ប្រធាននិងសមាជិកនៃក្រុមប្រឹក្សាធម្មនុញ្ញ សម្រេចអនុម័តគាំទ្រដោយគ្មានសំឡេងជំទាស់ ដើម្បីស្នើថ្វាយព្រះមហាក្សត្របើកផ្លូវឱ្យរដ្ឋាភិបាលធ្វើវិសោធនកម្មមាត្រា និងច្បាប់ធម្មនុញ្ញបន្ថែម ចំនួន៨មាត្រា ដោយថា ការធ្វើវិសោធនកម្មនេះមិនធ្វើឱ្យប៉ះពាល់ដល់លទ្ធិប្រជាធិបតេយ្យសេរីពហុបក្សនៅកម្ពុជានោះទេ។
ការសម្រេចនេះធ្វើឡើងក្នុងកិច្ចប្រជុំពេញអង្គរបស់ក្រុមប្រឹក្សាធម្មនុញ្ញនៅព្រឹកថ្ងៃពុធនេះ ដែលបានអនុម័តគាំទ្រក្នុងសំឡេង ៩លើ៩ នៃសមាជិកស្ថាប័នកំពូលមួយនេះទាំងមូល ដើម្បីស្នើថ្វាយព្រះមហាក្សត្របើកផ្លូវឱ្យរដ្ឋាភិបាលធ្វើវិសោធនកម្មមាត្រានិងច្បាប់ធម្មនុញ្ញបន្ថែម។
អ្នកនាំពាក្យក្រុមប្រឹក្សាធម្មនុញ្ញ លោក ព្រហ្ម វិចិត្រអក្ខរា បានថ្លែងប្រាប់អ្នកសារព័ត៌មានបន្ទាប់ពីបិទបញ្ចប់ការប្រជុំពេញអង្គនាព្រឹកថ្ងៃពុធនេះថា ប្រធានក្រុមប្រឹក្សាធម្មនុញ្ញនិងសមាជិកសរុបចំនួន៩រូប បានបើកកិច្ចប្រជុំពេញអង្គ សម្រេចគាំទ្រ៩លើ៩សំឡេងនៃសមាជិកទាំងមូល ដើម្បីថ្វាយព្រះមហាក្សត្របើកផ្លូវឱ្យរដ្ឋាភិបាលធ្វើវិសោធនកម្មមាត្រាចំនួន៦ក្នុងរដ្ឋធម្មនុញ្ញ និងមាត្រាចំនួន២ក្នុងច្បាប់ធម្មនុញ្ញបន្ថែម។
អ្នកនាំពាក្យក្រុមប្រឹក្សាធម្មនុញ្ញរូបនេះបានឱ្យដឹងថា ការបើកផ្លូវឱ្យរដ្ឋាភិបាលធ្វើវិសោធនកម្មមាត្រាចំនួន៨ ក្នុងរដ្ឋធម្មនុញ្ញ និងច្បាប់ធម្មនុញ្ញបន្ថែម មិនធ្វើឱ្យប៉ះពាល់ដល់លទ្ធិប្រជាធិបតេយ្យសេរីពហុបក្ស ដូចមជ្ឈដ្ឋានមួយចំនួនលើកឡើងទេ។
លោកថ្លែងដូច្នេះថា៖ «ថ្វាយព្រះមហាក្សត្រថា ការធ្វើវិសោធនកម្មនេះ គឺអាចធ្វើទៅបាន ផ្អែកទៅលើមាត្រា១៥៣ថ្មី មាត្រា១៥៤ និង១៥៥ នៃរដ្ឋធម្មនុញ្ញ ដែលមាត្រាទាំងអស់នេះបានបញ្ញត្តិអំពីគោលការណ៍ ដែលថា រដ្ឋធម្មនុញ្ញមួយអាចធ្វើវិសោធនកម្មបាន គឺការធ្វើវិសោធនកម្មនេះមិនស្ថិតនៅក្នុងប្រទេសមានគ្រាអាសន្ន ហើយទី២ ការស្នើសុំធ្វើវិសោធនកម្មនេះមិនធ្វើឱ្យប៉ះពាល់ប្រព័ន្ធប្រជាធិបតេយ្យសេរីពហុបក្ស និងរបបរាជានិយមអាស្រ័យរដ្ឋធម្មនុញ្ញ»។
អ្នកនាំពាក្យដដែលបញ្ជាក់ថា មាត្រាដែលរដ្ឋាភិបាលបានស្នើសុំធ្វើវិសោធនកម្មមាត្រាចំនួន៦ ក្នុងរដ្ឋធម្មនុញ្ញ រួមមាន មាត្រា១៩ថ្មី(មួយ) មាត្រា៨៩ មាត្រា៩៨ មាត្រា១០២ថ្មី មាត្រា១១៩ថ្មី(មួយ) និងមាត្រា១២៥ថ្មី។ ចំណែកមាត្រាចំនួន២ក្នុងច្បាប់ធម្មនុញ្ញបន្ថែម រួមមាន មាត្រា៣ថ្មី និងមាត្រា៤ថ្មី។
លោក ព្រហ្ម វិចិត្រអក្ខរា បន្ថែមថា ក្រុមប្រឹក្សាធម្មនុញ្ញ នឹងថ្វាយព្រះមហាក្សត្រពាក់ព័ន្ធរឿងបើកផ្លូវឱ្យរដ្ឋាភិបាលធ្វើវិសោធនកម្មមាត្រាសរុបចំនួន៨ ក្នុងរដ្ឋធម្មនុញ្ញ និងច្បាប់ធម្មនុញ្ញបន្ថែម នាពេលឆាប់ៗខាងមុខនេះ។
យ៉ាងណា គិតចាប់តាំងពីការបង្កើតរដ្ឋធម្មនុញ្ញឡើងក្នុងឆ្នាំ១៩៩៣ រហូតមកដល់ពេលបច្ចុប្បន្ននេះ កម្ពុជាបានធ្វើវិសោធនកម្មរដ្ឋធម្មនុញ្ញចំនួន១០លើករួចមកហើយ ខណៈច្បាប់ធម្មនុញ្ញបន្ថែម ក៏ត្រូវយកមកធ្វើវិសោធនកម្មជាមួយគ្នាផងដែរ៕
