ក្រសួងធនធានទឹក និងឧតុនិយម និងអាជ្ញាធរខេត្តមាត់សមុទ្រចំនួន២ អំពាវនាវដល់ប្រជាពលរដ្ឋបង្កើនការប្រុងប្រយ័ត្ននឹងបញ្ហាអាកាសធាតុ ជាពិសេសពលរដ្ឋរស់នៅភូមិសាស្ត្រខេត្តកោះកុង និងខេត្តព្រះសីហនុ ខណៈកម្ពុជានឹងរងនូវឥទ្ធិពលប្រព័ន្ធសម្ពាធទាប ដែលនឹងធ្វើឱ្យបណ្ដាខេត្តនិងរាជធានី នឹងមានភ្លៀងធ្លាក់ លាយឡំនឹងរន្ទះ និងខ្យល់កន្ត្រាក់ខ្លាំង។
សេចក្តីជូនដំណឹងបន្ថែមរបស់ក្រសួងធនធានទឹក និងឧតុនិយម ចុះថ្ងៃទី១១ ខែកក្កដា ឆ្នាំ២០២២នេះ បានឱ្យដឹងថា ចាប់ពីថ្ងៃទី១១ ដល់ថ្ងៃទី១៤ ខែកក្កដានេះ កម្ពុជាទទួលរងនូវឥទ្ធិពលពីប្រព័ន្ធសម្ពាធទាប ITCZ ដែលអូសបន្លាយពីប្រទេសថៃ ភ្ជាប់ទៅនឹងសម្ពាធទាបសកម្មមួយនៅលើសមុទ្រចិនខាងត្បូង រួមជាមួយនឹងមូសុងនិរតីបក់ខ្លាំងមកលើតំបន់មាត់សមុទ្រ និងភាគខាងក្រោមកម្ពុជា។
តាមរយៈការតាមដានការវិវត្តស្ថានភាពអាកាសធាតុនេះ ក្រសួងថា បណ្តាខេត្ត និងរាជធានី នៅក្នុងប្រទេសកម្ពុជា នឹងអាចមានភ្លៀងធ្លាក់រាយប៉ាយ លាយឡំដោយផ្គរ រន្ទះ និងខ្យល់កន្ត្រាក់ ក្នុងនោះតំបន់មាត់សមុទ្រនឹងអាចមានភ្លៀងធ្លាក់ច្រើនជាបន្តបន្ទាប់ ដែលអាចធ្វើឱ្យផ្នែកមួយចំនួនក្នុងភូមិសាស្ត្ររវាងខេត្តកោះកុង និងខេត្តព្រះសីហនុ អាចជួបប្រទះនូវជំនន់ទឹកភ្លៀង ហើយនៅលើផ្ទៃសមុទ្រនឹងមានភ្លៀងធ្លាក់ខ្លាំង ខ្យល់ខ្លាំង និងរលកសមុទ្រខ្ពស់ៗ។
ក្រសួងបានបញ្ជាក់ថា៖ «អាស្រ័យដោយស្ថានភាពអាកាសធាតុ ដូចបានជម្រាបជូនខាងលើ សូមសាធារណជនជ្រាបជាព័ត៌មាន និងបង្កើនការប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានជាយថាហេតុ»។
ស្របពេលគ្នានេះដែរ អភិបាលខេត្តព្រះសីហនុ លោក គួច ចំរើន នៅថ្ងៃចន្ទនេះ ក៏បានផ្ញើសារជាសំឡេងណែនាំដល់អាជ្ញាធរមូលដ្ឋាន ត្រូវផ្សព្វផ្សាយពីស្ថានភាពអាកាសធាតុនេះដល់ប្រជាពលរដ្ឋ ដោយហាមប្រាមការធ្វើដំណើរតាមទូកទៅកាន់កោះឬឆ្នេរផ្សេងៗ ជាពិសេសផ្សព្វផ្សាយដល់ប្រជានេសាទ ដើម្បីឱ្យពួកគាត់បានដឹង និងបញ្ចៀសកុំឱ្យមានគ្រោះថ្នាក់ផ្សេងៗដែលអាចកើតឡើងជាយថាហេតុ។ នេះបើតាមការស្រង់ប្រសាសន៍របស់អភិបាលខេត្តរូបនេះនៅលើបណ្ដាញសារព័ត៌មានក្នុងស្រុកមួយចំនួន។
លោក គួច ចំរើន ថ្លែងថា៖ «ខ្ញុំសូមឱ្យមានការហាមឃាត់ការធ្វើដំណើរតាមទូកទៅលំហសមុទ្រ កោះឆ្នេរ ក្នុងរយៈពេលនេះ ព្រោះដើម្បីបញ្ចៀសកុំឱ្យមានគ្រោះថ្នាក់ ឬក៏ការជាប់គាំងណាមួយ ដែលបង្កទៅដល់មហន្តរាយផ្សេងៗ ហើយក៏សូមរកគ្រប់មធ្យោបាយ ដើម្បីផ្តល់ដំណឹងដល់បងប្អូនប្រជានេសាទ ដែលពេលនេះម៉ោងនេះ ពួកគាត់កំពុងតែស្ថិតនៅក្នុងលំហសមុទ្រ តាមកោះឆ្នេរ ដើម្បីធ្វើនេសាទនោះ»។
ចំណែករដ្ឋបាលខេត្តកោះកុង ក៏បានបង្ហោះសារនៅលើទំព័រហ្វេសប៊ុករបស់ខ្លួន ដោយអំពាវនាវដល់ប្រជានេសាទ និងអ្នកធ្វើដំណើរតាមសមុទ្រទាំងអស់ឱ្យមានការប្រុងប្រយ័ត្នចំពោះស្ថានភាពអាកាសធាតុដែលអាក្រក់ខ្លាំងនេះផងដែរ ដោយអ្នកធ្វើដំណើរពុំគួរធ្វើនាវាចរ ហើយអ្នកនេសាទគួរផ្អាកការចេញនេសាទទៅសមុទ្រ ចាប់ពីថ្ងៃទី១១ ដល់ថ្ងៃទី១៤ ខែកក្កដានេះ ដើម្បីការពារគ្រោះថ្នាក់ជាយថាហេតុ៕