អង្គការទស្សនៈពិភពលោក អំពាវនាវទៅរដ្ឋាភិបាលឱ្យជំរុញទៅស្ថាប័នពាក់ព័ន្ធរួមគ្នាទប់ស្កាត់អំពើហិង្សាលើកុមារ ខណៈអំពើហិង្សានៅតែបន្តកើតមាន ដែលធ្វើឱ្យប៉ះពាល់ដល់ធនធានមនុស្ស សេដ្ឋកិច្ច និងការអភិវឌ្ឍជាតិ។
ក្នុងសិក្ខាសាលាស្ដីពី «តួនាទីរបស់អ្នកសារព័ត៌មានក្នុងការបង្ការ និងទប់ស្កាត់អំពើហិង្សាលើកុមារនៅកម្ពុជា» នៅថ្ងៃទី២០ ខែកក្កដា ឆ្នាំ២០២២ ប្រធានដឹកនាំកម្មវិធីកិច្ចការពារកុមារ និងការចូលរួមនៃអង្គការទស្សនៈពិភពលោក លោក ឆាយ វាសនា បានថ្លែងថា តាមរយៈការសិក្សាស្រាវជ្រាវ និងស្ទង់មតិប្រជាពលរដ្ឋនៅរាជធានី-ខេត្តចំនួន១០ របស់អង្គការទស្សនៈពិភពលោក ឃើញថា អំពើហិង្សាលើកុមារមានការធ្លាក់ចុះ ក្នុងរយៈពេល៤ឆ្នាំចុងក្រោយនេះ ពោលគឺចាប់ពីឆ្នាំ២០១៨ ដល់ឆ្នាំ២០២១។
លោកបន្តថា តាមការស្ទង់មតិ ក្រុមគោលដៅបានសម្ភាសកុមាររងអំពើហិង្សាដែលមានអាយុចន្លោះពី១២ឆ្នាំដល់១៨ឆ្នាំ ចំនួនជាង១ ០០០នាក់ ក្នុងនោះ អំពើហិង្សាលើកុមារមានការធ្លាក់ចុះពី ៤៩% (ទិន្នន័យឆ្នាំ២០១៨) សល់ត្រឹម ៣៧,៩% (ឆ្នាំ២០២១) និងការសម្ភាសឪពុកម្តាយជាង២ ០០០នាក់ រកឃើញថា ការប្រើប្រាស់ហិង្សាលើកុមារក៏មានការធ្លាក់ចុះពី ៨៩% (ឆ្នាំ២០១៨) សល់ត្រឹម ៦៥% (ឆ្នាំ២០២១) ផងដែរ។
តែយ៉ាងណា លោកថា ទោះបីអំពើហិង្សាលើកុមារបានថយចុះក៏ពិតមែន ប៉ុន្តែបញ្ហានេះនៅតែកើតមានឡើង ដែលករណីនេះទាមទារឱ្យមានការចូលរួមពីភាគីពាក់ព័ន្ធ ជាពិសេសរដ្ឋាភិបាលកម្ពុជា ទើបអាចទប់ស្កាត់អំពើហិង្សាកាន់តែទទួលបានផលវិជ្ជមានខ្ពស់។
លោកមានប្រសាសន៍ថា៖ «មានបញ្ហាប្រឈមមួយចំនួនដែលរាជរដ្ឋាភិបាលគួរយកចិត្តទុកដាក់ និងបន្តពង្រឹងជាមួយនឹងជាពិសេសអ្នកដែលធ្វើការងារផ្ទាល់នៅក្នុងសហគមន៍ អ្នកដែលផ្ដល់សេវាកម្មផ្ទាល់ ព្រោះយើងដឹងថា ពួកគាត់នៅជិតស្និទ្ធជាងគេជាមួយនឹងកុមារហើយនិងសហគមន៍។ អ្វីដែលយើងរកឃើញ ទី១ ទាក់ទងនឹងសមត្ថិភាពពួកគាត់ ការយល់ដឹងទៅលើអំពើហិង្សា ហើយការអប់រំផ្សព្វផ្សាយបន្ថែម […] ឬក៏មានអំពើហិង្សាកើតឡើង តើគាត់ត្រូវប្រើប្រាស់យន្តការបែបណា? គាត់ត្រូវឆ្លើយតបយ៉ាងម៉េច? គាត់ត្រូវដោះស្រាយយ៉ាងម៉េច? បញ្ជូនកុមារយ៉ាងម៉េចទៅដល់ការគាំទ្រ និងជួយឱ្យបានល្អប្រសើរ? បើគាត់រងអំពើហិង្សាទាក់ទងសុខភាព ត្រូវបញ្ជូនគាត់ទៅកន្លែងវិស័យសុខភាព បើប៉ះពាល់ដល់ផ្លូវចិត្ត ត្រូវបញ្ជូនទៅកន្លែងផ្លូវចិត្ត»។
បើតាមលោក ឆាយ វាសនា តំបន់គោលដៅទាំង១០រាជធានី-ខេត្តនោះមានដូចជា រាជធានីភ្នំពេញ ខេត្តកណ្ដាល តាកែវ កំពង់ស្ពឺ កំពង់ឆ្នាំង បាត់ដំបង បន្ទាយមានជ័យ សៀមរាប កំពង់ធំ និងព្រះវិហារ។ លោកបន្តថា ដើមចមដែលនាំឱ្យអង្គការនេះជ្រើសរើសរាជធានី-ខេត្តទាំង១០នោះ ដោយផ្អែកទៅលើកត្តាមួយចំនួនដូចជា តំបន់គោលដៅដែលដាច់ស្រយាល តំបន់ដែលមានកុមារងាយរងគ្រោះរស់នៅច្រើន តំបន់ដែលមិនមានស្ថាប័នអង្គការក្រៅរដ្ឋាភិបាលដែលផ្ដោតលើវិស័យតែមួយជាមួយនឹងអង្គការទស្សនៈពិភពលោក ជាដើម។
លោកបញ្ជាក់ថា អំពើហិង្សាលើស្រ្តី និងកុមារ ជាទម្រង់នៃការរំលោភបំពានលើផ្លូវកាយនិងផ្លូវចិត្ត ដែលធ្វើឱ្យប៉ះពាល់ដល់សិទ្ធិ សុខភាពផ្លូវកាយ របួសរាងកាយ វិបត្តិផ្លូវចិត្ត និងប្រាជ្ញា ជាដើម។
ប្រធានយុទ្ធនាការគំរូអហិង្សានៃអង្គការទស្សនៈពិភពលោក អ្នកស្រី ឈឹម រតនា បានលើកឡើងបន្ថែមថា បើទោះបីជាអំពើហិង្សាលើកុមារមានការថយចុះក្នុងអំឡុងពេល៤ឆ្នាំជាប់គ្នាក៏ដោយ ប៉ុន្តែកុមារមួយចំនួននៅតែជួបបញ្ហាប្រឈមអំពើហិង្សា ដោយសារខ្វះការយល់ដឹងពីឪពុកម្ដាយក្នុងការចិញ្ចឹមកូនបែបអវិជ្ជមាន មិនទាន់មានច្បាប់ស្តីពីកិច្ចការពារកុមារ ធនធានមនុស្សនិងថវិការបស់រដ្ឋាភិបាលនៅមានកម្រិតទាប ហើយសៀវភៅណែនាំស្តីពីកិច្ចការពារកុមារសម្រាប់ឃុំ-សង្កាត់ទើបតែសម្ពោធឱ្យប្រើប្រាស់ ការផ្សព្វផ្សាយមិនទាន់ទូលំទូលាយ ជាដើម។
