នគរបាលក្នុងខេត្តក្រចេះ បាននិយាយថាពួកគេកំពុងស្វែងរកចាប់ខ្លួនជនសង្ស័យចំនួន៣នាក់ ដែលបានវាយបុរសម្នាក់ជាអ្នកថតរូប និងវីដេអូនៅតំបន់នោះទោះបីជាពួកគេមិនបានបញ្ជាក់លម្អិតពីការស៊ើបអង្កេតក៏ដោយ។
លោក ចាន់ សុគីម អធិការនគរបាលស្រុកស្នួល ខេត្តក្រចេះ ឱ្យដឹងថា ក្នុងពេលដែលឈ្មោះ សាន ស៊ីម កំពុងថតវីដេអូនៅក្រោមម្លប់ស្វាយក្នុងឃុំក្រញូងសែនជ័យ កាលពីថ្ងៃច័ន្ទ ស្រាប់តែមានមនុស្ស៣នាក់បានជិះម៉ូតូមកវាយគាត់នឹងដំបងឈើ។
លោកបន្តថា សាន ស៊ីម គឺជាអ្នកកាសែតនិងបានហៅអ្នករាយការណ៍ព័ត៌មានម្នាក់ទៀតឱ្យមកជួយហើយគាត់អាចនឹងស្លាប់នៅកន្លែងកើតហេតុ ប្រសិនបើមិនមានអ្នករាយការណ៍ព័ត៌មានផ្សេងទៀតមកជួយ នោះទេ។
អធិការនគរបាលរូបនេះ បន្ថែមថាជនសង្ស័យទាំងបីនាក់បានរត់គេចខ្លួននៅពេលសមត្ថកិច្ចទៅដល់។
លោកថា«ឥឡូវនេះខ្ញុំគ្រាន់តែចង់ប្រាប់ថាអាជ្ញាធររបស់យើងកំពុងធ្វើការលើករណីនេះហើយទាក់ទងនឹងព័ត៌មានលម្អិតផ្សេងទៀតយើងមិនអាចប្រាប់បានទេព្រោះយើងកំពុងស៊ើបអង្កេត។ យើងបានកំណត់អត្តសញ្ញាណជនសង្ស័យរួចហើយ ព្រោះវាជាបទល្មើសជាក់ស្តែង ហើយជនរងគ្រោះស្គាល់ពួកគេច្បាស់។ មកទល់ពេលនេះ យើងគ្រាន់តែឮចម្លើយពីជនរងគ្រោះថា ពួកគេខឹងនឹងគាត់ដែលថតរូប»។
លោក ចាន់ សុគីម មិនបានបញ្ជាក់លម្អិតអំពីអ្វីដែលអ្នកកាសែតឈ្មោះ សាន ស៊ីម បាតថតនោះឡើយ ឬថាតើជនល្មើស និងជនរងគ្រោះមានទំនាក់ទំនងអ្វីនឹងគ្នានោះដែរ។
លោកបន្ថែមថា «ខ្ញុំមិនអាចនិយាយពីរឿងនេះបានទេព្រោះវាជារឿងសម្ងាត់របស់ពួកគេហើយយើងមិនអាចនិយាយបានទេព្រោះគ្មានភស្តុតាង»។
សារព័ត៌មានក្នុងស្រុកមួយឈ្មោះ ស៊ីអ៊ីអ៊ែន(CEN)បានលើកឡើងថាអ្នកកាសែតឈ្មោះ ស៊ីម បានថតវីដេអូអំពីការជួញដូរឈើ។
លោក លី សុខន មេប៉ុស្តិ៍នគរបាលរដ្ឋបាលឃុំក្រញូងសែនជ័យបានមានប្រសាសន៍ថា«យើងមិនដឹងថាគេធ្វើអាជីវកម្មឈើឬអត់ទេ ព្រោះយើងនៅតែធ្វើការលើរឿងហ្នឹង។ ខ្ញុំសូមបញ្ចប់ការងារបន្តិច រួចខ្ញុំនឹងប្រាប់រឿងនេះ»៕
បកប្រែ និងសម្រួលចេញពីអត្ថបទដើមភាសាអង់គ្លេស៖ Kratie Police Seek Three Suspects in Journalist’s Assault
បកប្រែដោយ៖ លោក លី សេងហន
