ប្រជាពលរដ្ឋនៅក្នុងខេត្តក្រចេះមួយចំនួនត្រូវបានបុរសម្នាក់ ដែលអះអាងថាខ្លួនមកពីអង្គការ អភិវឌ្ឍន៍មួយឆបោកឱ្យវិនិយោគធ្វើឱ្យខាតបង់ប្រាក់អស់រាប់ម៉ឺនដុល្លារ មុននឹងបុរសរូបនោះ ត្រូវបានពលរដ្ឋឃាត់ខ្លួនប្រគល់ទៅឱ្យនគរបាល។
មន្រ្តីមូលដ្ឋានម្នាក់បានប្រាប់វីអូឌីថា ប្រជាពលរដ្ឋបានលក់គោ និងខ្ចីប្រាក់គេយកមកវិនិយោគ តាមការបញ្ចុះបញ្ចូលរបស់បុរសរូបនោះដើម្បីឱ្យឆាប់ក្លាយជាអ្នកមាន។ បើតាមមន្រ្តីមូលដ្ឋានរូបនេះដដែលឱ្យដឹងថា បុរសម្នាក់អាយុ៤៣ឆ្នាំ នៅខេត្តក្រចេះបានឆបោកប្រជាពលរដ្ឋចំនួន១៤២គ្រួសារក្នុងរយៈពេលជាច្រើនសប្តាហ៍ដោយចាប់ផ្ដើមនៅមុនការបោះឆ្នោតឃុំ សង្កាត់ នៅថ្ងៃទី០៥ ខែមិថុនា មុនពេលគាត់ត្រូវបានចាប់ខ្លួននៅដើមខែនេះ។
អ្នកនាំពាក្យសាលាដំបូងខេត្តក្រចេះអ្នកស្រី ចាន់ ស្រីមុំ បានថ្លែងថាបុរសរូបនោះឈ្មោះ សៅ ផល្លា ត្រូវបានសមត្ថកិច្ចចាប់ខ្លួនកាលពីថ្ងៃទី១២ ខែកក្កដា ពីបទឆបោកមានស្ថានទម្ងន់ទោស និងបានឃុំខ្លួនបណ្ដោះអាសន្នរង់ចាំការជំនុំជម្រះ។
លោក ទីវ ផល្លឹក មេប៉ុស្តិ៍នគរបាលរដ្ឋបាលឃុំចង្រ្កង់ ស្រុកចិត្របុរី បន្ថែមថាបុគ្គលឈ្មោះផល្លា ត្រូវបានចោទប្រកាន់ថាបានឆបោកប្រជាពលរដ្ឋចំនួន ១៤២ គ្រួសារ គិតជាទឹកប្រាក់ ស្មើនឹង៣០០លានរៀល (ប្រហែលជា ៧៥.០០០ដុល្លារអាមេរិក) នៅក្នុងឃុំរបស់គាត់។
លោក ផល្លឹក ថ្លែងថា៖«ប្រជាពលរដ្ឋបានឃាត់ខ្លួនបុរសនោះប្រគល់ឱ្យយើង។គាត់បានព្រមព្រៀងថានៅថ្ងៃទី១០គាត់នឹងសងប្រាក់ប្រជាពលរដ្ឋវិញក៏ប៉ុន្តែប្រជាពលរដ្ឋមិនបានទទួលប្រាក់ឡើយដូច្នេះពួកគាត់ក៏ចាប់ខ្លួនបុរសនោះប្រគល់ឱ្យនគរបាលថ្នាក់ឃុំ»។
អ្នកស្រី ពេញ ពៅ មេឃុំចង្រ្កង បានឱ្យដឹងថា នៅពេលដែលមានករណីឆបោកនោះកើតឡើង បុគ្គលឈ្មោះ ផល្លា បានចាប់ផ្តើមឃោសនាអំពីគម្រោងរបស់ខ្លួននៅឃុំជាច្រើនក្នុងស្រុក ចិត្របុរី ប្រហែលពីរសប្តាហ៍មុនការបោះឆ្នោត។ ប្រជាពលរដ្ឋម្នាក់បានប្រាប់ថា ឈ្មោះ ផល្លា