ជាមួយគ្នានេះដែរ អ្នកស្រីក៏បានលើកឡើងពីយុទ្ធនាការគំរូអហិង្សាជាសកល ដែលមាន៨៧ប្រទេសកំពុងចូលរួមក្នុងការទប់ស្កាត់អំពើហិង្សាលើកុមារ ដែលក្នុងនោះ កម្ពុជាបានចាប់ផ្តើមយុទ្ធនាការនេះនៅឆ្នាំ២០១៧ផងដែរ។ អ្នកស្រីថា យុទ្ធនាការគំរូអហិង្សា មានទិសដៅចំនួន៥ រួមមាន ផ្លាស់ប្តូរអត្តចរិត និងអាកប្បកិរិយាឪពុកម្ដាយ អាណាព្យាបាល និងគ្រូ អំពីការដាក់ពិន័យលើរាងកាយ និងធ្វើឱ្យកុមារអាម៉ាស់, ការផ្ដល់ភាពអង់អាចដល់កុមារ មានភាពធន់ តស៊ូមតិ ការពង្រឹងយន្តការការពារកុមារនៅក្នុងមូលដ្ឋាន មានគណនេយ្យភាពចំពោះសហគមន៍ ផ្ដល់ភាពចូលក្នុងការពង្រឹងគោលនយោបាយជាតិ ដែលស៊ីចង្វាក់គ្នាជាមួយភាពជាដៃគូសកល ក្នុងការបញ្ឈប់អំពើហិង្សាលើកុមារ ជាដើម។
គ្រូបង្គោលតំណាងសហគមន៍រស់នៅសង្កាត់ឃ្មួញ ខណ្ឌសែនសុខ អ្នកស្រី ហុង ស្រីពៅ ឱ្យដឹងថា កុមារចំនួន២៤៩នាក់ បានស្ថិតនៅក្នុងការទំនុកបម្រុងរបស់អ្នកស្រី ដោយក្នុងនោះ កុមារប្រហែលជា ២០% មានអាយុចន្លោះពី១២ឆ្នាំទៅ១៣ឆ្នាំ បានទទួលរងនូវការប្រើប្រាស់អំពើហិង្សាផ្លូវកាយ តាមរយៈការកេងប្រវ័ញ្ចកម្លាំង និងអំពើហិង្សាលើផ្លូវចិត្តមានតិចតួចតែប៉ុណ្ណោះ។
អ្នកស្រីថា៖ «បើធៀបនឹងពេលបច្ចុប្បន្ន ឥលូវលែងមានទៀតហើយ ដោយសារឪពុកម្ដាយគាត់បានរៀន គ្រួសាររីករាយ គាត់បានយល់ដឹងពីផលវិជ្ជមាន ដែលប្រើប្រាស់អំពើហិង្សាហ្នឹងលើកូនទាំងផ្លូវកាយនិងផ្លូវចិត្តហ្នឹង។ គាត់ដឹងថាផលប៉ះពាល់ហ្នឹងវារបៀបម៉េច គាត់កាត់បន្ថយអស់ហើយ ហើយការកាត់បន្ថយនេះ វានាំឱ្យកុមារសប្បាយចិត្ត»។
តំណាងសហគមន៍រស់នៅភូមិលូ សង្កាត់ស្វាយប៉ាក ខណ្ឌឫស្សីកែវ លោក ឡេង ពៅ បានឱ្យដឹងថា នៅតំបន់ដែលលោករស់នៅមានប្រជាជនចំនួនជិត៥០០គ្រួសារ និងមានកុមារអាយុក្រោម១៧ឆ្នាំ ជាង២ ០០០នាក់ ក្នុងនោះ កុមារមួយចំនួនមានភាពប្រសើរឡើងវិញ ក្រោយពីឪពុកម្ដាយបានទទួលការបណ្ដុះបណ្ដាលពីសិក្ខាសាលានេះ។ ទោះជាបែបនេះក្តី លោកបញ្ជាក់ថា បញ្ហាហិង្សានៅតែមានភាពចន្លោះប្រហោងខ្លះ ដោយសារតែនៅតំបន់ស្វាយប៉ាក ជាតំបន់ដែលមានការធ្វើអាជីវកម្មច្រើន គួបផ្សំនឹងកត្តាជីវភាព ធ្វើឱ្យឪពុកម្ដាយមួយចំនួនតូចនៅតែបន្តការកេងប្រវ័ញ្ចលើកម្លាំងពលកម្មលើកុមារ។
