សេតវិមានបានឱ្យដឹងនៅថ្ងៃព្រហស្បតិ៍ម្សិលមិញថា ប្រធានាធិបតីសហរដ្ឋអាមេរិក លោក ចូ បៃឌិន បានធ្វើតេស្តវិជ្ជមានវីរុសកូវីដ-១៩ តែស្ថិតក្នុងកម្រិតស្រាល និងអាចបន្តធ្វើការងារបានជាធម្មតាក្រោមការដាក់ឱ្យនៅដាច់ដោយឡែក។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
យោងតាមវេជ្ជបណ្ឌិតមួយរូបប្រចាំសេតវិមាន លោក Kevin O’Connor បានបញ្ជាក់ថា ប្រធានាធិបតីរូបនេះមានរោគសញ្ញា ដូចជា ហៀរសម្បោរ អស់កម្លាំង និងក្អកស្ងួតម្ដងម្កាល ខណៈលោកចាប់ផ្ដើមមានអាការអស់ទាំងនេះកាលពីល្ងាចថ្ងៃពុធ។
ប្រភពដដែលបន្តថា លោក ចូ បៃឌិន បច្ចុប្បន្នកំពុងតែស្ថិតនៅក្រោមការតាមដានសុខភាព និងដាក់ឱ្យនៅដាច់ដោយឡែករយៈពេល៥ថ្ងៃ មុនពេលធ្វើតេស្តម្ដងទៀត ខណៈលោកក៏ចាប់ផ្ដើមទទួលយកការព្យាបាលដោយប្រើប្រាស់ថ្នាំព្យាបាលជំងឺកូវីដ-១៩ របស់មន្ទីរពិសោធន៍ Pifizer ឈ្មោះ «Paxlovid» ផងដែរ។
ថ្លែងតាមរយៈវីដេអូមួយដែលត្រូវបានបង្ហោះក្នុងបណ្ដាញសង្គម ធ្វីតធ័រ (Twitter) ប្រធានាធិបតីសហរដ្ឋអាមេរិកដែលមានវ័យ៧៩ឆ្នាំរូបនេះ បានលើកឡើងថា រូបលោកមានសុខភាពល្អធម្មតា ដោយអាចបំពេញការងារជាច្រើនបានជាធម្មតា [ពីការិយាល័យដែលលោកត្រូវបានដាក់ឱ្យនៅដាច់ដោយឡែក]។
គួរបញ្ជាក់ថា អាមេរិក គិតរហូតមកដល់ពេលបច្ចុប្បន្នមានការឆ្លងវីរុសកូវីដ-១៩ សរុបនៅក្នុងប្រទេសជាង៩០លានករណី និងអ្នកស្លាប់ជាង១លាននាក់ ខណៈប្រជាជននៅក្នុងប្រទេសនេះដែលទទួលបានការចាក់វ៉ាក់សាំងការពារជំងឺកូវីដ-១៩ មានចំនួនជាង១០០លាននាក់៕
