បុរសជនជាតិចិនជាប់ឃុំចំនួនប្រាំបួននាក់ត្រូវបានកាត់ទោសឱ្យជាប់ពន្ធនាគារអស់មួយជីវិត ពីបទជួញដូរគ្រឿងញៀនឆ្លងដែនទៅកាន់ប្រទេសអូស្ត្រាលី (Australia) និងនូវែលសេឡង់ (New Zealand) រួមទាំងកាត់ទោសកំបាំងមុខជាង១០នាក់ផ្សេងទៀត។
កាលពីថ្ងៃព្រហស្បតិ៍ ចៅក្រមសាលាដំបូងរាជធានីភ្នំពេញ លោក ញឹម ពិសាល បានសម្រេចផ្ដន្ទាទោសបុរសជនជាតិចិនទាំង៩នាក់ឱ្យជាប់ពន្ធនាគារអស់មួយជីវិត និងពិន័យជាប្រាក់ម្នាក់ៗ៨០លានរៀល (ប្រហែល២០ ០០០ដុល្លារ) ពីបទ «សម្អាតប្រាក់ និងជួញដូរគ្រឿងញៀន»។ លោកចៅក្រម ពិសាល ក៏បានកាត់ទោសកំបាំងមុខមនុស្សជាង១០នាក់ផ្សេងទៀតឱ្យជាប់ពន្ធនាគារអស់មួយជីវិត និងពិន័យជាប្រាក់ម្នាក់ៗ៥០លានរៀល។
លោកចៅក្រមបានរៀបរាប់ឈ្មោះជនជាប់ចោទដែលជាប់ឃុំទាំងនោះមានដូចតទៅ លូ វៃឆេង (Liu Wei Cheng), ឆេង ហ្ស៊ីឃ័ន (Chen Zhiquan), វ៉ាង លី (Wang Lei), ស៊ុន លាង (Sun Liang), ហ័ង រូមីង (Huang Rui Ming), ស៊ុន ហៃតៅ (Sun Hai Tao), លី យីណាំ (Li Yi Nam), វ៉ាង យូ (Wang Yue), និង ហ៊្សូ ហ្សៅហ្វី (Zhu Xiao Fei)។ លោកបន្ថែមថា អ្នកទាំងនេះមានសិទ្ធិប្ដឹងឧទ្ធរណ៍។
កាលពីថ្ងៃទី២៤ ខែធ្នូ នគរបាលកម្ពុជាសហការជាមួយនគរបាលចិន និងស្ថានទូតចិនប្រចាំនៅកម្ពុជា បានឆ្មក់ចូលទីតាំង២កន្លែងក្នុងបុរីប៉េងហួតបឹងស្នោ ក្នុងសង្កាត់និរោធ ខណ្ឌច្បារអំពៅ និងនៅភោជនីយដ្ឋានមួយកន្លែងក្នុងសង្កាត់បឹងព្រលិត ខណ្ឌ៧មករា។
ក្នុងពេលដំណាលគ្នានោះ អាជ្ញាធរចិនក៏បានបើកប្រតិបត្តិការចាប់ខ្លួនជនសង្ស័យនៅក្នុងប្រទេសចិន។
ក្នុងប្រតិបត្តិការវាយឆ្មក់ អាជ្ញាធរកម្ពុជារឹបអូសបានគ្រឿងញៀនប្រភេទមេតំហ្វេតាមីន ចំនួន៣៤៧គីឡូក្រាម ព្រមទាំងជញ្ជីងចំនួន២ និងឧបករណ៍ប្រើប្រាស់សម្រាប់វេចខ្ចប់គ្រឿងញៀនដាក់ក្នុងបំពង់ដែក ដែលអាជ្ញាធរអះអាងថា ពួកគេដឹកជញ្ជូនទៅកាន់ប្រទេសអូស្ត្រាលី (Australia) និងនូវែលសេឡង់ (New Zealand)។
ក្នុងអំឡុងពេលជំនុំជម្រះ ជនជាប់ចោទទាំងនេះ កាលពីសប្តាហ៍មុន បានបដិសេធថា ពួកគេមិនបានដឹងថា ការងារដែលពួកគេទទួលបានប្រាក់ខែសមរម្យពាក់ព័ន្ធនឹងគ្រឿងញៀនឡើយ។
បុរសម្នាក់បាននិយាយថា គាត់នៅក្នុងប្រទេសកម្ពុជាទើបតែបាន១០ថ្ងៃប៉ុណ្ណោះ នៅពេលនគរបាលឃាត់ខ្លួនគាត់នៅកន្លែងធ្វើការ ដែលគាត់ជាបុគ្គលិកផ្នែកអនាម័យ ទទួលបានប្រាក់ខែពី២ ០០០ ទៅ២ ៥០០ដុល្លារក្នុងមួយខែ៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ More Than 20 Sentenced to Life for Drug Trafficking
