បន្ទាប់ពីទទួលបានករណីកម្មកររាប់សិបនាក់ស្នើសុំឱ្យមានការជួយសង្រ្គោះ និងតាមរយៈការឆ្មក់ចូលទៅក្នុងប្រព័ន្ធកុំព្យូទ័ររបស់ប្រតិបត្តិការឆបោកនានា អតីតចោរបច្ចេកវិទ្យា (Hacker) ល្បីឈ្មោះមួយរូប ដែលបច្ចុប្បន្នកំពុងតែធ្វើការឱ្យទីភ្នាក់ងារសន្តិសុខតាមប្រព័ន្ធអ៊ីនធឺណេត (Cyber Security) របស់រដ្ឋវៀតណាម បានអំពាវនាវឱ្យមានកិច្ចអន្តរាគមន៍ជាបន្ទាន់មួយ ដើម្បីជួយជនរងគ្រោះរាប់ពាន់នាក់ចេញពីទីតាំងខុសច្បាប់ទាំងឡាយក្នុងប្រទេសកម្ពុជា។
នៅក្នុងរបាយការណ៍មួយដែលចងក្រងដោយលោក Ngo Minh Hieu គេសង្កេតឃើញមានការចោទប្រកាន់ស្រដៀងគ្នាជាច្រើន ដែលត្រូវបានលើកឡើងដោយជនជាតិចិន ថៃ ម៉ាឡេស៊ី និងជនជាតិផ្សេងទៀត អំពីប្រតិបត្តិការឆបោកជាសកលដែលមានមូលដ្ឋាននៅក្នុងប្រទេសកម្ពុជា រួមទាំងករណីឃុំខ្លួន ទាសភាពបំណុល និងអំពើហិង្សាផងដែរ។
អស់រយៈពេលជាច្រើនខែ ពលករបរទេសជាច្រើនបានអះអាងថា ពួកគេត្រូវបានបញ្ចុះបញ្ចូលឱ្យមកកាន់ប្រទេសកម្ពុជា ហើយក្រោយមកក៏ត្រូវបានបង្ខាំងនៅក្នុងទីតាំងអាគារបិតជិតនានា និងបង្ខំឱ្យធ្វើការពាក់ព័ន្ធនឹងប្រតិបត្តិការឆបោកតាមប្រព័ន្ធអនឡាញជាសកល។
បើទោះបីជារដ្ឋាភិបាលបរទេសបានចេញការព្រមានជាបន្តបន្ទាប់ទាក់ទិននឹងស្ថានភាពនេះក្ដី ប៉ុន្តែប្រតិបត្តិការទាំងនេះនៅតែបន្តដំណើរការដោយមិនមានការភ័យខ្លាចអ្វីឡើយ។
យោងតាមរបាយការណ៍របស់លោក Ngo Minh Hieu ដែលបច្ចុប្បន្នជាអ្នកស្រាវជ្រាវសន្តិសុខតាមប្រព័ន្ធអ៊ីនធឺណេតដែលវីអូឌីទទួលបាន បានឱ្យដឹងថា ឯកសារបច្ចេកទេស និងផ្ទាល់ខ្លួនមួយចំនួនដែលត្រូវបានយកចេញពីខាងក្នុងប្រតិបត្តិការឆបោកនៅកម្ពុជា រួមមាន៖
- ព័ត៌មានអំពីកម្មករចំនួន ៣១នាក់ ដែលបានស្នើសុំឱ្យមានការជួយសង្រ្គោះ ដើម្បីត្រលប់ទៅកាន់ប្រទេសវៀតណាមវិញ ដែលក្នុងនោះ ២២នាក់ មានអត្តសញ្ញាណបណ្ណ រួមនឹងការឆ្លើយឆ្លងលម្អិតទាក់ទងនឹងទីតាំង និងការងាររបស់ពួកគេ។
- សារដែលមានចំនួនប្រមាណជា១៤ ០០០ ចេញពីក្រុមនានាក្នុងបណ្ដាញសង្គមតេឡេក្រាម (Telegram) របស់ប្រតិបត្តិការឆបោក ដែលត្រូវបានជជែកក្នុងអំឡុងរយៈពេលប្រមាណជាមួយខែ កាលពីពាក់កណ្តាលឆ្នាំមុន ដោយសារទាំងនោះមានទាំងការជជែកពិភាក្សាគ្នាអំពីកម្មករដែលរត់គេចខ្លួន ឯកសារវិនិយោគក្លែងក្លាយ ស្ថានភាពរបស់ជនរងគ្រោះ និងសកម្មភាពតូចៗប្រចាំថ្ងៃផងដែរ។
- ប្រព័ន្ធចូលទៅកាន់គេហទំព័រឆបោក កុំព្យូទ័រដែលប្រើប្រាស់នៅខាងក្នុងទីតាំងអាគារ និងការរក្សាទុកនៃកូដប្រភព ជាដើម។
- សំឡេង វីដេអូ និងការណែនាំជាលាយលក្ខណ៍អក្សរពីខាងក្នុងប្រតិបត្តិការ ដោយអ្នកគ្រប់គ្រងបានពិពណ៌នាសកម្មភាពឆបោករបស់ពួកគេថា ជាល្បែងវិនិយោគប្រាក់ងាយៗ។
ឯកសារភាគច្រើននៃរបាយការណ៍នេះ គឺមានកាលបរិច្ឆេទត្រឹមពាក់កណ្តាលឆ្នាំមុន ប៉ុន្តែមានមួយចំនួនតូចក៏មានកាលបរិច្ឆេទក្នុងខែមករាឆ្នាំនេះផងដែរ។
