តុលាការកំពូលសម្រេចឱ្យអតីតមេបញ្ជាការកងរាជអាវុធហត្ថក្រុងក្រចេះ លោក ទេព ហ៊ុយ ដែលជាប់ចោទពីបទ «ធ្វើទារុណកម្មកុមារី២នាក់ដោយបង្ខំឱ្យស៊ីអាចម៍ឆ្កែ» បាននៅក្រៅឃុំ បណ្ដោះអាសន្ន ដោយសម្អាងហេតុថា«មិនមានបទល្មើសផ្សេង» ក្រោយពីជនជាប់ចោទរូបនោះ បានជាប់ពន្ធនាគារ៩ខែរួចមក។
ប្រធានក្រុមប្រឹក្សាជំនុំជម្រះតុលាការកំពូល លោក និល ណុន នៅព្រឹកថ្ងៃសុក្រនេះ បានបដិសេធសាលដីកាសាលាឧទ្ធរណ៍ខេត្តត្បូងឃ្មុំ ចុះថ្ងៃទី២ ខែឧសភា ឆ្នាំ២០២២។
លោក និល ណុន សម្រេចឱ្យជនជាប់ចោទឈ្មោះ ទេព ហ៊ុយ ភេទប្រុស អាយុ៤២ឆ្នាំ បាននៅក្រៅឃុំបណ្ដោះអាសន្ន តែមិនអនុញ្ញតឱ្យជនជាប់ចោទចេញទៅក្រៅប្រទេស ដោយសម្អាងហេតុថា ជនជាប់ចោទរូបនេះមិនមានបទល្មើសផ្សេង។
ការសម្រេចរបស់ប្រធានចៅក្រមជំនុំជម្រះតុលាការកំពូលនេះបានធ្វើឡើងក្រោយពីមេធាវីលោក ទេព ហ៊ុយ បានចូលការពារបណ្ដឹងសាទុក្ខរបស់កូនក្ដីនៅតុលាការកំពូល កាលពីថ្ងៃទី១៥ ខែកក្កដា ឆ្នាំ២០២២។
ក្នុងសវនាការប្រឆាំងនឹងការចោទប្រកាន់កូនក្ដី មេធាវីបានសម្អាងថា កូនក្ដី លោក ទេព ហ៊ុយ មានជំងឺប្រចាំកាយ ហើយថាការចោទប្រកាន់របស់តុលាការជាន់ទាបស្ដាប់តែភាគីម្ខាង ហើយថា ពេលនេះភាគីដើមបណ្ដឹងក៏បានដកពាក្យបណ្ដឹងវិញផងដែរ ក្រោយពីកូនក្ដីបានផ្ដល់សំណងទៅជនរងគ្រោះ។
អតីមេបញ្ជាការកងរាជអាវុធហត្ថក្រុងក្រចេះរូបនេះ ត្រូវបានចាប់ខ្លួនកាលពីថ្ងៃទី៣០ ខែតុលា ឆ្នាំ២០២១ ពាក់ព័ន្ធទៅនឹងការធ្វើទារុណកម្មក្មេងស្រី២នាក់ជាអ្នកបម្រើ ដែលម្នាក់ឈ្មោះ ត្រែក ធារ៉ា អាយុ១២ឆ្នាំ និងម្នាក់ទៀត ឈ្មោះ វ៉ន ពិសី អាយុ១២ឆ្នាំ ឱ្យសំពះសពឆ្កែខ្លួនដែលងាប់ ដោយចោទថា ក្មេងទាំងពីរនោះធ្វើឱ្យងាប់ និងបង្ខំឱ្យក្មេងស្រីជាអ្នកបម្រើនោះស៊ីអាចម៍ឆ្កែទៀតផង។
បន្ទាប់មក ចៅក្រមស៊ើបសួរសាលាដំបូងខេត្តក្រចេះ តាមរយៈដីកាចុះថ្ងៃទី១ ខែវិច្ឆិកា ឆ្នាំ២០២១ បានបង្គាប់ឱ្យឃុំខ្លួនលោក ទេព ហ៊ុយ ចោទពីបទ «ប្រើហិង្សាដោយចេតនាមានស្ថានទម្ងន់ទោស និងបទគំរាមកំហែងថានឹងសម្លាប់» តាមមាត្រា២១១ -២១៩ និង២៣៨ នៃក្រមព្រហ្មទណ្ឌ។
បើតាមដីកាដដែល បទល្មើសនេះប្រព្រឹត្តនៅហាងលក់រថយន្តមួយកន្លែងក្នុងក្រុងក្រចេះយីហោ «លាង ហ៊ុយ» ស្ថិតនៅភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ កាលពីថ្ងៃទី២៧ ខែតុលា ឆ្នាំ២០២១៕