បក្ស​កាន់​អំណាច​៖​ ​ឯកភាព​ផ្ទៃ​ក្នុង​បក្ស​រឹង​មាំ​ ​​ធ្វើ​ឱ្យ​​ក្រុម​ប្រឆាំង​​ប៉ុន​ប៉ង​បំផ្លាញ​ការ​ដឹកនាំ​គណបក្ស​បរាជ័យ​

ទិដ្ឋភាពក្បួនហែគណបក្សប្រជាជនកម្ពុជា ក្នុងថ្ងៃបិទបញ្ចប់នៃយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥ នៅរាជធានីភ្នំពេញ នាព្រឹកថ្ងៃទី០៣ ខែមិថុនា ឆ្នាំ២០២២។ (ហ៊ាន រង្ស៊ី)

គណបក្សកាន់អំណាចអះអាងថា ​សាមគ្គីភាព និងឯកភាពផ្ទៃក្នុងបក្សរបស់ខ្លួនរឹងមាំ​ បានធ្វើឱ្យ​ឧបាយកលក្រុមប្រឆាំងជ្រុលនិយម ដែលប៉ុនប៉ងបំផ្លាញដល់ដំណើរការដឹកនាំរបស់គណបក្ស​ប្រជាជនកម្ពុជាត្រូវបានបរាជ័យ។

ក្នុងសុន្ទរកថា កម្រាស់៣ទំព័រសម្រាប់បើកសន្និបាតគណៈកម្មាធិការកណ្តាលវិសាមញ្ញនៅថ្ងៃសៅរិ៍ និងថ្ងៃអាទិត្យ ដែលត្រូវនឹងថ្ងៃទី១៦ និង១៧ខែកក្កដានេះ គណប្សប្រជាជនកម្ពុជាបានអះអាងថា លទ្ធផលនៃការអនុវត្តនូវទិសដៅ គោលការណ៍ គោលនយោបាយ សេចក្តីណែនាំ និងសេចក្តីសម្រេចចិត្តនានារបស់ថ្នាក់កណ្តាល ធ្វើឱ្យថ្នាក់ដឹកនាំគណបក្សលេចធ្លោទាំងក្នុងនិងក្រៅប្រទេស។

ដោយឡែក ជោគជ័យត្រចះត្រចង់លើការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥​  កាលពីថ្ងៃទី៥ ខែមិថុនា ឆ្នាំ២០២២ថ្មីៗនេះ បញ្ជាក់ថា គណបក្សប្រជាជនកម្ពុជានៅតែត្រូវការតួនាទីគណបក្សនេះបន្តដឹកនាំកម្ពុជាឆ្ពោះទៅកាន់នាវា​សម្បូររុងរឿង និងវិបុលភាព។

ក្នុងសុន្ទរកថាដដែល បញ្ជាក់បន្ថែមថា គណបក្សកាន់អំណាចនេះ ទទួលបានជ័យជម្នះ និងសមិទ្ធផល ឬស្នាដៃដែលសម្រេចបានលើគ្រប់ផ្នែក គ្រប់វិស័យ  ដោយសារគណបក្សមានភាពត្រឹមត្រូវខាងនយោបាយ។ លើសពីនេះ មានសាមគ្គីភាព ឯកភាពផ្ទៃក្នុងរឹងមាំ ទើបជម្នះបាននូវការលំបាកទាំងឡាយ ពិសេសធ្វើឱ្យក្រុមពួកបក្សប្រឆាំងបរាជ័យ។

លិខិតសន្ទរកថាគណបក្សប្រជាជនកម្ពុជាលើកឡើងថា៖ «ប៉ុន្តែដោយសារគណបក្សមានភាពត្រឹមត្រូវខាងនយោបាយ​ មានការគាំទ្រពីប្រជាជន មានរចនាសម្ព័ន្ធចាត់តាំងរឹងមាំ មានធនធានមនុស្សប្រកបដោយគុណធម៌ និងសមត្ថភាព មានសាមគ្គីភាព ឯកភាពផ្ទៃក្នុងរឹងមាំ និងមានរបៀបរបបធ្វើការត្រឹមត្រូវ  ទើបជម្នះបាននូវការលំបាកទាំងឡាយ ​ ជាពិសេសធ្វើឱ្យបរាជ័យនូវរាល់ឧបាយកលរបស់ពួកប្រឆាំងជ្រុលនិយម ដែលតែងយកជើងរាទឹក និងប៉ុនប៉ងបំផ្លាញដល់ដំណើរការដឹកនាំរបស់គណបក្សប្រជាជនកម្ពុជា»។

