មន្រ្តីជាន់ខ្ពស់នៃក្រសួងសុខាភិបាល បានអំពាវនាវឱ្យចូលរួមការពារការចម្លងវីរុសកូវីដ-១៩ ក្រោយពីរកឃើញជំងឺកូវីដ-១៩ អូមីក្រុងបំប្លែងថ្មីប្រភេទ BA.4 និង BA.5 នៅកម្ពុជា ព្រមទាំងក្រើនរម្លឹកពីការបង្ការ«ជំងឺអុតស្វា»ផងដែរ។
តាមសារជាសំឡេងនៅព្រឹកថ្ងៃទី១២ ខែកក្កដា ឆ្នាំ២០២២ លោកស្រីវេជ្ជបណ្ឌិត ឱ វណ្ណឌីន ឱ្យដឹងថា ចាប់ពីថ្ងៃទី២៨ ខែមិថុនា ឆ្នាំ២០២២ រហូតមកដល់ពេលនេះ កម្ពុជាបានរកឃើញជំងឺកូវីដ-១៩ ឆ្លងចូលសហគមន៍ជាថ្មីទៀតជារៀងរាល់ថ្ងៃ ដោយក្នុងចំណោមអ្នកវិជ្ជមានទាំងនោះក៏មានវត្តមានប្រភេទអូមីក្រុងបំប្លែងថ្មីប្រភេទ BA.4 និង BA.5។
លោកស្រីបន្តថា វ៉ាក់សាំងកូវីដ-១៩ មានការបញ្ជាក់ពីអង្គការសុខភាពពិភពលោក ចំពោះតម្រូវការនៃការចាក់ដូសជំរុញ ដែលមានគម្លាតចាប់ពី៣ខែឡើងទៅ ដើម្បីជំរុញ បង្កើន និងរក្សាភាពរឹងមាំ ព្រមទាំងទប់ទល់នឹងវីរុសកូវីដ-១៩ បំប្លែងថ្មីថែមទៀតផង។
រដ្ឋលេខាធិការក្រសួងសុខាភិបាលរូបនេះក៏បានបញ្ជាក់ទៀតថា ការឆ្លងវីរុសកូវីដ-១៩ គឺជាបញ្ហាសុខភាពសាធារណៈមួយ ដែលត្រូវតែមានការប្រុងប្រយ័ត្នខ្ពស់ ចៀសវាងការឆ្លងវីរុសកូវីដ-១៩ ដោយចូលរួមអនុវត្តវិធានការ «៣កុំ ៣ការពារ»។ លើសពីនេះ ស្ម័គ្រចិត្តទទួលយកការចាក់វ៉ាក់សាំងកូវីដ-១៩ ទាំងដូសមូលដ្ឋាន និងដូសជំរុញទី៣ ទី៤ និងទី៥ ដើម្បីគាំពារដល់សរីរាង្គកាយ ទប់ទល់ការវាយលុកធ្ងន់ធ្ងរនៃវីរុសកូវីដ-១៩ ជាពិសេសវីរុសបំប្លែងថ្មីប្រភេទ BA.4 និង BA.5។
ជាមួយគ្នានេះផងដែរ ក្រសួងសុខាភិបាល កាលពីម្សិលមិញ ក៏បានចេញសេចក្តីណែនាំក្រើនរម្លឹកទាក់ទងនឹងការបង្ការនៃជំងឺអុតស្វា ដែលចាប់តាំងពីថ្ងៃទី១ ខែមករា ឆ្នាំ២០២២ ដល់ថ្ងៃទី៧ ខែកក្កដា ឆ្នាំ២០២២។
របាយការណ៍អង្គការសុខភាពពិភពលោក បានបញ្ជាក់ពីករណីជំងឺអុតស្វា ចំនួន៧ ៨៩២ និងស្លាប់៣នាក់ ត្រូវបានរាយការណ៍ពីប្រទេសចំនួន៦៣ ក្នុងតំបន់៥ របស់អង្គការពិភពលោក រួមមាន តំបន់អាមេរិក អាហ្វ្រិក អឺរ៉ុប មេឌីទែរ៉ាណេខាងកើត និងអាស៊ីប៉ាស៊ីហ្វិកខាងលិច ដោយក្នុងនោះ ៩៨ភាគរយនៃករណីជំងឺនេះកើតមានពីថ្ងៃ១២ ខែឧសភា ឆ្នាំ២០២២។
ក្រសួងសុខាភិបាលឱ្យដឹងថា តាមការស៊ើបអង្កេតអេពីដេមីសាស្ត្រ ករណីជំងឺអុតស្វាដែលការរាយការណ៍ភាគច្រើន គឺតាមរយៈការប្រើប្រាស់សេវាសុខភាពផ្លូវភេទ (ចម្បងលើបុរសរួមភេទជាមួយបុរស ឬដៃគូច្រើន ពេលថ្មីៗនេះ) ឬសេវាសុខភាពផ្សេងទៀតនៅតាមគ្រឹះស្ថានថែទាំសុខភាពបឋម ឬមន្ទីរពេទ្យ ជាមួយនឹងប្រវត្តិនៃការធ្វើដំណើរទៅកាន់ប្រទេសដែលមានការឆ្លងរាតត្បាតនៃជំងឺនេះ។
ក្រសួងអះអាងថា គិតត្រឹមថ្ងៃទី៨ ខែកក្កដា ឆ្នាំ២០២២ កម្ពុជាពុំទាន់មានករណីជំងឺអុតស្វាបែបនេះនៅឡើយ ក៏ប៉ុន្តែរដ្ឋមន្ត្រីក្រសួងសុខាភិបាលអំពាវនាវឱ្យមានការប្រុងប្រយ័ត្នជាប់ជានិច្ច ទាំងជំងឺកូវីដ-១៩ និងជំងឺអុតស្វា គឺត្រូវអនុវត្តអនាម័យខ្លួនប្រាណ រស់នៅស្អាត សម្អាតជាមួយសាប៊ូ ឬជែលអាកុល និងអនុវត្តការការពារការចម្លងតាមផ្លូវដង្ហើម៕
