ពលរដ្ឋ៤នាក់ក្នុងចំណោមកសិកររាប់រយនាក់ផ្សេងទៀតត្រូវបានសមត្ថកិច្ចឃាត់ខ្លួន ក្រោយផ្ទុះការតវ៉ាទាមទារទៅអាជ្ញាធរឱ្យប្រគល់រថយន្តដឹកលើសទម្ងន់របស់ថៃដែលដឹកកសិផលរបស់ពួកគេទៅកាន់ភាគីថៃវិញ។
អធិការនគរបាលស្រុកភ្នំព្រឹក ខេត្តបាត់ដំបង លោក សុង សុភ័ក្ត្រ មានប្រសាសន៍នៅថ្ងៃទី១១ ខែកក្កដា ឆ្នាំ២០២២នេះថា រថយន្តថៃចំនួន២គ្រឿងដែលចូលមកដឹកពោតរបស់ប្រជាកសិករខ្មែរនៅខេត្តបាត់ដំបង យកទៅលក់នៅប្រទេសថៃ ត្រូវបានអាជ្ញាធរចាប់ឃាត់ទុកកាលពីថ្ងៃសៅរ៍ ក្រោយរកឃើញថា រថយន្តទាំងពីរនេះដឹកលើសទម្ងន់។
ជាមួយគ្នានេះ លោកថា អាជ្ញាធរក៏បានសម្រេចធ្វើការផាកពិន័យលើអ្នកបើកបរជាជនជាតិថៃចំនួន២នាក់ រួមទាំងរឹបអូសយករថយន្តរបស់ពួកគេទៅរក្សាទុករយៈពេលមួយឆ្នាំផងដែរ។
ទោះជាយ៉ាងណា ព័ត៌មាននៃការរឹបអូសរថយន្តដឹកកសិផលយកមករក្សាទុកនេះ ត្រូវបានចែករំលែកយ៉ាងឆាប់រហ័សតាមបណ្ដាញសង្គម ដែលបានធ្វើឱ្យកសិករក្នុងតំបន់ក៏បានចាប់ផ្ដើមប្រមូលផ្ដុំគ្នាតវ៉ា ខណៈពួកគេបារម្ភថា ករណីនេះអាចនឹងធ្វើឱ្យភាគីថៃលែងមកទិញកសិផលរបស់ខ្មែរ និងធ្វើឱ្យកសិផលរបស់ខ្មែរនៅខេត្តជាប់ព្រំដែនមួយនេះកកស្ទះ និងគ្មានទីផ្សារលក់។
ទាក់ទិននឹងករណីនេះ លោក សុង សុភ័ក្ត្រ បន្តថា៖ «ពលរដ្ឋកាន់តែច្រើនបានឡើងមកប្រមូលផ្ដុំគ្នាដើម្បីតវ៉ា ដែលករណីនេះបានធ្វើឱ្យក្រុមការងារមិនអាចនាំយករថយន្តទាំងពីរនេះទៅកាន់មន្ទីរសាធារណការខេត្តបានឡើយ កាលពីថ្ងៃទី៩ [ខែកក្កដា]។ ពួកគេបានឡើងមកប្រមូលផ្ដុំគ្នា បន្ទាប់ពីពួកគេបានឮព័ត៌មាននេះតៗគ្នា។ ដូច្នេះហើយ ក្រុមការងារយើងក៏សម្រេចផ្អាកធ្វើសកម្មភាពជាបណ្ដោះអាសន្នសិន»។
លោកបន្ថែមថា ពលរដ្ឋប្រមាណ៥០០នាក់ដែលបានតវ៉ានេះក៏បានរារាំង និងប៉ះទង្គិចជាមួយនឹងមន្ត្រីសមត្ថកិច្ច និងកងរាជអាវុធហត្ថមកពីស្រុកមួយចំនួនដែលមករក្សាសណ្ដាប់ធ្នាប់ផងដែរ។
លោកថា៖ «ពួកគេ [សមត្ថកិច្ច] បានមកធ្វើអន្តរាគមន៍ ដើម្បីទប់ស្កាត់កុំឱ្យមានអំពើហិង្សាកើតឡើង ខណៈអ្នកតវ៉ាមួយចំនួនបានបន្ធូរខ្យល់រថយន្តដឹកលើសទម្ងន់ទាំងនេះ ដើម្បីកុំឱ្យបើកទៅមុខរួចផងដែរ»។
លោក សុង សុភ័ក្ត្រ បន្តថា៖ «នៅក្នុងហេតុការណ៍នោះ អ្នកបើកបរជាជនជាតិថៃម្នាក់ក៏បានរត់គេចខ្លួនចេញពីទីតាំងផងដែរ»។
ទោះជាយ៉ាងណា លោកថា នៅព្រឹកថ្ងៃបន្ទាប់ អាជ្ញាធរខេត្តក៏បានចុះទៅដកហូតយករថយន្តល្មើសច្បាប់យកមករក្សាទុក និងចាប់ខ្លួនអ្នកញុះញង់ចំនួន៤នាក់ផងដែរ។
