អ្នកនាំពាក្យសាលាដំបូងខេត្តស្វាយរៀង លោក ទេព ផល្លា បានឱ្យដឹងនៅថ្ងៃអង្គារម្សិលមិញថា ជនជាតិចិនមួយរូបដែលជាប់ពាក់ព័ន្ធករណីឃាតកម្មលើជនជាតិចិនដូចគ្នាដោយសារបញ្ហាបំណុល ត្រូវបានចោទប្រកាន់ពីបទមនុស្សឃាត និងត្រូវបានបញ្ជូនទៅឃុំខ្លួនជាបណ្ដោះអាសន្ននៅពន្ធនាគារខេត្ត។
បុរសជនជាតិចិនមួយរូបត្រូវបានគេសម្លាប់កាលពីថ្ងៃសៅរ៍ ដោយសាររឿងជំពាក់បំណុលជាង៣ ០០០ដុល្លារ នៅកាស៊ីណូម៉ុកបាយ ក្រុងបាវិត ខេត្តស្វាយរៀង។ នេះបើតាមការឱ្យដឹងពីមន្រ្តីនគរបាលសង្កាត់មួយរូប។
លោក ឈិន ឈាង នាយប៉ុស្តិ៍នគរបាលសង្កាត់បាវិត ក្រុងបាវិត ថ្លែងថា ជនរងគ្រោះឈ្មោះ Gong Jiangyong អាយុ៣៨ឆ្នាំ ត្រូវបានសម្លាប់ដោយអ្នកផ្គត់ផ្គង់គ្រឿងសំណង់មួយរូបឈ្មោះ Zhu Jun Sheng អាយុ៣២ឆ្នាំ ដោយសារតែជនរងគ្រោះជំពាក់បំណុលជាង៣ ០០០ដុល្លារ។
លោក ឈិន ឈាង បន្ថែមថា៖ «មន្រ្តីសមត្ថកិច្ចរបស់យើងចំនួន៥នាក់បានចុះទៅកាន់ទីតាំងកើតហេតុនោះ ប៉ុន្តែមានតែ២រូបប៉ុណ្ណោះដែលអាចចូលទៅក្នុងបរិវេណអាគារនោះបាន»។
ទាក់ទិនករណីនេះ ស្នងការនគរបាលខេត្តស្វាយរៀង លោក កឹង ឃន និងស្នងការរង លោក កុយ សុភាព បានបដិសេធអត្ថាធិប្បាយលើបញ្ហានេះ ខណៈអធិការនគរបាលក្រុងបាវិត លោក ឯម សុវណ្ណារិទ្ធ បានបដិសេធថា មិនមានករណីបែបនេះកើតឡើងឡើយ។
ទីតាំងកាស៊ីណូដែលជាប់ពាក់ព័ន្ធនឹងករណីឃាតកម្មលើជនជាតិចិននេះ គ្រប់គ្រងដោយបុគ្គលចំនួន៥រូបដែលមានដើមកំណើតមកពីប្រទេសមីយ៉ាន់ម៉ា ខណៈពួកគេទាំងអស់នោះសុទ្ធសឹងតែមានសញ្ជាតិខ្មែរ។
ជាមួយគ្នានេះ ប្រធានក្រុមប្រឹក្សាភិបាលក្រុមហ៊ុន លោក U Wang Young ក៏ធ្លាប់មានប្រវត្តិបរិច្ចាគថវិកាក្នុងទំហំរាប់ម៉ឺនដុល្លារ ដល់កាកបាទក្រហមកម្ពុជា ផងដែរ។ នេះបើយោងតាមអត្ថបទព័ត៌មានរបស់រដ្ឋាភិបាល។
យោងតាមរបាយការណ៍ប្រព័ន្ធផ្សព្វផ្សាយក្នុងស្រុកនានាបង្ហាញថា ទីតាំងកាស៊ីណូម៉ុកបាយនេះ កាលពីពេលកន្លងទៅ ក៏ធ្លាប់កើតមានករណីឧក្រិដ្ឋកម្មជាច្រើនផងដែរ ដែលក្នុងនោះរួមមាន ករណីជនជាតិវៀតណាមចំនួន១៣នាក់ ដែលត្រូវបានគេរកឃើញថា ត្រូវបានបង្ខាំងកាលពីខែតុលាដោយសារជំពាក់បំណុលកាស៊ីណូ។ ជាមួយគ្នានេះ ករណីបុគ្គលិកវៀតណាមម្នាក់ក៏ត្រូវបានគេប្រទះឃើញស្លាប់កាលពីខែមេសា នៅក្នុងទីតាំងដដែលនេះផងដែរ។
យោងតាមការចុះផ្សាយរបស់អង្គភាពសារព័ត៌មាន ផូស ញូ (Post News) កាស៊ីណូនេះ កាលពីឆ្នាំ២០១៩ ក៏ធ្លាប់មានករណីជួយសង្រ្គោះជនជាតិចិនចំនួន៥៣នាក់ចេញពីបរិវេណទីតាំងនេះផងដែរ ខណៈនៅក្នុងចន្លោះឆ្នាំ២០១៧ និង២០១៩ ហិង្សាចំនួន៣ករណីក៏ត្រូវបានរាយការណ៍ចេញពីទីតាំងនេះផងដែរ។
ទាក់ទិនទីតាំងក្រុងបាវិតវិញ បុរសជាជនជាតិវៀតណាមមួយរូប កាលពីពេលថ្មីៗនេះ ក៏បានប្រទះឃើញស្លាប់ បន្ទាប់ពីធ្លាក់ពីលើជាន់ទី៨ នៃកាស៊ីណូក្នុងក្រុងមួយកន្លែង ដែលត្រូវបានគេស្គាល់ថាជាកម្មសិទ្ធិរបស់សមាជិកព្រឹទ្ធសភាមកពីគណបក្សប្រជាជនកម្ពុជា គឺលោក កុក អាន។
ករណីដាច់ដោយឡែកផ្សេងទៀត បុរសជាជនជាតិវៀតណាមម្នាក់ទៀតក៏ត្រូវបានប្រទះឃើញស្លាប់នៅកាស៊ីណូក្នុងទីក្រុងបាវិតមួយកន្លែង គ្រប់គ្រងដោយបុគ្គលមួយរូបដែលត្រូវបានគេស្គាល់ថាមានទំនាក់ទំនងស្និទ្ធស្នាលនឹងលោក ហ៊ុន តូ ខណៈមានជនជាតិឥណ្ឌូនេស៊ី ២២នាក់ផ្សេងទៀតក៏ត្រូវបានជួយសង្គ្រោះចេញពីទីតាំងមួយចំនួនក្នុងតំបន់ផងដែរ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Murder at Bavet Moc Bai Casino: Commune Police