វីអូឌី បានព្យាយាមទាក់ទងទៅកាន់កម្មករឬសមាជិកគ្រួសាររបស់ពួកគេចំនួន១៧នាក់ដែលមានដាក់នៅក្នុងរបាយការណ៍។ ទោះជាយ៉ាងណា ពួកគេភាគច្រើនគឺមិនអាចទាក់ទងបាន ដោយមួយចំនួនទៀតបានបដិសេធក្នុងការធ្វើអត្ថាធិប្បាយ ដែលក្នុងនោះ របាយការណ៍អាចប្រមូលព័ត៌មានបានតែពីរប្រភពប៉ុណ្ណោះ ដែលលើកឡើងថា សាច់ញាតិរបស់ពួកគេនៅតែជាប់នៅក្នុងប្រទេសកម្ពុជា ហើយចង់ឱ្យមានការជួយសង្រ្គោះ។
ឯកសារដដែលនេះបានបង្ហាញពីឧក្រិដ្ឋកម្មនៅខាងក្នុងទីតាំងអាគារនានា ដែលរួមមាន ការជួញដូរ និងបង្ខាំងពលករបរទេសនៅក្នុងប្រទេសកម្ពុជា ដែលពួកគេទាំងនោះត្រូវបានបញ្ជាឱ្យប្រព្រឹត្តអំពើឆបោកលើប្រជាជននៅក្នុងប្រទេសកំណើតរបស់ពួកគេ។
ការឆបោកទាំងនេះត្រូវបានផ្សព្វផ្សាយក្រោមរូបភាពនៃការវិនិយោគក្លែងក្លាយ ដែលជំរុញឱ្យជនរងគ្រោះដាក់ប្រាក់បន្ថែមម្តងហើយម្តងទៀតរហូតដល់អស់ពីខ្លួន។
ការសន្ទនាផ្ទៃក្នុង
យោងតាមលោក Ngo Minh Hieu បានឱ្យដឹងថា រូបលោកបានទទួលសារបន្ទាន់មួយពីជនជាតិវៀតណាមម្នាក់ដែលជាប់នៅក្នុងប្រទេសកម្ពុជា កាលពីចុងខែមិថុនាឆ្នាំមុន។ បុរសរូបនេះបានប្រាប់លោក Hieu ថាខ្លួនត្រូវបានចាញ់បោកតាមរយៈការផ្សព្វផ្សាយការងារដែលសន្យាផ្ដល់ប្រាក់ខែខ្ពស់ក្នុងប្រទេសកម្ពុជា។ តាមរយៈផែនទីទីតាំង GPS ភ្ជាប់ទៅនឹងការផ្សាយពាណិជ្ជកម្ម និងរូបថតដែលផ្ដល់ជូន ទីតាំងទាំងនោះត្រូវបានស្គាល់ថាជាកាស៊ីណូ«ម៉ុកបាយ» ក្រុងបាវិត។
ខណៈបុរសរូបនេះប្រមូលព័ត៌មានផ្ដល់ជូនលោក Hieu ខ្លួនក៏បានលួចថតការប្រជុំមួយនៅក្នុងប្រតិបត្តិការឈ្មោះថា Vant6 និងផ្តល់លេខសម្ងាត់ ដើម្បីអាចចូលទៅមើលសារចាស់ៗក្នុងក្រុម Telegram ដែលត្រូវបានប្រើទាំងខាងក្នុង និងសម្រាប់ការឆបោក។
លោក Hieu បានបន្តឱ្យដឹងនៅក្នុងរបាយការណ៍របស់ខ្លួនថា៖ «បុរសរូបនោះមានកិច្ចសហការល្អជាមួយខ្ញុំខ្លាំងណាស់ ដោយក្នុងនោះ គាត់ក៏បានផ្ដល់ជាលេខសម្ងាត់ ដើម្បីអាចឱ្យខ្ញុំចូលទៅក្នុងប្រព័ន្ធកុំព្យូទ័រដែលគាត់កំពុងធ្វើការទៀតផង។ ដូច្នេះ ខ្ញុំអាចតាមដាននិងប្រមូលទិន្នន័យទាំងអស់ដែលត្រូវការសម្រាប់ការស៊ើបអង្កេតបន្ថែមទៀត»។
តាមរយៈការពិនិត្យមើលប្រវត្តិសារក្នុងក្រុមតេឡេក្រាម ចេញពីខាងក្នុងប្រតិបត្តិការ Vant6 បង្ហាញថា អ្នកឆបោកនានាកំពុងតែស្វែងរកគោលដៅយ៉ាងសកម្មក្នុងប្រទេសវៀតណាម ដើម្បីផ្សព្វផ្សាយពីការវិនិយោគក្លែងក្លាយ ដែលក្នុងនោះរួមមានទាំងការពន្យល់ និងការព្រមានអំពីចំណាត់ការដែលនឹងត្រូវអនុវត្តលើបុគ្គលិកដែលរត់គេចខ្លួនផងដែរ។
នៅក្នុងសារដដែលនោះ សមាជិកក្នុងក្រុមម្នាក់បានសរសេរនៅម៉ោងជាង១១យប់ ដោយលើកឡើងពីជោគជ័យក្នុងសកម្មភាពឆបោករបស់ខ្លួនថា៖ «សូមអរគុណអ្នកទាំងអស់គ្នាដែលបានជួយខ្ញុំបង្កើតវិក្កយបត្រក្លែងក្លាយ យើងបោកបានហើយ មានតែអ្នកបង្កើតវិក្កយបត្រក្លែងក្លាយទេ ទើបដឹង»។