លោកមានប្រសាសន៍ថា៖ «នៅតំបន់ស្វាយប៉ាក មានកុមារធ្វើការនៅឡឥដ្ឋ ជួនកាលគាត់ត្រូវម៉ាស៊ីនដាច់ដៃ។ រួចនៅខាងឡកំបោរ៥ ខាងសហគមន៍ស្ទឹងកំបុត គឺគាត់រងអំពើហិង្សាច្រើន ដោយសារមានតំបន់មិនទាន់រៀបរយ មានការប្រើប្រាស់គ្រឿងញៀន។ ជួនកាលយើងចុះអប់រំកុមារនៅតំបន់នោះដែរ ប៉ុន្តែអត់ទទួលបានលទ្ធផលសង្ឃឹមច្រើនទេ ដោយសារអ្នកខ្លះមកទទួលយកបានត្រឹម២០% ទៅ៣០% ដោយឪពុកម្តាយខ្លះចង់ឱ្យកូនផ្លាស់ប្រែ តែកូនគាត់និយាយអត់ស្តាប់»។
រដ្ឋលេខាធិការក្រសួងមហាផ្ទៃ និងជាអនុប្រធានអចិន្រ្តៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស លោកស្រី ជូ ប៊ុនអេង សុំមិនធ្វើការបកស្រាយជុំវិញបញ្ហានេះ ដោយលោកស្រីអះអាងថា អ្នកសារព័ត៌មានសួរសំណួរនេះដដែលៗ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា អំពើហិង្សាលើកុមារ រួមមាន ផ្លូវកាយ ផ្លូវចិត្ត ផ្លូវភេទ និងការកេងប្រវ័ញ្ចកម្លាំងពលកម្មកុមារ នៅតែជាក្តីបារម្ភ ដោយសារសេចក្ដីព្រាងច្បាប់ស្ដីពីកិច្ចការពារកុមារកម្ពុជា មិនទាន់ចូលជាធរមាននៅឡើយ ខណៈរដ្ឋាភិបាលដាក់ចេញនូវគោលនយោបាយបញ្ចប់រាល់ទម្រង់នៃអំពើហិង្សាលើកុមារត្រឹមឆ្នាំ២០៣០។
ករណីនេះ លោកបានជំរុញទៅរដ្ឋាភិបាល និងដៃគូពាក់ព័ន្ធទាំងអស់ ត្រូវសហការគ្នាធ្វើការផ្សព្វផ្សាយអប់រំប្រជាពលរដ្ឋឱ្យយល់ដឹងពីអំពើហិង្សាក្នុងគ្រួសារ ដែលបញ្ហានេះនាំឱ្យប៉ះពាល់ដល់ធនធានមនុស្ស សេដ្ឋកិច្ច និងការអភិវឌ្ឍ ជាដើម។
លោកថា៖ «យើងមានគោលនយោបាយហើយ សំខាន់ការអនុវត្តជារឿងសំខាន់ អ៊ីចឹងទាល់តែអ្នកពាក់ព័ន្ធចូលរួមក្នុងការអនុវត្តគោលនយោបាយ អនុវត្តច្បាប់ អនុវត្តផែនការយុទ្ធសាស្ត្រទប់ស្កាត់ទៅលើរាល់ទម្រង់នៃអំពើហិង្សាលើកុមារ ទើបមានប្រសិទ្ធភាព»។
