មន្ត្រីជាន់ខ្ពស់គណបក្សភ្លើងទៀន បានហៅសកម្មភាពក្រុមជនដៃដល់ដែលបានប្រើអំពើហិង្សា ទៅលើសកម្មជនបក្សប្រឆាំងនេះមួយរូបនៅរាជធានីភ្នំពេញ បណ្តាលឱ្យរងរបួសធ្ងន់ធ្ងរថា ជាការគំរាមកំហែងផ្នែកនយោបាយ។
ការអះអាងនេះ ក្រោយពេលអនុប្រធានក្រុមការងារគណបក្សភ្លើងទៀន ខណ្ឌពោធិ៍សែនជ័យ លោក លន់ ពង្សធិរិទ្ធ ត្រូវបានក្រុមជនល្មើសជិះម៉ូតូវាយត្រង់ក្បាលឱ្យរបួសធ្ងន់ នៅក្បែរទីស្នាក់ការគណបក្សភ្លើងទៀនខណ្ឌ ស្របពេលលោកជិះម៉ូតូទៅចូលរួមប្រជុំគណបក្សនៅថ្ងៃទី១៧ ខែកក្កដា។
អ្នកនាំពាក្យគណបក្សភ្លើងទៀន លោក ថាច់ សេដ្ឋា មានប្រសាសន៍ថា នៅម៉ោងប្រមាណ ៨ព្រឹក មានក្រុមជនដៃដល់ប្រហែល៦នាក់ ជិះម៉ូតូ៣គ្រឿង។ ក្នុងចំណោម៦នាក់នោះ មានម្នាក់បានលោតចុះពីម៉ូតូដោយដៃកាន់កាំបិត តាមកាប់ លោក លន់ ពង្សធិរិទ្ធ ដែលជាសកម្មជនគណបក្សភ្លើងទៀននៅរាជធានីភ្នំពេញ បណ្តាលឱ្យរងរបួសចំក្បាលធ្ងន់ធ្ងរ ខណៈជនរងគ្រោះកំពុងសម្រាកព្យាបាលនៅមន្ទីរពេទ្យឯកជនមួយ។
លោក ថាច់ សេដ្ឋា ចាត់ទុកការបង្កហិង្សាលើសកម្មជនបក្សភ្លើងទៀនថា ជាការគំរាមកំហែងផ្នែកនយោបាយ ខណៈការបោះឆ្នោតថ្នាក់ជាតិកាន់តែខិតជិតមកដល់ ។ ករណីនេះ លោកអំពាវនាវទៅសមត្ថកិច្ចចាប់ជនល្មើស និងអ្នកនៅពីក្រោយខ្នងយកមកផ្តន្ទាទោសតាមច្បាប់ ដើម្បីផ្តល់យុត្តិធម៌ដល់ជនរងគ្រោះ និងដើម្បីកុំឱ្យមានរឿងបែបនេះកើតឡើងបន្តទៀត។
លោកអំពាវនាវដូចនេះថា៖ «សូមអំពាវនាវទៅស្ថាប័នពាក់ព័ន្ធទាំងអស់ជាពិសេសក្រសួងមហាផ្ទៃធ្វើការស៊ើបអង្កេតតាមចាប់ខ្លួនក្រុមជនដៃដល់ និងអ្នកនៅពីក្រោយយកមកផ្តន្ទាទោស ដើម្បីមានការទុកចិត្តដល់ប្រជាពលរដ្ឋផង ហើយជៀសវាងអំពើហិង្សានយោបាយមុនការបោះឆ្នោតផង»។
អ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា មានប្រសាសន៍ថា អំពើហិង្សាដែលកើតឡើងទៅលើសកម្មជនគណបក្សភ្លើងទៀននៅខណ្ឌពោធិ៍សែនជ័យ រាជធានីភ្នំពេញនោះ សមត្ថកិច្ចកំពុងស្រាវជ្រាវរកជនល្មើស និងប្រមូលភស្តុតាង ។ ប៉ុន្តែលោកស្នើទៅជនរងគ្រោះ ឱ្យសហការជាមួយសមត្ថកិច្ច ដើម្បីងាយស្រួលចាប់ជនល្មើសយកមកផ្តន្ទាទោសតាមច្បាប់។
