ប្រធានស្ដីទីគណបក្សភ្លើងទៀនប្រចាំខេត្តត្បូងឃ្មុំ បានឱ្យដឹងថា ខ្លួនបានស្នើសុំពន្យារពេលពីសាលាដំបូងរាជធានីភ្នំពេញ ដើម្បីចូលឆ្លើយបំភ្លឺទៅតាមដីកាកោះរួចហើយ ក្រោមបទចោទក្នុងរឿងក្ដីព្រហ្មទណ្ឌចំនួន៤សំណុំរឿង ដែលបទចោទនេះត្រូវបានភាគីចុងចោទចាត់ទុកថា កើតចេញពីទំនាស់ខាងនយោបាយ។
ប្រធានប្រតិបត្តិគណបក្សភ្លើងទៀនបណ្ដោះអាសន្នប្រចាំខេត្តត្បូងឃ្មុំរូបនេះ បានប្រាប់ វីអូឌី ថាលោកបានស្នើសុំទៅតុលាការជាន់ទាបនេះរួចហើយ កាលពីព្រឹកថ្ងៃសុក្រនេះ។ លោកបន្តថា ការស្នើសុំលើកពេលនេះ ដោយសាររូបលោកមិនមានពេលវេលាគ្រប់គ្រាន់ ដើម្បីត្រៀមខ្លួនក្នុងការចូលឆ្លើយបំភ្លឺដោះបន្ទុកទៅលើសំណុំរឿងទាំង៤បទចោទនេះ។ ប៉ុន្តែក្នុងនាមជាភាគីចុងចម្លើយ លោកសន្យាថានឹងនៅតែចូលរួមតតាំងចំពោះរឿងក្តីនេះ ក្នុងពេលសមស្របណាមួយឆាប់ៗនេះ។
លោកបន្តថា៖ «ខ្ញុំមិនទាន់មានមេធាវី។ ខ្ញុំកំពុងស្វះស្វែងរកមេធាវី។ ហើយទី២ទៀត ដោយសារខ្ញុំមានការងារមមាញឹកពេកហ្នឹងណា។ ខ្ញុំដាក់សុំពន្យារហ្នឹងរួចអស់ហើយ។ ខ្ញុំដាក់ព្រឹកមិញ ប្រហែលម៉ោងខ្ទង់៨ជាងហ្នឹង។ ជាទូទៅ យើងមានហេតុផលគ្រប់គ្រាន់ក្នុងការពន្យារ អ៊ីចឹងតុលាការគាត់អាចព្រមហើយ»។
លោក អេង ស្រូយ ត្រូវរងការចោទប្រកាន់ចំនួន៤បទល្មើស រួមមាន បរិហារកេរ្តិ៍ជាសាធារណៈ បរិហារកេរ្តិ៍តាមសារព័ត៌មាន ប្តឹងបរិហារបង្កាច់កេរ្តិ៍ ក្លែងព័ត៌មាន និងញុះញង់ឱ្យប្រព្រឹត្តបទឧក្រិដ្ឋជាអាទិ៍ តាមបណ្តឹងរបស់ឈ្មោះ ប្រាក់ ណារ៉ុង។ លោក ប្រាក់ ណារ៉ុង ដែលជាដើមបណ្តឹងក្នុងរឿងក្ដីព្រហ្មទណ្ឌនេះ គឺជាប្រធានក្រុមប្រឹក្សាអភិវឌ្ឍន៍គ្រូនគរបាលជាតិ នៃបណ្ឌិត្យសភានគរបាលកម្ពុជា។
ជាអតីតគ្រូនគរបាលជាតិ មធ្យមកម្រិត៤ នៃអង្គភាពក្រុមប្រឹក្សាអភិវឌ្ឍន៍គ្រូនគរបាលជាតិ នៃបណ្ឌិត្យសភានគរបាលកម្ពុជា លោក អេង ស្រូយ បញ្ជាក់ថា ម្ចាស់ដើមបណ្ដឹងក្នុងសំណុំរឿងព្រហ្មទណ្ឌមួយនេះ គឺជាអតីតគ្រូរបស់ខ្លួន ហើយលោក ប្រាក់ ណារ៉ុង នេះក៏ជាប្រធានក្រុមប្រឹក្សាអភិវឌ្ឍន៍គ្រូនគរបាលជាតិ នៃបណ្ឌិត្យសភានគរបាលកម្ពុជាថែមទៀតផង។