ក្នុងកិច្ចប្រជុំកំពូលអ្នកដឹកនាំ ស្ដីពី «ដំណោះស្រាយ ដើម្បីបញ្ចប់អំពើហិង្សាលើកុមារ» កាលពីថ្ងៃទី១៤ ខែមិថុនា ឆ្នាំ២០២២នេះ លោកនាយករដ្ឋមន្ត្រី ហ៊ុន សែន បានថ្លែងថា នៅឆ្នាំ២០២១ ផ្អែកតាមការវាយតម្លៃលើផែនការសកម្មភាព ដើម្បីទប់ស្កាត់ និងឆ្លើយតបចំពោះអំពើហិង្សាលើកុមារ ឆ្នាំ២០១៧-២០២១ ប្រទេសកម្ពុជាបានស្ថិតនៅលើមាគ៌ាដ៏ត្រឹមត្រូវក្នុងការទប់ស្កាត់អំពើហិង្សាលើកុមារ។
ករណីនេះ លោកថា ដើម្បីបញ្ចប់ឱ្យបាននូវអំពើហិង្សាលើកុមារគ្រប់ទម្រង់ កម្ពុជានឹងបន្តកិច្ចខិតខំប្រឹងប្រែងឱ្យកាន់តែសកម្ម ក្នុងការធានាថា កុមារមានសុវត្ថិភាពនៅគ្រប់ទីកន្លែង ដូចជា នៅផ្ទះ សាលារៀន និងសហគមន៍ ជាដើម។
លោកថ្លែងថា៖ «រាជរដ្ឋាភិបាលប្ដេជ្ញាយ៉ាងមុតមាំចំពោះការធានាឱ្យបានថា កុមារទាំងអស់នឹងរស់នៅក្នុងបរិយាកាសមួយប្រកបដោយភាពអំណោយផលដល់ការលូតលាស់ ព្រមទាំងទទួលបានការចិញ្ចឹមបីបាច់ និងកិច្ចការពារនានា សំដៅបញ្ចប់ឱ្យបានអំពើហិង្សាលើកុមារក្នុងគ្រប់ទម្រង់ និងសម្រេចឱ្យបាននូវការប្ដេជ្ញារបស់កម្ពុជា ក្នុងក្របខណ្ឌតំបន់ និងសកល តាមរយៈការអនុវត្តនូវផែនការនិងគោលនយោបាយជាតិនានាដែលបានដាក់ចេញ»។
លោកនាយករដ្ឋមន្ត្រី ហ៊ុន សែន ក៏បានអំពាវនាវទៅគ្រប់ភាគីពាក់ព័ន្ធ រួមគ្នាលើកកម្ពស់ស្មារតី ពង្រឹង និងពង្រីកកិច្ចសហប្រតិបត្តិការដែលមានស្រាប់ ទាំងទ្វេភាគី និងពហុភាគី ដើម្បីលើកស្ទួយសុខុមាលភាពកុមារនិងកិច្ចការពារកុមារ ជាពិសេសពង្រឹងយន្តការសម្របសម្រួលក្នុងចំណោមតួអង្គពាក់ព័ន្ធទាំងអស់ សំដៅចែករំលែកទិន្នន័យ រួមទាំងព័ត៌មានសំខាន់ៗ ដើម្បីចាត់វិធានការឱ្យបានទាន់ពេល និងតឹងរ៉ឹងដាច់ខាតចំពោះសកម្មភាពហិង្សាគ្រប់ទម្រង់លើកុមារ។
បន្ថែមពីនេះ លោកក៏បានជំរុញឱ្យមានការប្តេជ្ញាចិត្តជាសកល តាមរយៈការកៀរគរធនធាន ទាំងហិរញ្ញវត្ថុ និងមិនមែនហិរញ្ញវត្ថុ រួមទាំងគាំទ្រការធានាចីរភាពនៃចលនាបញ្ចប់អំពើហិង្សាលើកុមារ ទាំងក្នុងក្របខណ្ឌអង្គការសហប្រជាជាតិ និងអង្គការអន្តរជាតិ ក៏ដូចជាតំបន់ដទៃទៀត ដើម្បីបញ្ចប់រាល់ទម្រង់ទាំងអស់នៃអំពើហិង្សាលើកុមារនៅត្រឹមឆ្នាំ២០៣០ខាងមុខនេះ ៕