សភារបស់ប្រទេសស្រីលង្កា នៅក្នុងសប្ដាហ៍នេះ នឹងជ្រើសរើសប្រធានាធិបតីថ្មី ក្នុងចំណោមបេក្ខជនប្រកួតប្រជែងក្នុងប្រទេសចំនួន៣រូប [តាមរយៈការបោះឆ្នោត] ដោយសង្ឃឹមថា មេដឹកនាំថ្មីនឹងអាចទាញកោះនេះចេញពីវិបត្តិសេដ្ឋកិច្ចនិងនយោបាយដ៏អាក្រក់បំផុតរបស់ខ្លួន។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
បេក្ខជនដែលត្រូវប្រកួតប្រជែងសម្រាប់តំណែងប្រធានាធិបតីទាំង៣រូបនេះ រួមមាន ប្រធានាធិបតីស្តីទី លោក រ៉ានីល វីក្រេមេស៊ីងហ្កេ (Ranil Wickremesinghe) សមាជិកសភាគណបក្សកាន់អំណាច លោក Dullas Alahapperuma និងមេដឹកនាំគណបក្សឆ្វេងនិយម Janatha Vimukti Peramuna លោក Anura Kumar Dissanayake។
ទោះជាយ៉ាងណា មានការលើកឡើងថា បើលោក រ៉ានីល វីក្រេមេស៊ីងហ្កេ ដែលរងនូវការរិះគន់ដោយប្រជាជនស្រីលង្កាជាច្រើន ទទួលបានតំណែងជាប្រធានាធិបតីថ្មីនេះ អាចនឹងបង្កឱ្យមានបាតុកម្មកាន់តែខ្លាំងឡើងនៅក្នុងប្រទេស។
ទាក់ទិននឹងករណីនេះ ពលរដ្ឋរស់នៅក្នុងរដ្ឋធានីកូឡំបូមួយរូប លោក Duminda Nagamuwa ថា៖ «យើងប្រឆាំងដាច់ខាតចំពោះលោក រ៉ានីល។ គាត់គឺជាមន្រ្តីពុករលួយ»។
លោកបន្តថា៖ «ប្រសិនបើលោក រ៉ានីល ចូលមក [ឡើងកាន់អំណាច] យើងមិនអាចមានស្ថិរភាពបានឡើយ»។
គួរបញ្ជាក់ថា ប្រទេសស្រីលង្កា ក្នុងរយៈពេលចុងក្រោយនេះ បានទទួលរងនូវវិបត្តិសេដ្ឋកិច្ចដ៏អាក្រក់បំផុតមួយដែលមិនធ្លាប់កើតមានពីមុនមក ខណៈទុនបម្រុងអន្តរជាតិរបស់ប្រទេសក៏ស្ថិតក្នុងកម្រិតទាបបំផុតផងដែរ ដែលបានបង្កឱ្យប្រទេសមួយនេះជួបប្រទះបញ្ហាកង្វះថវិកាធ្ងន់ធ្ងរសម្រាប់ការនាំចូលអាហារ ឱសថ និងប្រេងឥន្ធនៈ ជាដើម៕