រដ្ឋាភិបាលកម្ពុជាបានទទួលជំនួយវ៉ាក់សាំងប្រឆាំងកូវីដ-១៩ ប្រភេទ Pfizer ចំនួនជិត២០ម៉ឺនដូសពីប្រទេសអូស្ត្រាលី ដែលការផ្ដល់ជំនួយនេះសម្រាប់ការចូលរួមទប់ស្កាត់ការរាតត្បាតជំងឺកូវីដ-១៩។
ការប្រគល់និងទទួលវ៉ាក់សាំងនេះមានការចូលរួមពីរដ្ឋមន្រ្តីក្រសួងសុខាភិបាល លោក ម៉ម ប៊ុនហេង និងឯកអគ្គរាជទូតអូស្រ្តាលីប្រចាំកម្ពុជា នៅព្រឹកថ្ងៃសុក្រ ទី៨ ខែកក្កដា ឆ្នាំ២០២២នេះ។
តាមរយៈសារនៅលើទំព័រហ្វេសប៊ុករបស់លោកនាយករដ្ឋមន្រ្តី ហ៊ុន សែន បានឱ្យដឹងថា ការផ្តល់ជំនួយជាវ៉ាក់សាំងប្រឆាំងកូវីដ-១៩របស់ប្រទេសអូស្ត្រាលី ចំនួន១៩៦ ៨០០ដូស នៃចំនួន៤៨២ ៤០០ដូសដែលនឹងផ្ដល់ជូនកម្ពុជានេះ ជាជំនួយបន្ថែមទៅលើជំនួយវ៉ាក់សាំង Pfizer-BioNtech ទូបង្កកត្រជាក់ និងទូបង្កកត្រជាក់បំផុត សរុប១៣៣គ្រឿង និងបរិក្ខារផ្សេងៗទៀត និងជាផ្នែកមួយនៃជំនួយអូស្ត្រាលីដែលមានថវិកាចំនួន៣៥,៧លានដុល្លារអូស្រ្តាលី ក្នុងយុទ្ធនាការចាក់វ៉ាក់សាំងប្រកបដោយសុវត្ថិភាពនិងសមភាពនៅកម្ពុជា។
លោកនាយករដ្ឋមន្ត្រី ហ៊ុន សែន បន្តថា គិតមកដល់ពេលនេះ កម្ពុជាបានបញ្ជាទិញនិងទទួលជំនួយវ៉ាក់សាំងបង្ការជំងឺកូវីដ-១៩ពីបណ្តាប្រទេសនានា សរុបជិត៥៣លានដូស ក្នុងនោះមានផ្ទុកនៅក្នុងឃ្លាំងប្រមាណ២០លានដូស ខណៈប្រមាណ២០លានដូសទៀតដែលជាជំនួយនិងការបញ្ជាទិញ នៅមិនទាន់បានដឹកមកដល់កម្ពុជានៅឡើយ។
លោកក៏បានបញ្ជាក់ដែរថា រដ្ឋាភិបាលកម្ពុជានៅតែបន្តយកចិត្តទុកដាក់ខ្ពស់ក្នុងការទប់ស្កាត់ការរាតត្បាតនៃជំងឺកូវីដ-១៩នេះ បើទោះបីជាកម្ពុជាទទួលបានជោគជ័យខ្ពស់លើការប្រយុទ្ធប្រឆាំងនឹងជំងឺនេះ ហើយការងារអាទិភាពក្នុងការប្រយុទ្ធប្រឆាំងនេះ គឺបន្តផ្តល់វ៉ាក់សាំងជូនប្រជាពលរដ្ឋ។
គួរបញ្ជាក់ថា គិតត្រឹមថ្ងៃទី០៧ ខែកក្កដា កម្ពុជាបានចាក់វ៉ាក់សាំងជូនពលរដ្ឋជាង៩៤ភាគរយនៃចំនួនប្រជាពលរដ្ឋសរុប ក្នុងនោះចាក់ជូនកុមារអាយុចាប់ពី៣ឆ្នាំឡើង ដល់ក្រោម៥ឆ្នាំ បានជាង៧០ភាគរយ, កុមារអាយុ៥ឆ្នាំ បានជាង១៣៥ភាគរយ, កុមារអាយុពី៦ឆ្នាំ ទៅ១២ឆ្នាំ បានជាង១០៩ភាគរយ, កុមារ និងយុវវ័យ អាយុ១២ឆ្នាំ ដល់១៨ឆ្នាំ បានជាង១០០ភាគរយ និងអាយុ១៨ឆ្នាំឡើង បានជាង១០៣ភាគរយ។ ក្រៅតែពីដូសមូលដ្ឋាន ពេលនេះកម្ពុជាបានឈានដល់ចាក់ដូសជំរុញទី៥ផងដែរ។ ក្នុងនោះដូសជំរុញទី៣ ចាក់បានជាង១០លាននាក់, ដូសជំរុញទី៤ ចាក់បានជិត៣លាននាក់, ដូសជំរុញទី៥ បានជាង៣៤ម៉ឺននាក់៕