បន្ទាប់មកទៀត នៅម៉ោងជិត២ទៀបភ្លឺ សមាជិកក្នុងក្រុមម្នាក់ទៀតដាក់ឈ្មោះថា Ruby ដែលហាក់បីដូចជាមានតួនាទីរាយការណ៍ជាប្រចាំអំពីប្រតិបត្តិការប្រចាំថ្ងៃ ក៏បានដាក់ជាសារមួយថា៖ «សូមអ្នកទាំងអស់គ្នាកុំបារម្ភអី។ លោក Hoang ត្រូវបានជាប់ឃុំរយៈពេល២សប្តាហ៍ ហើយឥលូវវនេះត្រូវបានបញ្ជូនត្រលប់ទៅប្រទេសវៀតណាមវិញហើយ»។
សារនោះបន្តទៀតថា៖ «គ្មានអ្នកណាធ្វើបាបគាត់ទេ គឺគ្រាន់តែចង់ដាក់ទណ្ឌកម្មលើទង្វើដែលគាត់បានព្យាយាមរត់ចេញតែប៉ុណ្ណោះ។ ក្រុមហ៊ុនមានច្បាប់ផ្ទាល់ខ្លួន។ ប្រសិនបើអ្នករាល់គ្នាធ្វើរឿងត្រឹមត្រូវ នោះករណីនេះមិនកើតឡើងឡើយ។ ខ្ញុំដាក់សារនេះ ដោយសារតែខ្លាចអ្នករាល់គ្នាអាចនឹងបារម្ភពីគាត់»។
ទាក់ទិននឹងករណីនេះ បុគ្គលិកមួយរូបក៏បានធ្វើការឆ្លើយតបដោយបង្ហាញជាក្តីបារម្ភថា៖ «ក្រុមហ៊ុនគឺដឹកនាំដោយមនុស្ស មិនមែនសត្វឡើយ។ ពួកគេមិនគួរដាក់ទោសធ្ងន់ធ្ងរលើបុគ្គលិកណាឡើយ»។
ទោះជាយ៉ាងណា គណនីឈ្មោះ Ruby បានព្យាយាមបង្វែរស្ថានការណ៍ដោយថា៖ «រូបគាត់ត្រូវបានគេចាប់បានក្នុងករណីនេះ ហើយរងនូវទណ្ឌកម្មបន្តិចបន្តួច តែមិនធ្ងន់ធ្ងរ [ដល់ថ្នាក់បែកឈាម] ឡើយ»។
ការងារជាអ្នកឆបោក
ឯកសារបានបង្ហាញថា ការឆបោកដ៏សកម្មរបស់ប្រតិបត្តិការ Vant6 នៅពេលនោះ គឺដាក់គោលដៅក្នុងការទាក់ទាញជនជាតិវៀតណាមឱ្យចូលទៅក្នុងវេទិកាវិនិយោគក្លែងក្លាយ ដោយអ្នកឆបោក ហៅថា «ជាល្បែងវិនិយោគប្រាក់ងាយៗ»។
អ្នកឆបោកធ្វើការជាក្រុម ដោយប្រមូលជនរងគ្រោះនានាដាក់ចូលទៅក្នុងការជជែកជាក្រុមៗ ក្រោមការដឹកនាំដោយគ្រូបង្គោលមួយរូបដែលមានតួនាទីក្នុងការបញ្ចុះបញ្ចូលឱ្យជនរងគ្រោះចូលរួមការវិនិយោគក្លែងក្លាយរបស់ក្រុមហ៊ុន។
យោងតាមក្រុមមួយដែលដាក់ឈ្មោះថា “គន្លឹះដើម្បីជោគជ័យក្នុងឆ្នាំ២០២១ (The Key to Success 2021)” បានចាប់ផ្ដើមកិច្ចសន្ទនាដោយដាក់ថា៖ «សួស្ដីអ្នកទាំងអស់គ្នា ដែលជាអ្នកវិនិយោគនៅក្នុងក្រុមនេះ»។
សមាជិកនៅក្នុងក្រុមផ្សេងទៀតបានឆ្លើយតបថា៖ «ខ្ញុំជាសមាជិកថ្មី។»
គណនីផ្សេងទៀតក៏បានដាក់ក្នុងក្រុមថា៖ «តើអ្នករាល់គ្នាបានញ៉ាំបាយហើយឬនៅ?»
សមាជិកក្នុងក្រុមមួយរូបទៀតបានដាក់ទៀតថា៖ «ខ្ញុំក៏ជាសមាជិកថ្មីដែរ សួស្តីអ្នកទាំងអស់គ្នា!»
បន្ទាប់មក គ្រូបង្គោលក៏បានពន្យល់ថា ប្រាក់ចំណូលនៃការវិនិយោគទាំងអស់នឹងត្រូវប្រកាស៣ដងក្នុងមួយថ្ងៃ ពោលគឺនៅម៉ោង៣ៈ៣០រសៀល, ៧ៈ៣០យប់ និង ៩:៣០យប់ ដោយនឹងត្រូវអនុវត្តចាប់ពីថ្ងៃស្អែកតទៅ។
នៅម៉ោង៣:៣០រសៀល ថ្ងៃបន្ទាប់ គ្រូបង្គោលក៏បានដាក់ក្រាហ្វិកដែលបង្ហាញពីការកើនឡើងនៃការវិនិយោគដូចអ្វីដែលបានសន្យា។
គ្រូបង្គោលនៅពេលនោះបន្តថា៖ «ចូរអ្នករាល់គ្នាធ្វើការគណនា»។
សកម្មភាពនេះបានបន្តអស់រយៈពេលជាច្រើនថ្ងៃ ដែលសមាជិកទាំងឡាយក្នុងក្រុមហាក់សកម្មក្នុងការប្រកួតប្រជែងគ្នាពីការកើនប្រាក់ចំណេញនៅក្នុងវេទិកាវិនិយោគ Vant6 ។
ឈានចូលមកដល់ពាក់កណ្តាលខែកក្កដា អ្នកប្រើប្រាស់ម្នាក់ស្រាប់តែចាប់ផ្ដើមលើកឡើងពីគោលបំណងក្នុងការដកប្រាក់មួយចំនួន ដែលបានកើនឡើងដោយថា៖ «សម្រាប់ការដកលើកទី២ និងលើកទី៣ តើវាមានចំនួនសរុបជាង៥លានមែនទេ?»
