អ្នកនាំពាក្យសភាស្រីលង្កាបានរាយការណ៍ថា លោកប្រធានាធិបតីស្រីលង្កា Gotabaya Rajapaksa បានដាក់លិខិតលាលែងពីតំណែងហើយ កាលពីថ្ងៃព្រហស្បតិ៍ម្សិលមិញ តែប៉ុន្មានម៉ោងបន្ទាប់ពីបានភៀសខ្លួនទៅកាន់ប្រទេសសិង្ហបុរី និងបន្ទាប់ពីមានបាតុកម្មទ្រង់ទ្រាយធំចំពោះវិបត្តិសេដ្ឋកិច្ចធ្ងន់ធ្ងរ។
សារព័ត៌មាន Reuters បានស្រង់សម្តីអ្នកនាំពាក្យសភាស្រីលង្កាមកចុះផ្សាយថា សេចក្តីប្រកាសអំពីការលាលែងពីតំណែងរបស់ប្រធានាធិបតីរូបនេះ បានធ្វើឱ្យមានភាពសប្បាយរីករាយនៅក្នុងរដ្ឋធានីកូឡុំបូ ជាកន្លែងដែលក្រុមអ្នកតវ៉ាបានប្រមូលផ្តុំគ្នានៅខាងក្រៅការិយាល័យប្រធានាធិបតី ដោយប្រឆាំងនឹងបម្រាមគោចរដែលត្រូវបានដាក់ចេញ។
ហ្វូងបាតុករបានបាញ់កាំជ្រួច ស្រែកហ៊ោកញ្ជ្រៀវ និងរាំយ៉ាងសប្បាយរីករាយ នៅទីលានបាតុកម្ម Gota Go Gama និងបានចំអកឱ្យលោកប្រធានាធិបតី Rajapaksa។
យោងតាមសម្តីរបស់សកម្មជនម្នាក់ឈ្មោះ Damitha Abeyrathne បាននិយាយថា៖ «ប្រទេសទាំងមូលនឹងអបអរសាទរនៅថ្ងៃនេះ […] វាជាជ័យជម្នះដ៏ធំមួយ»។
លោកស្រីបានបន្ថែមថា៖ «យើងមិនដែលគិតថា យើងអាចរំដោះប្រទេសនេះចេញពីពួកគេឡើយ [សំដៅលើក្រុមគ្រួសាររបស់លោកប្រធាធិបតី Rajapaksa ដែលបានគ្រប់គ្រងប្រទេសនេះអស់រយៈពេល២ទសវត្សរ៍មកហើយ]»។
លោកប្រធានាធិបតី Rajapaksa បានដាក់លិខិតលាលែងពីតំណែងតាមរយៈសារអ៊ីម៉ែល កាលពីល្ងាចថ្ងៃព្រហស្បតិ៍ ហើយលិខិតនោះនឹងចូលជាធរមាននៅថ្ងៃសុក្រនេះ នៅពេលដែលលិខិតនោះត្រូវបានផ្ទៀងផ្ទាត់តាមផ្លូវច្បាប់។ នេះបើតាមសម្តីរបស់អ្នកនាំពាក្យរដ្ឋាភិបាល។
យោងតាមសម្តីអ្នកដែលដឹងពីស្ថានភាពនេះ លោក Rajapaksa បានភៀសខ្លួនទៅកាន់ប្រទេសម៉ាល់ឌីវ កាលពីថ្ងៃពុធ បន្ទាប់មកធ្វើដំណើរទៅកាន់ប្រទេសសិង្ហបុរី នៅថ្ងៃព្រហស្បតិ៍ តាមជើងហោះហើររបស់ក្រុមហ៊ុនអាកាសចរណ៍អារ៉ាប៊ីសាអូឌីត។
ក្រសួងការបរទេសសិង្ហបុរី បានរាយការណ៍ថា លោកប្រធានាធិបតី Rajapaksa បានចូលក្នុងប្រទេសសិង្ហបុរី ក្នុងដំណើរទស្សនកិច្ចឯកជនប៉ុណ្ណោះ ហើយមិនបានសុំសិទ្ធិជ្រកកោនឡើយ។
គួរបញ្ជាក់ថា កាលពីថ្ងៃពុធ លោកប្រធានាធិបតី Rajapaksa បានសម្រេចតែងតាំងលោកនាយករដ្ឋមន្ត្រី Ranil Wickremesinghe ជាប្រធានាធិបតីស្តីទី ដែលបង្កឱ្យមានការតវ៉ាកាន់តែខ្លាំងឡើង ដោយក្រុមបាតុកររាប់ម៉ឺននាក់បានប្រមូលផ្តុំគ្នានៅមុខសភា និងការិយាល័យនាយករដ្ឋមន្ត្រី ទាមទារឱ្យលោកនាយករដ្ឋមន្រ្តីចុះចេញពីតំណែងផងដែរ។
លោក Malik Perera អាយុ២៩ឆ្នាំ ជាអ្នកបើករ៉ឺម៉កកង់បីដែលចូលរួមក្នុងការតវ៉ានៅមុខសភា បាននិយាយកាលពីថ្ងៃព្រហស្បតិ៍ថា៖ «យើងចង់ឱ្យលោកនាយករដ្ឋមន្រ្តី Ranil ចុះចេញពីតំណែង។ ពួកគេបានលក់ប្រទេសនេះ យើងចង់បានមេដឹកនាំល្អ។ បើរើសមិនបានមេដឹកនាំល្អ យើងមិនឈប់ឡើយ»៕