បើតាមលោក អេង ស្រូយ ដើមហេតុដែលឈានទៅដល់ការប្ដឹងផ្ដល់ចូលតុលាការនេះ ផ្ដើមឡើងដោយទំនាស់ពាក្យសម្ដីរឿងនយោបាយ។ នៅពេលប្រកែកគ្នារឿងនយោបាយនេះ រូបលោកក៏ត្រូវបានម្ចាស់ដើមបណ្ដឹង ហើយក៏ជាអតីតគ្រូរបស់ខ្លួនផងនោះ បានទះកំផ្លៀងលោកនៅពេលនោះថែមទៀត។
ប្រភពបន្តថា ដើម្បីសម្របសម្រួលកុំឱ្យមានបញ្ហា ម្យ៉ាងទៀត លោកមិនមែនជាមនុស្សចូលចិត្តបង្កជម្លោះផងនោះ ក៏មិនដែលខ្វល់ខ្វាយនឹងការប្រើប្រាស់ហិង្សាពីសំណាក់លោក ប្រាក់ ណារ៉ុង នេះម្ដងណានោះទេ។ ផ្ទុយទៅវិញ ទើបតែថ្ងៃទី១៥ ខែកក្កដា កន្លងទៅនេះ ស្រាប់តែលោកទទួលបានដីកាកោះពីតុលាការក្រុងភ្នំពេញ ឱ្យចូលខ្លួនបំភ្លឺនៅថ្ងៃទី២២ ខែកក្កដានេះទៅវិញ តបតាមបណ្តឹងរបស់លោក ប្រាក់ ណារ៉ុង ដែលធ្លាប់ជាគ្រូរបស់ខ្លួន។
វីអូឌី មិនទាន់អាចស្នើសុំការបំភ្លឺបានភ្លាមៗទេ ពីព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នៅថ្ងៃសុក្រនេះ ខណៈលោក ប្រាក់ ណារ៉ុង ដែលជាម្ចាស់បណ្ដឹង ក៏ពុំអាចស្វែងរកប្រភពដើម្បីស្នើសុំការបំភ្លឺបាននៅឡើយដែរ។
បើទោះជាបែបណា តំណាងអយ្យការ លោក ទី មុនិន្ទ ដែលកាន់សំណុំរឿងនេះ បានចេញដីកាកោះហៅប្រធានប្រតិបត្តិបណ្តោះអាសន្នគណបក្សភ្លើងទៀនប្រចាំខេត្តត្បូងឃ្មុំរូបនេះ តាំងពីចុងខែមិថុនា ឆ្នាំ២០២២មកម៉្លេះ ដែលតម្រូវឱ្យជនសង្ស័យរូបនេះចូលខ្លួន ដើម្បីឆ្លើយបំភ្លឺនៅថ្ងៃទី២២ ខែកក្កដា តាមបណ្តឹងឈ្មោះ ប្រាក់ ណារ៉ុង។
ដោយឡែក នាយកចាត់ការទូទៅ នៃអង្គការការពារសិទ្ធិមនុស្ស លីកាដូ លោក អំ សំអាត សង្កេតឃើញថា ការចោទប្រកាន់ប្រឆាំងអតីតគ្រូនគរបាលរូបនេះ អាចជារឿងនយោបាយច្រើនជាងទំនាស់បុគ្គលនិងបុគ្គល។ បើតាមលោក អំ សំអាត គេពិតជាពិបាកនឹងប្រកែកបានណាស់ថា សំណុំរឿងនេះវាមិនមែនជារឿងនយោបាយ។ លោកបន្តថា ការប្តឹងអតីតគ្រូនគរបាលជាតិរូបនេះទៅតុលាការ ស្របពេលរកឃើញថា លោក អេង ស្រូយ ចូលរួមយ៉ាងសកម្មជាមួយគណបក្សភ្លើងទៀន និងជាមន្រ្តីជាន់ខ្ពស់ថែមទៀតផង។