យោងតាមលោក Hieu វិធីសាស្រ្តដែលអ្នកឆបោកប្រើប្រាស់ដើម្បីស្វែងរកអតិថិជន [ជនរងគ្រោះ] ថ្មី រួមមាន ការបង្កើតគណនីប្រព័ន្ធផ្សព្វផ្សាយសង្គមក្លែងក្លាយ ដើម្បីបញ្ជូនសារដោយផ្ទាល់ទៅកាន់អ្នកប្រើប្រាស់អំពីការស្វែងរកប្រាក់ងាយស្រួល ឬការបង្ហោះផ្សាយពាណិជ្ជកម្មតាមប្រព័ន្ធអនឡាញ ដើម្បីទាក់ទាញមនុស្សឱ្យចូលរួមជាមួយក្រុមប្រព័ន្ធផ្សព្វផ្សាយសង្គមក្លែងក្លាយ ដែលពួកគេនឹងត្រូវបានលើកទឹកចិត្តឱ្យចូលរួមការវិនិយោគ។
ការឆបោកជាទូទៅទាំងនោះ រួមមាន ការផ្សព្វផ្សាយអំពីការបណ្ដាក់ទុនដោយប្រើដើមទុនទាប ហើយទទួលបានផលត្រលប់មកវិញខ្ពស់។ បន្ទាប់មក ជនរងគ្រោះក៏ត្រូវបានជំរុញឱ្យវិនិយោគប្រាក់បន្ថែមទៀត ហើយត្រូវបានបញ្ចុះបញ្ចូលតាមរយៈការបង្ហាញពីប្រាក់ចំណេញដ៏ច្រើននៅលើប្រព័ន្ធអនឡាញ។ ទោះជាយ៉ាងណា ដើម្បីដកប្រាក់ចំណូលរបស់ពួកគេ គឺពួកគេតម្រូវឱ្យធ្វើការបង់ប្រាក់បន្ថែមទៀតជាបន្តបន្ទាប់។
យោងតាមសារមួយបានឱ្យដឹងថា៖ «បន្ទាប់ពីទទួលបានប្រាក់គ្រប់ចំនួនទាំងអស់ហើយ បោះពួកគេចោលទៅ។ ប្រសិនបើអតិថិជនមិនមានសមត្ថភាពលេងតទៅទៀត ដកពួកគេចេញទៅ»។
សារដដែលនេះបន្តថា៖ «ដើម្បីបង្កើតទំនុកចិត្តជាមួយអតិថិជន ចូរបញ្ចុះបញ្ចូលពួកគេឱ្យចូលរួមជាមួយក្រុមរបស់យើង»។
ជាមួយគ្នានេះ អ្នកឆបោកក៏មានតួនាទីក្នុងការបង្អួតពីប្រាក់ចំណូលរបស់ពួកគេ និងតាំងខ្លួនជាមនុស្សជោគជ័យ តាមរយៈការដាក់រូបភាពក្នុងប្រព័ន្ធផ្សព្វផ្សាយសង្គមរបស់ពួកគេ ដែលរួមមានការដាក់រូបពាក់អាវធំ ដើម្បីទាក់ទាញជនរងគ្រោះឱ្យដាក់ប្រាក់បន្ថែមទៀតដោយទំនុកចិត្ត ជាដើម។
ជនរងគ្រោះពីការឆបោក
នៅក្នុងការជជែកក្នុងក្រុមតេឡេក្រាមផ្ទៃក្នុង បុគ្គលិកឆបោកក៏បានចែករំលែកការសន្ទនារវាងពួកគេជាមួយជនរងគ្រោះផងដែរ។
ការសន្ទនាមួយបង្ហាញថា ជនរងគ្រោះម្នាក់ត្រូវបានដកចេញពីគណនីរបស់ខ្លួន បន្ទាប់ពីដាក់ប្រាក់ចំនួន២០លានដុង [ស្មើនឹងប្រមាណ៨៥០ដុល្លារអាមេរិក]។ អ្នកឆបោកបានប្រាប់ជនរងគ្រោះថា ពួកគេអាចរកបានប្រាក់ចំនួន៣០០លានដុង [ស្មើនឹងប្រមាណ១៣ ០០០ដុល្លារអាមេរិក] តាមរយៈការវិនិយោគ ប៉ុន្តែពួកគេមិនអាចចូលទៅយកវាបានឡើយ លុះត្រាតែពួកគេបង់ថ្លៃសេវាបន្ថែមទៀត។
តាមរយៈការសន្ទនាមួយផ្សេងទៀត ក្នុងនោះ ជនរងគ្រោះបានសួរគ្រូបង្គោលត្រលប់ទៅវិញ អំពីថ្លៃសេវា [ដើម្បីបើកប្រាក់ដែលទទួលបានពីការវិនិយោគ]។
ជនរងគ្រោះនៅពេលនោះបានចោទជាសំណួរថា៖ «តើយើងត្រូវបង់ថ្លៃសេវាអ្វីផ្សេងទៀតទេ ក្រៅពីថ្លៃ ៥% នេះ ដើម្បីឱ្យលុយចូលក្នុងគណនីរបស់ខ្ញុំបានដោយផ្ទាល់?»
