ក្រសួងសុខាភិបាលណែនាំដល់អាជ្ញាធរខេត្តជាប់ព្រំដែនគោក និងព្រំដែនទឹកជាមួយប្រទេសថៃ ឡាវ និងវៀតណាម ពង្រឹងវិធានការទប់ស្កាត់កូវីដ-១៩ ទៅលើពលករដែលមិនបានចាក់ ឬចាក់វ៉ាក់សាំងដូសមូលដ្ឋានមិនទាន់បានពេញលេញ ដោយតម្រូវឱ្យមានការធ្វើតេស្តរហ័សដោយពុំបង់ប្រាក់។
សេចក្ដីប្រកាសរបស់ក្រសួងសុខាភិបាលចុះថ្ងៃទី១៤ ខែកក្កដា ឆ្នាំ២០២២ ឱ្យដឹងថា នៅថ្ងៃទី៨ ខែកក្កដា ឆ្នាំ២០២២ មណ្ឌលចត្តាឡីស័កនៅតាមខេត្តជាប់ព្រំដែន ត្រូវបានបិទដំណើរការ ក្រោយពីមានការកែសម្រួលលក្ខខណ្ឌមិនតម្រូវឱ្យធ្វើចត្តាឡីស័ក ចំពោះអ្នកដំណើរមកពីបរទេសដែលពុំទាន់បានចាក់ ឬបានចាក់វ៉ាក់សាំងកូវីដ-១៩ដូសមូលដ្ឋានមិនទាន់ពេញលេញ។
ដើម្បីកាត់បន្ថយហានិភ័យនៃការចម្លងវីរុសកូវីដ-១៩ប្រភេទថ្មីៗនាំចូលពីបរទេស ក្រសួងបានណែនាំដល់អាជ្ញាធរខេត្តជាប់ព្រំដែន អនុវត្តវិធានការសុខាភិបាលចំពោះអ្នកដំណើរជាប្រជាជនឬពលករខ្មែរដែលចូលមកកម្ពុជា តាមច្រកព្រំដែនគោក និងព្រំដែនទឹកនៃប្រទេសថៃ ឡាវ និងវៀតណាម ដែលមិនទាន់បានចាក់ ឬចាក់មិនគ្រប់ដូសមូលដ្ឋាន ដោយតម្រូវឱ្យធ្វើតេស្តរហ័សដោយពុំបង់ប្រាក់។
ក្រសួងសុខាភិបាលបន្តថា ក្នុងករណីទទួលលទ្ធផលវិជ្ជមាន ហើយប្រសិនបើគ្មានរោគសញ្ញា ឬជាករណីស្រាល ត្រូវបានអនុញ្ញាតឱ្យសម្រាកនៅតាមផ្ទះសម្រាប់អ្នកមានលំនៅឋានសមរម្យ ឬត្រូវបានព្យាបាលនៅសណ្ឋាគារ ឬផ្ទះសំណាក់ បើសាម៉ីជនមានលទ្ធភាព និងបំណង ដោយមានការឯកភាពពីអាជ្ញាធរមូលដ្ឋាន ហើយរាល់ការចំណាយជាបន្ទុករបស់បុគ្គលសាម៉ី និងត្រូវអនុវត្តនូវវិធានការ «៣កុំ ៣ការពារ» ព្រមទាំងតាមដានសុខភាពឱ្យបានខ្ជាប់ខ្ជួន ស្របតាមនីតិវិធីប្រតិបត្តិស្ដង់ដារសម្រាប់គ្រប់គ្រង ថែទាំ និងព្យបាលអ្នកជំងឺកូវីដ-១៩ នៅតាមផ្ទះ។
មួយវិញទៀត ក្រសួងថា ប្រសិនជាមានរោគសញ្ញាធ្ងន់ធ្ងរ អាជ្ញាធរសុខាភិបាលត្រូវដាក់អ្នកជំងឺកូវីដ-១៩ឱ្យសម្រាកព្យាបាលនៅមន្ទីរពេទ្យ ក្រោមការតាមដានយ៉ាងហ្មត់ចត់ពីសំណាក់គ្រូពេទ្យ។
បើតាមរបាយការណ៍ប្រចាំថ្ងៃរបស់ក្រសួងសុខាភិបាល គិតត្រឹមព្រឹកថ្ងៃព្រហស្បតិ៍ម្សិលមិញនេះ កម្ពុជាបានរកឃើញអ្នកឆ្លងជំងឺកូវីដ-១៩ សរុបចំនួន ១៣៦ ៤០៧នាក់ ក្នុងនោះជាសះស្បើយ ១៣៣ ២៦៧នាក់ និងស្លាប់ចំនួន ៣ ០៥៦នាក់៕