នេះបានអះអាងថា ខ្លួនមកពីអង្គការអភិវឌ្ឍន៍សហគមន៍កម្ពុជា ឬ ស៊ីស៊ីឌីអូ (CCDO) ហើយបានប្រាប់ប្រជាពលរដ្ឋថាពួកគាត់អាចទទួលបានការប្រាក់ខ្ពស់កប់ពពកក្នុងរយៈពេលប៉ុន្មានថ្ងៃប៉ុណ្ណោះ បន្ទាប់ពីដាក់ប្រាក់តម្កល់។ គេមិនឃើញមានឯកសារយោងដែលបញ្ជាក់ ពីឈ្មោះអង្គការនោះឡើយ។វ
អ្នកស្រីបន្ថែមថា«ខ្ញុំមិនដឹងថាគេឃោសនាបែបណាដើម្បីបោកប្រាស់ប្រជាពលរដ្ឋឡើយព្រោះប្រជាពលរដ្ឋយើងក្រីក្រណាស់។ប៉ុន្តែគេបានផ្សព្វផ្សាយអ្វីមួយដែលធ្វើឱ្យប្រជាពលរដ្ឋជឿ។គេប្រាប់ថាក្នុងរយៈពេលបីឬបួនថ្ងៃពួកគាត់អាចដកប្រាក់៥០ម៉ឺនឬ៦០ម៉ឺនឬ១លានរៀល»។
អ្នកស្រីបន្តថាពលរដ្ឋភ្លូកទឹកភ្លូកដីទៅវិនិយោគខណៈដំណឹងអំពីគម្រោងនោះបានរីកសាយទូទាំងស្រុក។
អ្នកស្រីបន្ថែមទៀតថា«ពួកគាត់លក់គោខ្ចីប្រាក់ពីធនាគារនិងខ្ចីប្រាក់ពីគ្នាទៅវិញទៅមក។អ្នកខ្លះលក់គោពីរបីឬបួនក្បាល»។
កាលពីពេលអ្នកស្រីធ្វើជាមេឃុំនៅពេលនោះ [អ្នកស្រីបានផ្ទេរតំណែងមេឃុំទៅឱ្យអ្នកផ្សេងក្រោយការបោះឆ្នោតថ្ងៃទី០៥ ខែមិថុនា] អ្នកស្រីបាននិយាយជាមួយមន្ត្រីថ្នាក់ភូមិដែលបានទទួលដំណឹងថា«អង្គការនេះÈ មានឯកសារស្របច្បាប់ មានអាជ្ញាប័ណ្ណ និងមានការិយាល័យនៅក្រុងក្រចេះ។ អ្នកស្រីបានប្រាប់មន្ត្រីទាំងនោះថាពួកគេគួរតែពិនិត្យជាមួយអ្នកស្រីជាមុនសិន។ អ្នកស្រីមិនបានបញ្ជាក់ថាតើអ្នកស្រីបានផ្ទៀងផ្ទាត់អាជ្ញាប័ណ្ណរបស់អង្គការនោះ ឬយ៉ាងណានោះទេ។
អ្នកស្រីបន្តថាគ្រួសារក្នុងឃុំចំនួន៧ក្នុងចំណោម១០ឃុំនៅស្រុកចិត្របុរី បានចាញ់បោកគេអស់ប្រាក់រាប់ម៉ឺនដុល្លារ។
អ្នកស្រីបន្ថែមទៀតថា «មានទាំងជនមានពិការភាពមនុស្សចាស់យុវជនដោយសារពួកគាត់ចង់បានប្រាក់។អ្នកខ្លះខាតប្រាក់តិចអ្នកខ្លះខាតច្រើន។អ្នកខ្លះលក់ក្រវិលចិញ្ចៀននិងខ្សែដៃ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ ‘NGO’ Staffer Arrested for Defrauding Kratie Residents in Investment Scam
បកប្រែដោយ៖លោក លី សេងហន