គ្រូបង្គោលបានធ្វើការឆ្លើយតបថា៖ «គ្មានទេ! គឺវាមានតម្លៃសេវាតែមួយនេះគត់។ ដើរមកដល់ចំណុចនេះហើយ តើអ្នកគិតថាខ្ញុំនឹងបោកប្រាស់អ្នកមែនទេ?»
ការបញ្ចុះបញ្ចូលពីខាងភាគីឆបោកនៅតែបន្តធ្វើឡើង បើទោះបីជាជនរងគ្រោះហាក់ដឹងពីសកម្មភាពនេះក្ដី។
ជនរងគ្រោះម្នាក់លើកឡើងថា៖ «អ្នកបោកពីមនុស្សម្នាក់ទៅមនុស្សម្នាក់ផ្សេងទៀតជាច្រើន អ្នករាល់គ្នាគឺសុទ្ធសឹងតែជាមនុស្សបោកប្រាស់ ព្រះមានភ្នែក មិនយូរ មិនឆាប់ អ្នកនឹងត្រូវរងនូវវិធានការតាមផ្លូវច្បាប់ជាក់ជាមិនខាន»។
នៅពេលនោះ អ្នកឆបោកមួយរូបក៏ស្រាប់តែឆ្លើយតបយ៉ាងខ្លីថា៖ «ស្រឡាញ់អ្នក»។
ជនរងគ្រោះបានតបដោយប្រើពាក្យសម្ដីធ្ងន់ៗវិញថា៖ «អ្នកស្រឡាញ់ខ្ញុំ ប៉ុន្តែអ្នកធ្វើឱ្យខ្ញុំឈឺចាប់រហូតដល់ថ្នាក់ខ្ញុំរកតែខោមួយស្លៀកគ្មាន»។
ទាក់ទិននឹងករណីនេះ ភាពអស់សង្ឃឹមក៏កើតមានឡើងជាបន្តបន្ទាប់ក្នុងចំណោមជនរងគ្រោះទាំងឡាយនៅក្នុងក្រុម ខណៈសមាជិកម្នាក់បានផ្ញើរូបថតកង់របស់ខ្លួនមួយ ដោយនិយាយថា វាជាទ្រព្យសម្បត្តិចុងក្រោយរបស់ខ្លួនដែលនៅសល់។
ជនរងគ្រោះមួយរូបទៀតលើកឡើងថា៖ «ខ្ញុំសុំប្រាប់អ្នកទៅចុះថា ខ្ញុំជិតដាច់ពោះស្លាប់ហើយ»។
ជនរងគ្រោះម្នាក់ទៀតថ្លែងថា៖ «ខ្ញុំនឹងមិនលើកលែងឱ្យអ្នកឡើយ អ្នកយកពីខ្ញុំមួយដុង អ្នកនឹងទទួលកម្មពារវិញជាច្រើន។ ខ្ញុំនឹងមិនលងត្រឹមតែអ្នកទេ ខ្ញុំក៏នឹងលងបន្លាចដល់គ្រួសាររបស់អ្នកផងដែរ។ អ្នកបោកប្រាស់ខ្ញុំ អ្នកបានអានអ្វីដែលខ្ញុំបានលើកឡើងតាំងពីដើមមកហើយ។ ខ្ញុំមិននិយាយច្រើនជាមួយអ្នកទៀតទេ។ អ្នកត្រូវតែទទួលយកកម្មពារនេះ។ រៀងរាល់យប់ អ្នកនឹងឃើញខ្ញុំ។ ប្រយ័ត្នខ្លួនទៅ»។
បើទោះបីជាស្ថានការណ៍ហាក់មានភាពតានតឹងក្ដី អ្នកឆបោកនៅតែបន្តព្យាយាមស្ដារស្ថានការណ៍ឱ្យមានភាពប្រសើរឡើងវិញក្នុងចំណោមក្រុមរបស់ពួកគេ។
អ្នកឆបោកមួយរូបបានលើកឡើងទៅកាន់ក្រុមរបស់ខ្លួនថា៖ «តែថ្ងៃនេះជាថ្ងៃអ្វីទៅ? ហេតុអ្វីបានជាអតិថិជនខឹងសម្បាលើយើងខ្លាំងម៉្លេះ?»