លោកមានប្រសាសន៍ថា៖ «យើងសុំឱ្យមានការសហការជាមួយជនរងគ្រោះ ដើម្បីធ្វើការសាកសួរបន្ថែមថា តើមានពាក់ព័ន្ធនឹងករណីអ្វីខ្លះ? តើរឿងហ្នឹងកើតឡើងដោយសារតែគំនុំ ឬអ្វីផ្សេងៗ? តែយើងសុំឱ្យមានការសហការជាមួយជនរងគ្រោះ ហើយសមត្ថកិច្ចក៏ចុះដល់ទីតាំងសួរសាក្សី និងពិនិត្យមើលកាមេរ៉ា»។
មន្ត្រីស៊ើបអង្កេតជាន់ខ្ពស់នៅសមាគមអាដហុក លោក ស៊ឹង សែនករុណា សង្កេតឃើញថា អំពើហិង្សាកើតលើសកម្មជនបក្សប្រឆាំងច្រើនដងមកហើយ ប៉ុន្តែជនល្មើសមិនត្រូវបានចាប់យកមកផ្តន្ទាទោសនោះទេ។
ករណីនេះ លោកយល់ថា ប្រសិនបើសមត្ថកិច្ចនៅតែមិនអាចស្វែងរកចាប់ជនល្មើសយកមកផ្តន្ទាទោសតាមច្បាប់បានទៀត រដ្ឋាភិបាលនឹងរងការរិះគន់ពីមជ្ឈដ្ឋានជាតិ និងអន្តរជាតិ ជុំវិញដំណើរការលទ្ធិប្រជាធិបតេយ្យនៅកម្ពុជាដើរថយក្រោយ ដោយសារតែមានការគំរាមកំហែងផ្នែកនយោបាយកើតឡើង។
លោកមានប្រសាសន៍ថា៖ «បើសិនជាមិនចាត់វិធានការលើជនល្មើស អាចមានការចោទប្រកាន់ផ្សេងៗទៅលើការគំរាមកំហែងផ្នែកនយោបាយ ហើយធ្វើឱ្យដំណើរការប្រជាធិបតេយ្យនៅប្រទេសយើងរងការរិះគន់បន្តទៀតហើយ »។
កាលពីថ្ងៃទី២២ ខែកញ្ញា ឆ្នាំ២០១៩ អតីតប្រធានកងអង្គរក្សរបស់ លោក សម រង្ស៊ី គឺលោក ពូក ចិន្តា ត្រូវបានជនមិនស្គាល់អត្តសញ្ញាណលបវាយពីក្រោយបណ្តាលឱ្យរងរបួសក្បាលធ្ងន់ធ្ងរ នៅពេលអង្គរក្សរូបនេះដើរត្រឡប់មកពីផ្សារម្នាក់ឯងបម្រុងទៅផ្ទះលោក សម រង្ស៊ី នៅសង្កាត់ចាក់អង្រែលើ រាជធានីភ្នំពេញ។
បីថ្ងៃក្រោយមក ពោលគឺនៅថ្ងៃទី២៥ ខែកញ្ញា ឆ្នាំដដែលនោះ អតីតចៅសង្កាត់កោះដាច់ មកពីគណបក្សសង្គ្រោះជាតិដែលតុលាការរំលាយ លោក ស៊ិន បូណា ត្រូវជនមិនស្គាល់មុខ ២នាក់ ធាក់ផ្ដួលម៉ូតូ និងយកដំបងដែកដេញវាយសំពងរហូតបាក់ដៃឆ្វេង ពេលលោកកំពុងជិះម៉ូតូតាមផ្លូវជាតិលេខ៦A ម្តុំវត្តគៀនឃ្លាំង ស្ថិតក្នុងសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
