លោក បូរីស ចនសុន (Boris Johnson) គ្រោងនឹងប្រកាសលាលែងចេញពីតំណែងនាយករដ្ឋមន្ត្រីអង់គ្លេស នៅថ្ងៃព្រហស្បតិ៍នេះ បន្ទាប់ពីរដ្ឋមន្ត្រី និងមន្រ្តីនានាក្នុងប្រទេសជាង៥០នាក់ បានសម្រុកចុះចេញពីតំណែងជាបន្តបន្ទាប់ ដោយសារតែពួកគេអស់ជំនឿលើការដឹកនាំរបស់លោក។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ប្រភពដដែលបន្តថា គម្រោងនៃការប្រកាសលាលែងចេញពីតំណែងនេះ ត្រូវបានធ្វើឡើងភ្លាមៗបន្ទាប់ពីមានរដ្ឋមន្ត្រីចំនួន៨នាក់ផ្សេងទៀតបានលាលែងចេញពីតំណែងផ្ទួនៗគ្នាក្នុងរយៈពេលចុងក្រោយនេះ ដែលករណីនេះក៏ជាហេតុផលមួយដែលនឹងធ្វើឱ្យលោក បូរីស ចនសុន ត្រូវតែប្រកាសចុះចេញពីតំណែងរបស់ខ្លួនផងដែរ។
យោងតាមការិយាល័យរបស់នាយករដ្ឋមន្ត្រីរូបនេះបានបញ្ជាក់ថា លោក បូរីស ចនសុន ក៏គ្រោងនឹងចេញសេចក្តីថ្លែងការណ៍មួយទៅកាន់សាធារណជននៅពេលបន្តិចទៀតនេះផងដែរ។
ថ្លែងតាមរយៈបណ្តាញសង្គម ធ្វីតធ័រ (Twitter) លោក Justin Tomlinson ជាអនុប្រធានគណបក្ស Conservative Party របស់លោក បូរីស ចនសុន បានលើកឡើងថា៖ «ការលាលែងចេញពីតំណែងរបស់លោក បូរីស ចនសុន គឺនឹងកើតមានឡើង»។
ទាក់ទិននឹងករណីនេះ គណបក្សនឹងត្រូវជ្រើសរើសមេដឹកនាំថ្មីមួយ ដោយដំណើរការនេះអាចនឹងប្រើរយៈពេលប្រមាណជា២ខែ៕