ក្រសួងសុខាភិបាលណែនាំដល់ប្រជាពលរដ្ឋពីវិធានការមួយចំនួនក្នុងការត្រៀមនិងឆ្លើយតបនៅពេលមានគ្រោះទឹកជំនន់ ខណៈការប្រែប្រួលអាកាសធាតុបានបង្កឱ្យកើតមានជាញឹកញាប់នូវគ្រោះធម្មជាតិ ដូចជា ខ្យល់កន្ត្រាក់ គ្រោះទឹកជំនន់ និងគ្រោះរាំងស្ងួត ជាដើម។
សេចក្តីណែនាំរបស់ក្រសួងសុខាភិបាល ចុះថ្ងៃទី១៥ ខែកក្កដា ឆ្នាំ២០២២នេះ បានលើកឡើងថា ការប្រែប្រួលអាកាសធាតុបានធ្វើឱ្យមានការផ្លាស់ប្តូររដូវកាល និងបង្កឱ្យកើតមានជាញឹកញាប់នូវគ្រោះធម្មជាតិ រលកកម្តៅ ផ្គររន្ទះ ខ្យល់ព្យុះ ខ្យល់កន្ត្រាក់ គ្រោះទឹកជំនន់ និងគ្រោះរាំងស្ងួត ជាដើម ដែលគ្រោះមហន្តរាយទាំងនោះបានបង្កឱ្យខូចខាតហេដ្ឋារចនាសម្ព័ន្ធ ទ្រព្យសម្បតិ្ត លំនៅ និងប៉ះពាល់ដល់សុខភាព និងអាយុជីវិតរបស់ប្រជាពលរដ្ឋ។
ក្រសួងបន្តថា ដើម្បីកាត់បន្ថយឱ្យបានជាអតិបរមានូវផលប៉ះពាល់សុខភាព អាយុជីវិតជនរងគ្រោះ និងមូលដ្ឋានសុខាភិបាលពីគ្រោះធម្មជាតិ ជាពិសេសគ្រោះទឹកជំនន់ដែលអាចកើតមាននាពេលខាងមុខ ក្រសួងអំពាវនាវដល់ប្រជាពលរដ្ឋទាំងអស់ត្រូវចួលរួមអនុវត្តវិធានការមួយចំនួនសម្រាប់មុនពេលទឹកជំនន់ អំឡុងពេលទឹកជំនន់ និងក្រោយពេលទឹកជំនន់។
ក្រសួងសុខាភិបាលបានបញ្ជាក់ថា នៅមុនពេលមានទឹកជំនន់ ប្រជាពលរដ្ឋត្រូវតាមដានពីស្ថានភាពទឹកជំនន់ឱ្យបានទៀងទាត់ ក្នុងនោះ ត្រូវត្រៀមរកទីទួលដែលមានសុវត្ថិភាព ក៏ដូចជាការបម្រុងទុកនូវស្បៀងអាហារ ជាពិសេសត្រូវធ្វើរបងព័ទ្ធជុំវិញស្រះ និងសាងសង់បង្គន់ឱ្យបានខ្ពស់ ដើម្បីការពារទឹកជំនន់។
នៅអំឡុងពេលមានទឹកជំនន់ ក្រសួងបានណែនាំដល់ប្រជាពលរដ្ឋមិនត្រូវចូលទៅក្នុងផ្ទះចាស់ឬអាគារទ្រុឌទ្រោមដែលអាចបាក់ស្រុតបង្កឱ្យមានគ្រោះថ្នាក់ ត្រូវសម្រាកក្នុងមុង ត្រូវធ្វើអនាម័យខ្លួនប្រាណជាប្រចាំ និងមិនត្រូវប៉ះពាល់គ្រឿងប្រើប្រាស់អគ្គិសនីដោយដៃសើមឬកំពុងឈរនៅក្នុងទឹកឡើយ។ ក្រៅពីនោះ ក្រសួងក៏បានណែនាំឱ្យតាមដានសុខភាពសម្រាប់ស្ត្រីមានផ្ទៃពោះ នាំកុមារទៅចាក់ថ្នាំបង្ការ និងផ្តល់អាហារដល់ពួកគេឱ្យបានគ្រប់គ្រាន់ និងត្រូវប្រុងប្រយ័ត្នចំពោះកុមារី និងក្មេងស្រី នៅទីទួលសុវត្ថិភាព ក្រែងលោមានអំពើហិង្សាផ្លូវភេទ រួមនឹងវិធានការមួយចំនួនទៀត។
ដោយឡែក ក្រោយពេលទឹកជំនន់ ក្រសួងណែនាំឱ្យបន្តបរិភោគចំណីអាហារស្អាត ទឹកស្អាត អនាម័យខ្លួនប្រាណ និងត្រូវបន្តសម្រាកក្នុងមុង ដើម្បីការពារជំងឺគ្រុនឈាម និងជំងឺផ្សេងៗ ព្រមទាំងត្រូវពិនិត្យមើលផ្ទះក្រែងមានបាក់ស្រុតនាំឱ្យមានគ្រោះថ្នាក់ ជាដើម។
ក្រសួងសុខាភិបាលបានគូសបញ្ជាក់ថា ប្រសិនបើមានបញ្ហាសុខភាព ទាំងមុនពេល ក្នុងពេល និងក្រោយពេលទឹកជំនន់ ត្រូវស្វែងរកការពិគ្រោះពិនិត្យ និងព្យាបាលជំងឺជាបន្ទាន់ នៅប៉ុស្តិ៍សុខភាពក្បែរទីទួលសុវត្ថិភាព ឬមណ្ឌលសុខភាព ឬមន្ទីរពេទ្យដែលនៅជិតបំផុត។
ក្រៅពីនោះ ក្រសួងក៏បានណែនាំដល់រដ្ឋបាលថ្នាក់ក្រោមជាតិ ត្រូវត្រៀមលក្ខណៈរួចជាស្រេចនូវឱសថ បរិក្ខារពេទ្យ សេរ៉ូមប្រឆាំងពិសពស់ សម្រាប់ជួយអន្តរាគមន៍ ព្រមទាំងត្រូវត្រៀមក្រុមគ្រូពេទ្យចល័ត ដើម្បីជួយពិនិត្យព្យាបាលជំងឺជូនប្រជាពលរដ្ឋដែលរងគ្រោះ៕