តាមរូបភាពដែលគេបង្ហោះតាមបណ្តាញសង្គមហ្វេសប៊ុក បង្ហាញថា ជនដៃដល់មានពាក់មួកសុវត្ថិភាព និងមានកាំភ្លើងខ្លីនៅជាប់ចង្កេះទៀតផង ក្នុងពេលកំពុងដេញវាយលោក ស៊ិន បូណា ពេលនោះ។
ជាង ១ខែក្រោយមក អតីតក្រុមប្រឹក្សាសង្កាត់អូរឫស្សី២ អ្នកស្រី ហែម ស៊ីនួន បានក្លាយជាសកម្មជនអតីតបក្សប្រឆាំងមួយរូបទៀត ដែលត្រូវបានជនមិនស្គាល់មុខ ២នាក់ ធាក់ម៉ូតូពីក្រោយឱ្យដួលបោកក្បាលរងរបួសដៃ ជើង និងដងខ្លួន នៅចំថ្ងៃដែលលោក សម រង្សី ប្រកាសចូលស្រុក ក្នុងព្រឹត្តិការណ៍៩ វិច្ឆិកា ឆ្នាំ២០១៩។
ចូលដល់ដើមឆ្នាំ២០២០ ការវាយប្រហារមួយករណីទៀត ដែលបានកើតឡើងលើលោក ខៀវ ឌីន អតីតក្រុមប្រឹក្សាសង្កាត់កាកាបទី១ ខណ្ឌពោធិ៍សែនជ័យ ។
លោក ខៀវ ឌីន ត្រូវបានជនដៃដល់២នាក់ពាក់មួកការពារសុវត្ថិភាព និងបិទកញ្ចក់មុខ ជិះម៉ូតូគ្មានស្លាកលេខតាមពីក្រោយវាយឱ្យរងរបួសក្បាលធ្ងន់ធ្ងរដេរចំនួន ១០ថ្នេរកាលពីថ្ងៃទី២០ ខែមករា ឆ្នាំ២០២០។
ក្រោយមកនៅថ្ងៃទី២៧ ខែមេសា ឆ្នាំ២០២១ កូនប្រុសរបស់លោក កាក់ កុម្ភារ មន្រ្តីបក្សសង្គ្រោះជាតិដែលតុលាការរំលាយ គឺយុវជន កាក់ សុវណ្ណច្ឆ័យ ត្រូវជនមិនស្គាល់មុខជិះម៉ូតូយកដុំឥដ្ឋគប់លើបណ្តាលឱ្យរងរបួសក្បាល ពេលកំពុងជិះម៉ូតូដឹកម្តាយត្រឡប់ពីទិញដំឡូងក្បែរផ្ទះ ក្នុងសង្កាត់បឹងទំពុនទី១ ខណ្ឌមានជ័យ រាជធានីភ្នំពេញ។
គ្រួសារជនរងគ្រោះ និងជនរងគ្រោះដោយអំពើវាយប្រហារទាំងនេះ ធ្លាប់បានអះអាងស្រដៀងគ្នាថា មកទល់ពេលនេះយុត្តិធម៌សម្រាប់ពួកគាត់នៅតែគ្មាន ហើយពួកគេខ្លះក៏គ្មានសង្ឃឹមថា ជនល្មើសនឹងត្រូវបានចាប់ខ្លួនយកមកផ្តន្ទាទោសនោះដែរ បើទោះបីជាករណីខ្លះមានទាំងរូបភាព និងវីដេអូនៃអំពើវាយប្រហារនោះ បង្ហាញពីតម្រុយអត្តសញ្ញាណជនប្រព្រឹត្តយ៉ាងណាក៏ដោយ៕
