ក្រសួងធនធានទឹក និងឧតុនិយម បានអំពាវនាវដល់ប្រជាពលរដ្ឋឱ្យប្រុងប្រយ័ត្នចំពោះបញ្ហាអាកាសធាតុ ដោយថា កម្ពុជានឹងទទួលរងឥទ្ធិពលពីជ្រលងនៃប្រព័ន្ធសម្ពាធទាប ដែលបណ្ដារាជធានី-ខេត្តនឹងមានភ្លៀងធ្លាក់ពីកម្រិតតិចទៅបង្គួរ លាយឡំដោយផ្គរ រន្ទះ និងខ្យល់កន្រ្តាក់ រយៈពេល៧ថ្ងៃ។
សេចក្ដីជូនដំណឹងរបស់ក្រសួងធនធានទឹក និងឧតុនិយម ចុះថ្ងៃទី១៩ ខែកក្កដា ឆ្នាំ២០២២ ឱ្យដឹងថា ចាប់ពីថ្ងៃទី២០ ដល់ថ្ងៃទី២៦ ខែកក្កដានេះ កម្ពុជានឹងទទួលរងនូវឥទ្ធិពលពីជ្រលងនៃប្រព័ន្ធសម្ពាធទាប អូសបន្លាយពីភាគខាងជើងប្រទេសថៃ កាត់លើភាគខាងត្បូងប្រទេសឡាវ និងភាគកណ្ដាលប្រទេសវៀតណាម ជាមួយខ្យល់មូសុងនិរតីបក់ក្នុងល្បឿនពីមធ្យមទៅបង្គួរ។
ជាមួយគ្នានេះ ក្រសួងឱ្យដឹងថា កម្ពុជានឹងមានភ្លៀងធ្លាក់ក្នុងកម្រិតពីទាបទៅបង្គួរ ក្នុងនោះ ផ្នែកខ្លះនៃបណ្ដាខេត្តនិងរាជធានីអាចនឹងមានភ្លៀងធ្លាក់ច្រើនដោយអន្លើ លាយឡំទៅដោយផ្គរ រន្ទះ និងខ្យល់កន្រ្តាក់ថែមទៀតផង។
ក្រសួងបន្តថា ស្ថានភាពបែបនេះនឹងធ្វើឱ្យតំបន់ទំនាបកណ្ដាលមានសីតុណ្ហភាពអប្បបរមាពី២៤ដល់២៦អង្សាសេ និងអតិបរមាពី៣៤ដល់៣៦អង្សាសេ ដែលអាចបណ្ដាលឱ្យផ្នែកខ្លះនៃបណ្ដាខេត្ត-រាជធានីមានភ្លៀងធ្លាក់ច្រើនដោយអន្លើ។ សម្រាប់តំបន់ខ្ពង់រាបនឹងមានសីតុណ្ហភាពអប្បបរមាពី២៣ដល់២៥អង្សាសេ និងអតិបរមាពី៣៤ដល់៣៦អង្សាសេ។ ចំណែកឯតំបន់សមុទ្រនឹងមានសីតុណ្ហភាពអប្បបរមាពី២៣ដល់២៥អង្សាសេ និងអតិបរមាពី៣៣ដល់៣៥អង្សាសេ៕