វីអូឌី មិនអាចសុំការបំភ្លឺបន្ថែមពីអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅរសៀលថ្ងៃសៅរិ៍នេះ។

យ៉ាងណា សម្រាប់អ្នកនាំពាក្យគណបក្សភ្លើងទៀន លោក ថាច់ សេដ្ឋា ចាត់ទុកការលើកឡើងរបស់គណបក្សកាន់អំណាច ដែលចោទក្រុមអ្នកប្រឆាំងប៉ុនប៉ងបំផ្លាញការដឹកនាំគណបក្សប្រជាជននោះ មិនស្របតាមគោលការណ៍ប្រជាធិបតេយ្យនោះទេ។

លោកមានប្រសាសន៍ថា៖ «បើបក្សកាន់អំណាចគិតថា មានក្រុមប្រឆាំងការដឹកនាំរបស់ខ្លួន មិនត្រឹមត្រូវទេ។ នៅក្នុងរដ្ឋធម្មនុញ្ញ ប្រទេសកម្ពុជាប្រកាន់យករបបលទ្ធិប្រជាធិបតេយ្យសេរីពហុបក្ស។ ដូច្នេះត្រូវចាត់ទុកគណបក្សប្រឆាំងជាអ្នកប្រកួតប្រជែងស្របតាមគោលការណ៍ប្រជាធិបតេយ្យ ទើបធ្វើឱ្យប្រទេសជាតិរីកចម្រើន»។

លោកបន្ថែមថា ៖ «គណបក្សប្រឆាំងធ្វើការរិះគន់ចំណុចខ្វះខាតរបស់រដ្ឋាភិបាល ដើម្បីស្ថាបនា មិនមែនមកចោទគេយកជើងរាលទឹករាលអីទេ។ ទោះបីគណបក្សណាដឹកនាំ ក៏គេប្រកួតប្រជែងធ្វើម៉េចឱ្យការដឹកនាំប្រទេសរីកចម្រើនដូចគ្នា។   បើភាសាដែល[គណបក្សកាន់អំណាច]លើកឡើង ជាភាសារបស់ប្រទេសប្រកាន់យករបបកុម្មុយនីស្ត និងមិនមែនប្រទេសប្រកាន់លទ្ធិប្រជាធិបតេយ្យនោះទេ»។

មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា សង្កេតឃើញថា ការដឹកនាំបែបប្រជាធិបតេយ្យ ជៀសមិនផុតពីការរិះគន់នូវចំណុចខ្វះខាតនោះទេ ជាពិសេសពលរដ្ឋ រងនូវភាពអយុត្តិធម៌សង្គម  ដែលមិនទទួលបានយុត្តិធម៌ជាដើម។

ករណីនេះ លោកជំរុញទៅរដ្ឋាភិបាលគួរតែដឹកនាំប្រទេសឱ្យស្របតាមគោលការណ៍ប្រជាធិបតេយ្យ ដោយមិនគួរចាត់ទុកគណបក្សប្រឆាំងជាសត្រូវនោះទេ ទើបធ្វើឱ្យប្រទេសជាតិរីកចម្រើនទាន់សម័យទំនើប។