លោកបន្តថា៖ «អ៊ីចឹងខ្ញុំថា យន្តការនេះ វាមិនល្អទេ ទី១ វានាំឱ្យមានការរិះគន់ធ្ងន់ធ្ងរថា រឿងហ្នឹងវាអាចពាក់ព័ន្ធនឹងរឿងនយោបាយ ហើយករណីនេះ វាអាចជាការរើសអើង ឬក៏ធ្វើទុក្ខបុកម្នេញទៅលើការចូលរួមក្នុងជីវភាពនយោបាយនោះ»។
មាត្រា៣៥ នៃរដ្ឋធម្មនុញ្ញ ដែលជាច្បាប់កំពូល ចែងថា ប្រជាពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។
លោក អេង ស្រូយ ជាអតីតគ្រូនគរបាលជាតិ នៃបណ្ឌិត្យសភានគរបាលជាតិកម្ពុជា ត្រូវបានដកចេញនិងបញ្ចប់ពីក្របខណ្ឌជាមន្រ្តីនគរបាលជាតិ ដែលមានឋានៈជាវរសេនីយ៍ឯក (សក្តិប្រាំ) កាលពីថ្ងៃទី១៦ ខែមិថុនា ឆ្នាំ២០២២។ ការបញ្ចប់តួនាទីពីក្របខណ្ឌមន្រ្តីនគរបាលជាតិនេះ ក្រោយពីរកឃើញថា រូបលោកបានចូលរួមជីវភាពនយោបាយជាមួយគណបក្សភ្លើងទៀន ជាប្រធានប្រតិបត្តិបណ្តោះអាសន្នប្រចាំខេត្តត្បូងឃ្មុំ។
ការបណ្តេញចេញពីក្របខណ្ឌមន្រ្តីរាជការនេះ មិនមែនមានតែអតីតគ្រូនគរបាលជាតិនេះម្នាក់ទេ លោក ខឹម មុនីកុសល ដែលជាអតីតគ្រូពេទ្យនៅខេត្តប៉ៃលិន កាលពីខែមីនា ឆ្នាំ២០២២ ក៏ត្រូវបានក្រសួងមុខងារសាធារណៈលុបឈ្មោះចេញពីក្របខណ្ឌរដ្ឋ ដោយមូលហេតុចូលរួមនយោបាយជាមួយបក្សភ្លើងទៀន។ ស្រដៀងគ្នានឹងករណីទាំងពីរនេះដែរ លោក កែវ សុមុនី ជាអតីតមន្រ្តីជំនាញផ្នែកសុខភាពផ្លូវចិត្ត នៃក្រសួងសុខាភិបាល ក៏ត្រូវបានលុបឈ្មោះចេញពីក្របខណ្ឌរដ្ឋដូចគ្នា។
ការបញ្ចប់តួនាទី និងបណ្តេញចេញពីក្របខណ្ឌ ទាំងមិនមានហេតុផលសមរម្យ និងស្ថិតក្រោមការទាមទារដ៏ចម្រូងចម្រាសពីសាម៉ីខ្លួននេះ នៅពេលរកឃើញថា លោក កែវ សុមុនី បានទៅឈរឈ្មោះជាចៅសង្កាត់នៅសង្កាត់ច្បារអំពៅ ឱ្យគណបក្សភ្លើងទៀន សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ នីតិកាលទី៥ កន្លងទៅនេះ៕