ក្រុមការងារឆបោកមួយរូបទៀតក៏ស្រាប់តែបន្ថែមថា៖ «ណ្ហើយចុះ ទ្រាំទៅ! ថ្ងៃសៅរ៍យើងហូបសាច់គោម្ដង ដើម្បីឱ្យមានកម្លាំងបន្តកិច្ចការងារទៀត។ [អតិថិជន] ជេរខ្ញុំខ្លាំងណាស់ ប៉ុន្តែខ្ញុំមិនស្ដាប់ឡើយ»។
មានពេលមួយ សមាជិកមួយរូបក៏ធ្លាប់ប្រាប់បុគ្គលិករបស់ខ្លួនឱ្យឈប់រញ៉េរញ៉ៃនៅក្នុងការជជែកជាក្រុម ហើយផ្តោតលើតែផលចំណេញបានហើយ។
ជនរងគ្រោះពីការជួញដូរ
កាលពីមួយខែកន្លងទៅ បុរសនៅក្នុងប្រទេសវៀតណាមមួយរូបបានរៀបរាប់អំពីករណីកូនប្រុសរបស់ខ្លួនដែលត្រូវបានគេបង្ខំឱ្យធ្វើការងារឆបោកប្រាស់នៅក្នុងអាគារមួយកន្លែងក្នុងប្រទេសកម្ពុជា។
កូនប្រុសរបស់បុរសរូបនេះក៏ធ្លាប់បានទាក់ទងមកកាន់លោក Hieu ដើម្បីស្នើសុំការជួយសង្រ្គោះកាលពីឆ្នាំមុនផងដែរ។ ទោះជាយ៉ាងណា គិតរហូតមកដល់ពេលនេះ បុរសដែលជាឪពុកបានអះអាងថា កូនប្រុសរបស់គាត់នៅតែត្រូវបានគេបង្ខាំង បើទោះបីជាលោកបានព្យាយាមរកជំនួយពីអាជ្ញាធរវៀតណាមយ៉ាងណាក៏ដោយ។
បុរសដែលសុំមិនបញ្ចេញឈ្មោះរូបនេះបានប្រាប់វីអូឌីថា៖ «កូនប្រុសរបស់ខ្ញុំបានប្រាប់ខ្ញុំថា គាត់ធ្លាប់ត្រូវបានគេវាយដំពីរបីលើក ហើយក្នុងករណីខ្លះទៀត អ្នកដែលស្នាក់នៅបន្ទប់ជាមួយគាត់ ក៏ធ្លាប់ត្រូវបានគេឆក់ដោយចរន្តអគ្គិសនីផងដែរ»។
បុរសរូបនេះបន្ថែមថា កូនប្រុសរបស់ខ្លួនទទួលបានការងារតាមរយៈប្រព័ន្ធអនឡាញ ដើម្បីទៅធ្វើការនៅកាស៊ីណូមួយ ដោយនៅពេលនោះ គឺគេ [ក្រុមហ៊ុន] មិនតម្រូវឱ្យបំពេញឯកសារអ្វីទាំងអស់ មុនពេលទៅកាន់ព្រំដែនកម្ពុជា កាលពីដើមឆ្នាំមុន។
ប្រភពដដែលបន្ថែមថា នៅពេលដែលកូនប្រុសរបស់លោកទៅដល់ទីតាំង ខ្លួនក៏ឃើញអ្នកស្នាក់នៅរួមបន្ទប់នានាបានយំស្រែកដោយប្រាប់ថាពួកគេត្រូវបានចាញ់បោក។
លោកបន្តថា កូនរបស់លោកនឹងត្រូវដាក់ឱ្យស្ថិតក្រោមការត្រួតពិនិត្យជាប់លាប់ និងបង្ខំឱ្យធ្វើការងារឆបោកផងដែរ។
លោកថា៖ «មានពេលខ្លះ គេឱ្យគាត់ចេញទៅដើរនៅតាមចិញ្ចើមផ្លូវបន្តិចបន្តួចដែរ ប៉ុន្តែភាគច្រើនគឺគេតម្រូវឱ្យស្នាក់នៅក្នុងបន្ទប់ដែលមានការយាមកាមខ្ពស់»។
ទាក់ទិននឹងករណីនេះ លោកបន្ថែមថា៖ «[ដោយសារតែមានករណីនេះកើតឡើង] ខ្ញុំបានប្រាប់ដល់អ្នកភូមិខ្ញុំកុំឱ្យជឿជាក់លើអ្នកណាម្នាក់លើហ្វេសប៊ុកឱ្យសោះ»។
ករណីនេះ គឺស្រដៀងគ្នាទៅនឹងករណីជាច្រើនផ្សេងទៀតដែលបានលើកឡើងដោយកម្មករបរទេសដែលប្រឈមមុខនឹងការឃុំខ្លួន និងទាសភាពបំណុលនៅកម្ពុជា ខណៈពួកគេជាច្រើន រួមទាំងជនរងគ្រោះដោយការជួញដូរមិនគ្រប់អាយុមួយចំនួនផងដែរនោះ បានអះអាងដូចៗគ្នាថា ពួកគេត្រូវបានគេបង្ខាំងឱ្យនៅក្នុងបរិវេណអាគារ និងបង្ខំឱ្យធ្វើការដែលខ្លួនមិនចង់ធ្វើ។
គួរបញ្ជាក់ថា ករណីជួញដូរជនជាតិវៀតណាមទាំងឡាយមកកាន់កម្ពុជានេះ ក៏ទាញចំណាប់អារម្មណ៍យ៉ាងខ្លាំងពីសំណាក់អាជ្ញាធរវៀតណាមផងដែរ។ កាលពីពេលថ្មីៗនេះ រដ្ឋាភិបាលរបស់ប្រទេសមួយនេះក៏បានប្រើប្រាស់ទំព័រហ្វេសប៊ុកផ្លូវការរបស់ខ្លួន ដើម្បីធ្វើការព្រមានដល់ពលរដ្ឋរបស់ពួកគេឱ្យមានការប្រុងប្រយ័ត្ន ទាក់ទងនឹងការផ្សាយពាណិជ្ជកម្មការងារដែលសន្យាផ្ដល់ប្រាក់ខែខ្ពស់នៅលើប្រព័ន្ធផ្សព្វផ្សាយសង្គមនៅកម្ពុជាផងដែរ។