លោកមានប្រសាសន៍ថា៖ «នៅពេលថ្នាក់ដឹកនាំទទួលបានអំណាច និងតួនាទីគ្រប់គ្រងរដ្ឋាភិបាល  ត្រូវយកតួនាទីដោះស្រាយជូនពលរដ្ឋ     បំរើរាស្ត្រដោយមិនប្រកាន់និន្នការនយោបាយ។ សំឡេងភាគតិចគេមានសិទ្ធិរិះគន់ ហើយអ្នកដែលមានឥទ្ធិពល មានអំណាចដឹកនាំរដ្ឋ ត្រូវដោះស្រាយបញ្ហាជូនប្រជាពលរដ្ឋឱ្យស្មើភាពគ្នា ទើបប្រទេសជាតិរីកចម្រើន»។

កាលពីខែតុលា ឆ្នាំ២០២១ អង្គការគម្រោងយុត្តិធម៌ពិភពលោក (WJP) បានចេញរបាយការណ៍មួយដោយបានផ្ដល់ចំណាត់ថ្នាក់ជាប្រទេសមាន​នីតិរដ្ឋទាបបំផុត ដោយទទួលបានលេខ១៣៨ ក្នុងចំណោមប្រទេសចំនួន១៣៩ លើពិភពលោក។ ចំណាត់ថ្នាក់នេះបង្ហាញថា សន្ទស្សន៍នីតិរដ្ឋកម្ពុជា គឺល្អ​ជាងប្រទេសវ៉េណេស៊ុយអេឡាតែមួយប៉ុណ្ណោះ។​

ការផ្ដល់ចំណាត់ថ្នាក់នេះ គឺធ្វើឡើងតាមរយៈការសិក្សានិងវាយតម្លៃដោយផ្អែកលើសូចនាករ ៨ចំណុច រួមមាន ដែនកំ​ណត់អំណាច​រដ្ឋាភិបា​ល ការលុប​បំបាត់អំពើ​ពុក​រលួយ រដ្ឋាភិបាល​បើកទូលាយ សិទ្ធិ​ជាមូលដ្ឋាន សណ្ដាប់ធ្នាប់​និងសន្តិសុ​ខ ការអ​នុវត្តបទប្បញ្ញត្តិ យុ​ត្តិធម៌ស៊ីវិល និងយុត្តិធម៌​ព្រហ្ម​ទណ្ឌ។

ក្រៅពីទទួលបានចំណាត់ថ្នាក់ទាបបំផុតរឿងនីតិរដ្ឋនេះ ​រដ្ឋាភិបាលក្រោមការដឹកនាំរបស់គណបក្សកាន់អំណាច កម្ពុជាក៏ត្រូវបានគេវាយតម្លៃថា ជាប្រទេសមានអំពើពុករលួយខ្លាំងក្នុងតំបន់ផងដែរ។  ​

ជាក់ស្តែង ​ក្នុងរបាយការណ៍របស់អង្គការតម្លាភាពអន្តរជាតិ (TI) ដែលមានមូលដ្ឋាននៅទីក្រុងប៊ែរឡាំង ប្រទេសអាល្លឺម៉ង់ ចេញផ្សាយនៅថ្ងៃទី២៥ ខែមករា កន្លងទៅបង្ហាញថា  កម្ពុជាទទួលបាន ២៣ពិន្ទុ លើពិន្ទុ១០០ នៅក្នុងសន្ទស្សន៍​អំពើពុករលួយ​ប្រចាំឆ្នាំ២០២១ ដែលស្ថិតនៅចំណាត់ថ្នាក់ទី១៥៧ លើ១៨០ប្រទេស និងដែនដី។

ចំណាត់ថ្នាក់នេះ បង្ហាញថា អំពើពុករលួយនៅកម្ពុជាអាក្រក់ជាងគេនៅក្នុងតំបន់អាស៊ីអាគ្នេយ៍ឬអាស៊ាន និងជាចំណាក់ថ្នាក់ទាបបំផុតទី៣ នៅក្នុងតំបន់អាស៊ីប៉ាស៊ីហ្វិក៕

ចែករំលែកព័ត៌មាន
រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

ចុះឈ្មោះទទួលព្រឹត្តិបត្រព័ត៌មានវីអូឌី
តាមដានព័ត៌មាន វីអូឌី

VODEnglish.news

VODEnglish.news

Everybody Well-Informed, Everybody Empowered