លោកបានបន្តថា៖ «ក្នុងចំណោមពួកគេទាំងអស់ ក្នុងនោះមានមួយចំនួនបានលើកឡើងឱ្យពលរដ្ឋមកតវ៉ា ដើម្បីរារាំងអាជ្ញាធរមិនឱ្យយករថយន្តនោះចេញ ហើយមួយចំនួនទៀតបានផ្ដល់ជាទឹកសុទ្ធដល់អ្នកចូលរួមតវ៉ា ជាដើម។ អ្នកទាំងនោះហើយគឺជាបុគ្គលដែលត្រូវបានចាប់ខ្លួន»។
ទាក់ទិននឹងករណីនេះ អ្នកនាំពាក្យអយ្យការអមសាលាដំបូងខេត្តបាត់ដំបង លោក ដួង សារ៉ន បានឱ្យដឹងថា មនុស្សចំនួន៤នាក់ ក្នុងនោះមានស្ត្រីម្នាក់ដែរនោះ ត្រូវបានចាប់ខ្លួនទាក់ទិននឹងករណីរារាំងអាជ្ញាធរ និងប្រមូលផ្ដុំពលរដ្ឋឱ្យធ្វើការតវ៉ា។
លោកបន្តថា៖ «ពួកគេបច្ចុប្បន្នកំពុងតែស្ថិតនៅក្រោមការសាកសួរដោយអាជ្ញាធរ»។
លោក សុថាន់ បុរី ជាកសិករមួយរូបនៅស្រុកភ្នំព្រឹក បានប្រាប់វីអូឌីកាលពីថ្ងៃអាទិត្យកន្លងទៅថា ការប្រមូលផ្ដុំគ្នាតវ៉ានេះត្រូវបានធ្វើឡើង ដោយសារតែពលរដ្ឋនៅខេត្តជាប់ព្រំដែនថៃនេះ ព្រួយបារម្ភពីការបាត់បង់ទីផ្សារសម្រាប់ផលិតផលកសិកម្មរបស់ពួកគេ។ លោកបន្ថែមថា បច្ចុប្បន្ន ពួកគេកំពុងដាំពោតរាប់ពាន់តោនក្នុងមួយថ្ងៃ ដើម្បីនាំចេញទៅប្រទេសថៃ។
កសិកររូបនេះក៏បានអះអាងដែរថា គ្រួសាររបស់គាត់បានខ្ចីលុយពីធនាគារខ្ទង់៣ម៉ឺនដុល្លារ ដើម្បីធ្វើទុនសម្រាប់ធ្វើកសិកម្មដាំពោត ដំឡូងមី ស្វាយកែវរមៀត និងតាង៉ែន ជាដើម។
លោកថា៖ «កសិករគាត់ទទួលស្គាល់ថា ដឹកនេះវាលើសទម្ងន់មែន។ ប៉ុន្តែបើដឹកតាមទម្ងន់ស្តង់ដារដែលបានកំណត់ វាធ្វើឱ្យតម្លៃពោត វាកាន់តែធ្លាក់ទាប។ ខ្ញុំគិតថា ប្រសិនបើរឿងនេះមិនត្រូវដោះស្រាយតាមការស្នើសុំរបស់ប្រជាកសិករទេ វានឹងប៉ះពាល់ខ្ពស់ ទី១ ប្រឈមជំពាក់បំណុលធនាគារទ្វេដង ព្រោះការធ្វើកសិកម្មរបស់កសិករខ្មែរ គឺពឹងផ្អែកលើកម្ចីរបស់ធនាគារ និងមួយទៀត ពោតរបស់កសិករនឹងរងការខូចខាត ព្រោះឥលូវនេះ ពោតកំពុងត្រូវប្រមូលផលហើយ មិនអាចទុកយូរបានទេ»។
កសិករនៅស្រុកភ្នំព្រឹកម្នាក់ទៀត លោក សេង ហាន បានលើកឡើងថា គ្រួសារលោកក៏បានខ្ចីលុយធនាគារខ្ទង់៥ពាន់ដុល្លារ ដើម្បីធ្វើទុនដាំពោតផងដែរ ហើយប្រសិនបើពោតលក់មិនចេញ រូបលោកនឹងប្រឈមជំពាក់បំណុលធនាគារកាន់តែខ្លាំង។
លោកថា៖ «ប្រសិនបើថៃគេអត់មកទិញ កសិករយើងលំបាកហើយ ដោយមិនដឹងយកទៅលក់នៅណានោះទេ។ យើងរស់នៅជាយដែននេះ ដូច្នេះ យើងមានតែពឹងលើទីផ្សារថៃហ្នឹងហើយ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Four Arrested After Thai Grain-Truck Seizure Sparks Protest
