបង! បើស្នើទៅធនាគាខ្លាចអត់ទាន់! បើគេអ្នកមានលុយ អាចទៅបង់ពន្ធបានលឿនៗ តែបើខាងប្អូន ត្រូវការខ្ចីលុយ អត់អាចបង់ភ្លាមៗបានទេ»។
អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម បានលើកឡើងថា ទាក់ទិននឹងការកំណត់ពេលយកពន្ធលើរថយន្តចង្កូតស្ដាំនេះ លោកកំពុងតែពិនិត្យឯកសារ ដើម្បីស្នើទៅកាន់នាយករដ្ឋមន្រ្តី និងធ្វើសន្និសីទសារព័ត៌មាននៅថ្ងៃស្អែក ដើម្បីកំណត់ថ្ងៃឱសានវាទជាថ្មី។
លោកថា៖ «ខ្ញុំកំពុងពិនិត្យមើលប្រសាសន៍របស់សម្ដេច [ហ៊ុន សែន] ហើយក៏មានរបាយការណ៍ជូនសម្ដេចដែរ ហើយកំពុងរង់ចាំចំណាររបស់សម្ដេច។ ហើយយើងកំពុងពិនិត្យមើលលិខិតស្នាម។ ត្រូវតែមានឱសានវាទ បើអ៊ីចឹងទេ រឿងហ្នឹងអត់ចប់ទេ»។
លោកបញ្ជាក់ដែរថា កន្លងមក អគ្គនាយកដ្ឋានគយ និងរដ្ឋាករកម្ពុជា មិនអនុញ្ញាតឱ្យមានការនាំចូលរថយន្តចង្កូតស្ដាំនោះទេ ប៉ុន្តែមានជនខិលខូចមួយចំនួននៅតែអាចនាំចូលរថយន្តប្រភេទនេះចូលទឹកដីប្រទេសកម្ពុជាបាន។
ប្រធានមជ្ឈមណ្ឌលប្រជាពលរដ្ឋ ដើម្បីការអភិវឌ្ឍ និងសន្ដិភាព លោក យង់ គិមអេង បានបង្ហាញការគាំទ្រចំពោះវិធានការរបស់នាយករដ្ឋមន្រ្តី លើការទប់ស្កាត់ការនាំចូលរថយន្តចង្កូតស្ដាំ និងព្រមអនុញ្ញាតឱ្យម្ចាស់រថយន្តទាំងនោះទៅបង់ពន្ធ ជំនួសឱ្យការចាប់រថយន្ត។ តែយ៉ាងណា លោកស្នើឱ្យរដ្ឋាភិបាលទុកពេលវេលាសមរម្យបន្ថែមទៀតសម្រាប់ម្ចាស់រថយន្តទៅបង់ពន្ធ។
លោកថា៖ «ខ្ញុំគិតថា ការឱ្យពួកគាត់បង់ គឺជាការប្រសើរ ប៉ុន្តែទុកពេលវេលាឱ្យគ្នាបន្តទៀតទៅ ព្រោះថា ប្រជាពលរដ្ឋមិនខាតបង់ច្រើន ឧបមាថាប្រសិនបើមានការដករថយន្ត គឺអាចធ្វើឱ្យមានការខាតបង់ច្រើន ហើយម្យ៉ាងទៀតរដ្ឋក៏ទទួលបានចំណូលដែរ»។
លោក យង់ គិមអេង បន្ថែមថា ការដែលនៅតែមានរថយន្តចង្កូតស្ដាំខុសច្បាប់នៅបន្តនាំចូលមកកម្ពុជានេះ អាចបណ្តាលមកពីភាពខ្វះចន្លោះរបស់មន្រ្តីអាជ្ញាធរពាក់ព័ន្ធ និងអំពើពុករលួយដែលកើតចេញពីមន្រ្តីនៅតាមព្រំដែន ជាដើម ខណៈដែលរថយន្តប្រភេទនេះបានធ្វើឱ្យមានបញ្ហាគ្រោះថ្នាក់ចរាចរណ៍ផងដែរ៕
