ចៅក្រមសាលាឧទ្ធរណ៍ខេត្តបាត់ដំបង សម្រេចតម្កល់សាលក្រមរបស់សាលាដំបូងខេត្តបាត់ដំបង ដែលផ្ដន្ទាទោសអ្នកសារព័ត៌មានម្នាក់ឈ្មោះ កៅ ពិសិដ្ឋ ឱ្យជាប់ពន្ធនាគារ២ឆ្នាំ ទុកជាបានការ ខណៈអ្នកសារព័ត៌មានរូបនោះបានសរសេរអត្ថបទរិះគន់រឿងវ៉ាក់សាំងកូវីដ-១៩។
លោក កៅ ពិសិដ្ឋ អ្នកសារព័ត៌មានរបស់គេហទំព័រ www.srbreakingnews.com ត្រូវបានសមត្ថកិច្ចខេត្តបាត់ដំបង ចាប់ខ្លួនកាលពីថ្ងៃទី១៤ ខែកក្កដា ឆ្នាំ២០២១ ក្រោយពីអ្នកសារព័ត៌មានរូបនោះបានបង្ហោះសារនៅតាមបណ្ដាញសង្គមហ្វេសប៊ុក កាលពីថ្ងៃទី១២ ខែកក្កដា ឆ្នាំ២០២១ ដោយរិះគន់រដ្ឋាភិបាលអំពីវិធានការទប់ស្កាត់ជំងឺកូវីដ-១៩ និងសុំឱ្យសហគមន៍អន្តរជាតិចាត់វិធានការលើរដ្ឋាភិបាលកម្ពុជា ដូចជាការផ្ដាច់ជំនួយជាដើម។
លោក នួន ផានិត មេធាវីការពារក្ដីឱ្យលោក កៅ ពិសិដ្ឋ បានឱ្យដឹងនៅថ្ងៃទី០៧ ខែកក្កដា ឆ្នាំ២០២២នេះថា ចៅក្រមសាលាឧទ្ធរណ៍ខេត្តបាត់ដំបង កាលពីថ្ងៃអង្គារ បានសម្រេចតម្តល់សាលក្រមសាលាដំបូងខេត្តបាត់ដំបង ទុកជាបានការ។
លោកបន្តថា សាលាដំបូងខេត្តបាត់ដំបង កាលពីថ្ងៃទី៣០ ខែធ្នូ ឆ្នាំ២០២១ បានផ្ដន្ទាទោសលោក កៅ ពិសិដ្ឋ ឱ្យជាប់ពន្ធនាគារចំនួន២ឆ្នាំ និងពិន័យជាប្រាក់៣លានរៀល ក្រោមការចោទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» នៃក្រមព្រហ្មទណ្ឌ និងបទ «រារាំងដល់ការអនុវត្តវិធានការ» នៃច្បាប់ស្តីពី វិធានការទប់ស្កាត់ការឆ្លងរាលដាលនៃជំងឺកូវីដ-១៩ និងជំងឺកាចសាហាវ និងប្រកបដោយគ្រោះថ្នាក់ធ្ងន់ធ្ងរ។
លោកមេធាវី នួន ផានិត ចាត់ទុកការសម្រេចរបស់សាលាឧទ្ធរណ៍ខេត្តបាត់ដំបង ថាជាការផ្ដន្ទាទោសដែលមានលក្ខណៈធ្ងន់ធ្ងរ ខណៈកូនក្ដីរបស់លោកបានឆ្លើយគ្រប់ដំណាក់កាល និងមានការសហការជាមួយមន្រ្តីគ្រប់លំដាប់ថ្នាក់។
លោកថា៖ «ខ្ញុំយល់ឃើញថា សាលដីកាឬសាលក្រមនេះ សម្រេចដាក់ពន្ធនាគារដល់លោក កៅ ពិសិដ្ឋ នេះមានលក្ខណៈធ្ងន់ធ្ងរ។ ហើយគោលបំណងរបស់គាត់ប្ដឹងឧទ្ធរណ៍ ដើម្បីបន្ទូរបន្ថយទោសទៅដល់គាត់ជាអប្បបរមា ដែលគាត់ជាប់ឃុំប៉ុណ្ណឹង»។
ចំណែក នាយកប្រតិបត្តិសម្ព័ន្ធអ្នកសារព័ត៌មានកម្ពុជា (ខេមបូចា) លោក ណុប វី យល់ឃើញថា តុលាការគួរយកច្បាប់ស្តីពីរបបសារព័ត៌មាន ជាជាងការប្រើច្បាប់ព្រហ្មទណ្ឌ ឬច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩ មកផ្តន្ទាទោសទៅលើអ្នកសារព័ត៌មាន ព្រោះការធ្វើបែបនេះនឹងធ្វើឱ្យប៉ះពាល់ជាអវិជ្ជមានចំពោះការបំពេញភារកិច្ចរបស់អ្នកសារព័ត៌មាន។
លោកថា៖ «វាជាចំណុចខ្វះខាតរបស់ប្រព័ន្ធច្បាប់ផងដែរ ព្រោះយើងដឹងហើយថា រាល់សកម្មភាព រាល់បទល្មើសរបស់អ្នកសារព័ត៌មានហ្នឹង ត្រូវតែយកច្បាប់ស្តីពីរបបសារព័ត៌មាន យកមកប្រើប្រាស់។ ការដែលមិនយកច្បាប់របបសារព័ត៌មានមកប្រើប្រាស់ចំពោះបទល្មើសដែលកើតឡើងចំពោះអ្នកសារព័ត៌មាននោះ គឺជាចេតនាដែលធ្វើឱ្យប៉ះពាល់ដល់សិទ្ធិរបស់អ្នកសារព័ត៌មានផងដែរ»។
ទោះជាយ៉ាងណា អ្នកនាំពាក្យសាលាឧទ្ធរណ៍ខេត្តបាត់ដំបង លោកស្រី ទៀង សំបូរ បានលើកឡើងថា រាល់ការប្រកាសសាលក្រម គឺជាឆន្ទានុសិទ្ធិរបស់តុលាការ។ លោកស្រីបន្តថា អ្នកសារព័ត៌មានរូបនោះបានប្រព្រឹត្តបទល្មើសព្រហ្មទណ្ឌ ដែលមិនអាចយកច្បាប់ស្តីពីរបបសារព័ត៌មានមកប្រើប្រាស់បានទេ។
លោកស្រីបន្តថា៖ «ទោះបីជាគាត់អ្នកកាសែត តែគាត់បានល្មើសច្បាប់ព្រហ្មទណ្ឌ ច្បាប់អ្នកកាសែតផ្សេង! តែបើគាត់ប្រព្រឹត្តបទល្មើសព្រហ្មទណ្ឌ គឺបទព្រហ្មទណ្ឌហើយ»។
កាលពីថ្ងៃទី២១ ខែកក្កដា ឆ្នាំ២០២១ អ្នកសារព័ត៌មានគ្មានព្រំដែន បានចេញសេចក្តីថ្លែងការណ៍មួយ ដោយទាមទារឱ្យអាជ្ញាធរកម្ពុជាដោះលែងលោក កៅ ពិសិដ្ឋ ជាបន្ទាន់ និងឥតលក្ខខណ្ឌ ដោយកាលណោះ អង្គការអន្តរជាតិមួយនេះថា រដ្ឋាភិបាលកម្ពុជាកំពុងប្រើលេសទប់ស្កាត់ជំងឺកូវីដ-១៩ ទៅបំបិទសំឡេងអ្នករិះគន់តែប៉ុណ្ណោះ៕
