ការិយាល័យប្រមុខរដ្ឋ បានឱ្យដឹងនៅក្នុងសេចក្ដីថ្លែងការណ៍មួយថា នាយករដ្ឋមន្រ្តីអ៊ីតាលី លោក ម៉ារីអូ ដ្រាហ្គី (Mario Draghi) បានសម្រេចដាក់លិខិតលាលែងចេញពីតំណែងរបស់ខ្លួន កាលពីថ្ងៃព្រហស្បតិ៍ម្សិលមិញ ទៅកាន់លោកប្រធានាធិបតី សឺជីអូ ម៉ាត់តារែលឡា (Sergio Mattarella) បន្ទាប់ពីរដ្ឋាភិបាលចម្រុះរបស់លោកបានដួលរលំ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទោះជាយ៉ាងណា លោក ម៉ារីអូ ដ្រាហ្គី ត្រូវបានស្នើសុំដោយលោកប្រធានាធិបតី សឺជីអូ ម៉ាត់តារែលឡា ឱ្យនៅបន្តកាន់កាប់តំណែងនេះរហូតដល់រដ្ឋាភិបាលជ្រើសរើសបានតំណែងនាយករដ្ឋមន្រ្តីថ្មីដើម្បីឡើងមកជំនួសលោកផងដែរ។
គួរបញ្ជាក់ថា លោក ដ្រាហ្គី កាលពីសប្តាហ៍មុន ក៏ធ្លាប់បានដាក់ពាក្យលាលែងម្តងរួចមកហើយទៅកាន់លោក ម៉ាត់តារែលឡា ប៉ុន្តែត្រូវបានលោកប្រធានាធិបតីអ៊ីតាលីបដិសេធនៅពេលនោះ។
ទាក់ទិននឹងការលាលែងចេញពីតំណែងរបស់នាយករដ្ឋមន្ត្រីរូបនេះ ប្រទេសអ៊ីតាលីក៏នឹងត្រូវរៀបចំការបោះឆ្នោតជាតិមួយនៅថ្ងៃទី២៥ ខែកញ្ញាខាងមុខនេះផងដែរ ដែលជាការរៀបចំបោះឆ្នោតមុនអាណត្តិ៕