ក្រសួងការបរទេសសហរដ្ឋអាមេរិក បានចង្អុលបង្ហាញអំពីប្រតិបត្តិការឆបោកតាមអ៊ីនធឺណិត ដែលជាប្រភេទប្រតិបត្តិការឆបោកទង់ក្រហម (Red Flags Scam Operations) ការជួញដូរជនបរទេសចូលមកក្នុងប្រទេសកម្ពុជាដែលកំពុងមានការកើនឡើង ក៏ដូចជាការរំលោភបំពានផ្សេងទៀត ពាក់ព័ន្ធនឹងពលករចំណាកស្រុក ហើយសកម្មភាពទាំងនេះបានធ្វើឱ្យប្រទេសកម្ពុជាធ្លាក់ដល់ចំណាត់ថ្នាក់ទាបបំផុត។
យោងតាមរបាយការណ៍ស្ដីពីការជួញដូរមនុស្សប្រចាំឆ្នាំរបស់ក្រសួងការបរទេសអាមេរិក ដែលចេញផ្សាយកាលពីល្ងាចថ្ងៃអង្គារ បានបង្ហាញថា ប្រទេសកម្ពុជាស្ថិតនៅក្នុងចំណាត់ថ្នាក់ទី៣ ដែលអាចធ្វើឱ្យមានការរឹតត្បិតលើជំនួយបរទេស បើទោះបីជានេះមិនមែនជាការចាំបាច់ និងជាការសម្រេចចិត្តផ្នែកនយោបាយរបស់ប្រធានាធិបតីសហរដ្ឋអាមេរិកក៏ដោយ។
វីអូឌី បានចងក្រងឯកសារស្ដីពីការជួញដូរ ការងារដោយបង្ខំ និងការធ្វើទារុណកម្មលើជនបរទេសក្នុងប្រតិបត្តិការឆបោកទូទាំងប្រទេស។ ជាធម្មតា បុគ្គលដែលត្រូវបានជួញដូរ គឺជាពលរដ្ឋចិន វៀតណាម ថៃ តៃវ៉ាន់ និងម៉ាឡេស៊ី រួមទាំងមានករណីជួញដូរមួយចំនួនទៀតដែលត្រូវបានរាយការណ៍ពីបណ្ដាប្រទេសនៅក្នុងតំបន់អាស៊ីផ្សេងទៀត។
របាយការណ៍ទាំងនេះត្រូវបានគាំទ្រដោយប្រព័ន្ធផ្សព្វផ្សាយអន្តរជាតិ និងអង្គការមិនមែនរដ្ឋាភិបាលផ្សេងទៀត ដែលបានចងក្រងឯកសារអំពីការរំលោភបំពានទាំងនេះផងដែរ។
របាយការណ៍ TIP របស់សហរដ្ឋអាមេរិក បានបង្ហាញសង្ខេបអំពីប្រតិបត្តិការឆបោក ដោយរៀបរាប់លម្អិតអំពីការរំលោភសិទ្ធិការងារ និងបញ្ហាជួញដូរដែលកំពុងតែកើតមាននៅក្នុងប្រទេស ដូចជា ការងារដើម្បីដោះបំណុលនៅឡឥដ្ឋ ការជួញដូរកូនស្រីដែលកំពុងមានការកើនឡើងនៅបរទេស និងការរំលោភបំពានដែលប្រជាជនចំណាកស្រុកកំពុងជួបប្រទះ។
របាយការណ៍ដដែលនេះបង្ហាញថា មានរបាយការណ៍គួរឱ្យទុកចិត្តដែលបង្ហាញថា មន្ត្រីមួយចំនួនសមគំនិតក្នុងប្រតិបត្តិការឆបោក និងអំពាវនាវឱ្យបង្កើនការកាត់ទោសអាជ្ញាធរដែលប្រព្រឹត្តខុស។