ប្រភពដដែលបន្ថែមថា ជនរងគ្រោះភាគច្រើនមានអាយុមានចាប់ពី១៨ទៅ៣៥ឆ្នាំ ដោយពួកគេត្រូវបានគេបង្ខំឱ្យធ្វើការពី១២ទៅ១៦ម៉ោងក្នុងមួយថ្ងៃ។ គ្រួសារមួយចំនួនត្រូវបានគេ [ក្រុមហ៊ុន] ស្នើឱ្យបង់ប្រាក់ចន្លោះពី៣ ០០០ទៅ៣០ ០០០ដុល្លារ ជាថ្នូរដើម្បីសង្គ្រោះសាច់ញាតិរបស់ពួកគេ។
ក្នុងរយៈពេល៦ខែដើមឆ្នាំនេះ អាជ្ញាធរកម្ពុជា និងវៀតណាម ក៏បានជួយសង្គ្រោះជនជាតិវៀតណាមសរុបចំនួន២៥០នាក់ចេញពីប្រតិបត្តិការឆបោកនានាផងដែរ។ ទោះជាយ៉ាងណា យោងតាមសេចក្តីថ្លែងការណ៍បានបញ្ជាក់ថា ការជួញដូរនិងកេងប្រវ័ញ្ចពលកម្មពលរដ្ឋវៀតណាមនៅកម្ពុជា នៅតែបន្តកើតមានឡើង។
កាលពីចុងខែមិថុនាកន្លងទៅ ជនជាតិវៀតណាម ជាមេខ្លោងចំនួន៧នាក់ក៏ត្រូវបានចាប់ខ្លួននៅខេត្ត Dong Nai ភាគខាងត្បូងប្រទេសវៀតណាមផងដែរ ពីបទ «ជួញដូរ និងរត់ការធ្វើចំណាកស្រុកពលរដ្ឋវៀតណាមចំនួន២០០នាក់ដោយខុសច្បាប់មកកម្ពុជា»។
យោងតាមសមត្ថកិច្ចវៀតណាមដែលស្រង់ព័ត៌មានចេញពីប្រភពនៃអង្គការប្រឆាំងការជួញដូរមនុស្សក្នុងប្រទេសវៀតណាមមួយ បានឱ្យដឹងថា ទាំងអ្នកជួញដូរ និងជនរងគ្រោះ គឺមកពីខេត្តផ្សេងៗក្នុងប្រទេសវៀតណាម។
ទាក់ទិននឹងករណីនេះ លោក Hieu ដែលជាអ្នកស្រាវជ្រាវមួយរូបក៏បានចែករំលែកពីការទំនាក់ទំនងរបស់លោកជាមួយជនរងគ្រោះពីការជួញដូរផងដែរ ដែលក្នុងនោះ លោកថា បុរសមួយរូបមានបំណង់ចង់ផ្តល់ព័ត៌មាន និងស្វែងរកវិធីគេចចេញពីទីតាំង ប៉ុន្តែមានការភ័យខ្លាចចំពោះអ្វីដែលអាចនឹងកើតឡើងលើខ្លួន ប្រសិនបើក្រុមហ៊ុនដឹង។
ជនរងគ្រោះរូបនោះបានឱ្យដឹងតាមរយៈសារមកកាន់លោក Hieu ថា៖ «ខ្ញុំត្រូវតែត្រលប់ទៅវិញ។ បើសិនជាសន្តិសុខដឹង ខ្ញុំនឹងត្រូវរងពិន័យជាក់ជាមិនខាន ដែលអាចនឹងស្លាប់បាត់បង់ជីវិតក៏ថាបាន»។
ជនរងគ្រោះរូបនេះក៏បានផ្ញើរូបថត និងទីតាំងផែនទី GPS ពីខាងក្នុងអាគារ ដែលមានដូចជាតំបន់ការិយាល័យ និងទិដ្ឋភាពពីបង្អួចដែលបង្ហាញយ៉ាងច្បាស់ថា វាជាអាគារ Kaibo (KB) តំបន់ឆៃណាថោន ក្នុងសង្កាត់លេខ៤ ក្រុងព្រះសីហនុ។
ជនរងគ្រោះដដែលនេះបានប្រាប់បន្ថែមទៅលោក Hieu ថា៖ «សូមលុបឆាតនេះចោលផង។ បើពុំដូច្នោះទេ ខ្ញុំអាចនឹងស្លាប់»។
តាមរយៈសារជាសំឡេង បុរសជាជនរងគ្រោះរូបនេះបន្តថា ក្នុងប្លុកស្នាក់នៅរបស់គាត់ គឺមានមនុស្សប្រមាណជា៩៥នាក់មកពីតំបន់ផ្សេងៗគ្នា ដែលរូបគាត់ក៏ត្រូវបានគេប្រាប់ថា បើគាត់បំពេញការងារមិនបានល្អ គាត់នឹងត្រូវលក់ចេញបន្តទៅកាន់ទីតាំងផ្សេងទៀត។
ប្រភពដដែលបន្ថែមថា៖ «ខ្ញុំមិនត្រូវបានអនុញ្ញាតឱ្យចេញទៅខាងក្រៅអាគារឡើយ»។
ទាក់ទិននឹងករណីនេះ លោក Hieu បានសង្កត់ធ្ងន់ថា៖ «យើងត្រូវតែជួយសង្គ្រោះប្រជាជនវៀតណាមរបស់យើងទាំងអស់»។
លោកបន្ថែមថា៖ «ខ្ញុំជឿជាក់ថា កិច្ចអន្តរាគមន៍បន្ទាន់ គឺពិតជាមានសារៈសំខាន់ខ្លាំងណាស់នៅពេលនេះ ដោយសារតែជនរងគ្រោះរាប់ពាន់នាក់កំពុងតែរងទុក្ខវេទនា»។
កម្មករដែលត្រូវបានបង្ខាំងសម្រាប់ប្រតិបត្តិការឆបោកក្នុងប្រទេសកម្ពុជា បានចែករំលែករូបថតកន្លែងធ្វើការរបស់ពួកគេជាមួយលោក Ngo Minh Hieu ដែលជាអតីតHackerវៀតណាម។
ស្ថានការណ៍ធ្ងន់ធ្ងរ
លោក Hieu បានអះអាងប្រាប់វីអូឌីកាលពីសប្ដាហ៍មុនថា ប្រតិបត្តិការឆបោកមិនមានការថមថយនោះទេ ចាប់តាំងពីគាត់បានធ្វើបច្ចុប្បន្នភាពរបាយការណ៍ចុងក្រោយនេះ។
លោកថា៖ «ស្ថានភាពនេះ គឺកាន់តែអាក្រក់ទៅៗពីមួយថ្ងៃទៅមួយថ្ងៃ ខណៈជនរងគ្រោះកាន់តែច្រើនកំពុងតែត្រូវបានគេនាំយកមកកម្ពុជា»។
លោកបន្ថែមថា របាយការណ៍នេះត្រូវបានធ្វើសម្រាប់ទីភ្នាក់ងាររបស់លោក គឺមជ្ឈមណ្ឌលសន្តិសុខតាមប្រព័ន្ធអ៊ីនធឺណេតជាតិរបស់វៀតណាម ដែលបានយកចិត្តទុកដាក់ខ្ពស់លើករណីនេះ និងកំពុងព្យាយាមជួយសង្គ្រោះជនរងគ្រោះទាំងឡាយ។
ទោះជាយ៉ាងណា លោកថា៖ «វាពិតជាលំបាកណាស់ ដោយសារតែកន្លែងគ្រោះថ្នាក់ទាំងនោះនៅក្នុងប្រទេសកម្ពុជា ត្រូវបានគ្រប់គ្រងដោយ [ឧក្រិដ្ឋជន] ជនជាតិចិន»។
ទាក់ទិននឹងករណីនេះ លោកបន្ថែមដោយសង្ឃឹមថា ប្រព័ន្ធផ្សព្វផ្សាយនឹងអាចជួយរំដោះជនរងគ្រោះពីការជួញដូរ និងលុបបំបាត់ប្រតិបត្តិការឆបោកនៅកម្ពុជាបាន។
យោងតាមឯកសារផ្សេងទៀតដែលចងក្រងដោយលោក Hieu ក្នុងនោះគេសង្កេតឃើញមាន៖
- រូបថតនៃប្រតិបត្តិការហិរញ្ញវត្ថុ និងកំណត់ត្រារបស់បុគ្គលិកដែលព្យាយាមទាក់ទងទៅកាន់លេខទូរសព្ទវៀតណាមរាប់ពាន់លេខ។
- ព័ត៌មានលម្អិតនៃគណនីធនាគារវៀតណាមជាង៥០ដែលអះអាងថាត្រូវបានភ្ជាប់ទៅកាន់ប្រតិបត្តិការ។
- ការផ្សាយពាណិជ្ជកម្មការងារ និងការសន្ទនាអំពីការជ្រើសរើសបុគ្គលិក ដែលក្នុងនោះ ភ្នាក់ងារសន្យាថានឹងផ្ដល់ការធ្វើដំណើរមកកម្ពុជា អាហារ កន្លែងស្នាក់នៅ ប្រាក់ខែ និងអត្ថប្រយោជន៍ផ្សេងទៀតដល់បុគ្គលិក។
- វីដេអូ និងរូបភាពជាច្រើននៃអំពើហិង្សាដែលទទួលបានពីប្រព័ន្ធផ្សព្វផ្សាយសង្គម។
ក្នុងករណីមួយចំនួន ក្រុមការងារឆបោកបានត្អូញត្អែរអំពីបញ្ហាអនាម័យក្នុងបង្គន់ ការដេកស្រមុកដែលបង្កជាការរំខានដល់អ្នកដទៃ និងការបញ្ជាទិញអាហារពេលល្ងាចពិសេសមួយពេលសម្រាប់មនុស្ស១២០នាក់ ដែលចំណាយប្រាក់សរុបអស់២ ៥០០ដុល្លារផងដែរ។
បុរសម្នាក់ផ្សេងទៀតដែលប្រើឈ្មោះ Tony ក៏បានផ្ញើរូបថតនារីម្នាក់ភ្ជាប់ជាមួយសារជាសំឡេង ដែលថា នារីរូបនេះបានចាកចេញពីក្រុមហ៊ុន ហើយចាប់ផ្ដើមចែករំលែកការដាក់ពិន័យរបស់ក្រុមហ៊ុនលើខ្លួន។
ប្រភពដដែលបន្តថា ស្រ្ដីរូបនេះត្រូវបានគេចាប់បានថាកំពុងប្រើប្រាស់គ្រឿងញៀន ដែលនោះហើយជាមូលហេតុដែលនាងមិនត្រូវបានអនុញ្ញាតឱ្យបន្តធ្វើការនៅក្នុងក្រុមហ៊ុន។
បន្ទាប់មក បុរសដែលប្រើឈ្មោះ Tony នេះ ក៏បានប្រើវិធីសាស្រ្តក្នុងការណែនាំឱ្យអ្នកគ្រប់គ្នានៅក្នុងក្រុមបង្កើតគណនីក្លែងក្លាយនៅលើប្រព័ន្ធផ្សព្វផ្សាយសង្គម ដើម្បីចែករំលែករូបភាពរបស់នាងកាន់ថ្នាំញៀនមួយកញ្ចប់តូច។
អ្នកផ្សេងទៀតនៅក្នុងក្រុម ក៏បានចែករំលែករូបភាពលិខិតឆ្លងដែន និងអត្តសញ្ញាណបណ្ណរបស់នាង ហើយបង្កើតរូបភាពថ្លុកដោយប្រើរូបថតរបស់នាងផងដែរ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Whitehat Hacker Infiltrates Cambodian Operations