របាយការណ៍ដដែលនេះបានបង្ហាញទៀតថា៖ «អង្គការមិនមែនរដ្ឋាភិបាលបានចោទប្រកាន់ថា នគរបាលនិងមន្ត្រីផ្សេងទៀតសមគំនិតក្នុងប្រតិបត្តិការឆបោកតាមប្រព័ន្ធអ៊ីនធឺណិត ដែលបានបង្ខំប្រជាជនចិន ប្រជាជននៅតំបន់អាស៊ីអាគ្នេយ៍ និងជនបរទេសរាប់រយនាក់ ឱ្យធ្វើការនៅក្នុងវិស័យសេវាបម្រើអតិថិជននៅក្រុងព្រះសីហនុ និងទីតាំងផ្សេងទៀត»។
របាយការណ៍នេះក៏អំពាវនាវឱ្យមានការបង្កើនកិច្ចខិតខំប្រឹងប្រែងអនុវត្តច្បាប់ប្រឆាំងនឹងប្រតិបត្តិការឆបោកតាមអ៊ីនធឺណិត រួមទាំងការចោទប្រកាន់ពីការងារដោយបង្ខំ និងប្រឆាំងនឹងមន្ត្រីដែលសមគំនិតក្នុងប្រតិបត្តិការឆបោកនេះ និងឧក្រិដ្ឋកម្មជួញដូរដែលពាក់ព័ន្ធ។
នគរបាលកម្ពុជាបានជួយសង្គ្រោះមនុស្សដែលត្រូវបានបង្ខំឱ្យធ្វើការក្នុងប្រតិបត្តិការឆបោកជាបន្តបន្ទាប់ ដែលជាញឹកញាប់ធ្វើឡើងតាមការទទូចពីប្រទេសកំណើតរបស់ជនរងគ្រោះ។ យ៉ាងណាក៏ដោយ នគរបាលកម្ពុជាបានបដិសេធយ៉ាងដាច់អហង្ការថា មិនមានការកើនឡើងនៃករណីទាំងនេះឡើយ ដែលជួនកាលបានកំណត់ការឃុំខ្លួនពលករថាជាវិវាទការងារ ឬការខ្វែងគំនិតគ្នាលើកិច្ចសន្យាការងារ។
ប្រទេសកម្ពុជាស្ថិតក្នុងបញ្ជីតាមដានចំណាត់ថ្នាក់២ ក្នុងរបាយការណ៍របស់សហរដ្ឋអាមេរិកក្នុងរយៈពេល៣ឆ្នាំចុងក្រោយនេះ។ ប្រទេសដែលមិនមានភាពប្រសើរឡើង ត្រូវបានទម្លាក់ចំណាត់ថ្នាក់ដោយស្វ័យប្រវត្តិទៅចំណាត់ថ្នាក់ទី៣ បន្ទាប់ពីរយៈពេល២ឆ្នាំនៅក្នុងបញ្ជីតាមដាន ប៉ុន្តែកម្ពុជាបានទទួលការពន្យារពេលមួយឆ្នាំនៅឆ្នាំ២០២១។ របាយការណ៍នេះក៏បានបញ្ជាក់ផងដែរថា «រាជធានី-ខេត្តទាំង២៥របស់ប្រទេសកម្ពុជា គឺជាប្រភពនៃការជួញដូរមនុស្ស»។
បច្ចុប្បន្ននេះ ប្រទេសកម្ពុជាចូលរួមជាមួយប្រទេសចិន ម៉ាកាវ វៀតណាម ម៉ាឡេស៊ី មីយ៉ាន់ម៉ា កូរ៉េខាងជើង ប្រ៊ុយណេ ស៊ីរី អាហ្វហ្គានីស្ថាន ស៊ូដង់ខាងត្បូង និងរដ្ឋចំនួន១២ផ្សេងទៀត ជាប្រទេសដែលស្ថិតនៅក្នុងចំណាត់ថ្នាក់លេខ៣៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ US Report Red Flags Scam Operations, Widespread Trafficking and Forced Labor
