ក្រសួងសុខាភិបាលបានឱ្យដឹងថា បុរសជនជាតិនីហ្សេរីយ៉ា ដែលកើតជំងឺអុតស្វា ហើយបានរត់គេចចេញពីប្រទេសថៃមកកម្ពុជានោះ ត្រូវបានរកឃើញហើយនៅល្ងាចថ្ងៃសៅរ៍នេះ។
សេចក្តីប្រកាសព័ត៌មានរបស់ក្រសួងសុខាភិបាល ស្តីពីការរកឃើញបុរសជនជាតិនីហ្សេរីយ៉ាដែលមានកើតជំងឺអុតស្វា នៅយប់ថ្ងៃទី២៣ ខែកក្កដាឆ្នាំ២០២២ បានឱ្យដឹងថា បុរសជនជាតិនីហ្សេរីយ៉ា ដែលអាជ្ញាធរថៃបញ្ជាក់ថា មានកើតជំងឺអុតស្វា និងរត់គេចពីប្រទេសថៃ ចូលមកប្រទេសកម្ពុជា ត្រូវបានរកឃើញហើយនៅម៉ោងជាង ៥ល្ងាចថ្ងៃសៅរ៍នេះ។
ក្រសួងបញ្ជាក់ថា បុរសជនជាតិនីហ្សេរីយ៉ានោះ មានឈ្មោះ អូសម៉ុង ស៊ីហាហ្សុរីម(OSMOND CHIHAZIRIM) ត្រូវបានសមត្ថកិច្ចរកឃើញនៅសង្កាត់ទួលទំពូង ម្ដុំផ្សារដើមថ្កូវ ខណ្ឌចំការមន រាជធានីភ្នំពេញ នៅពេលរូបគេកំពុងស្នាក់នៅផ្ទះសំណាក់មួយកន្លែង។
ក្រសួងបានឱ្យដឹងថា ជនបរទេសរូបនេះ អាយុ២៧ឆ្នាំ និងកាន់លិខិតឆ្លងដែន A10414328 ជាអ្នកទេសចរ និងមានប្រវត្តិធ្វើដំណើរចូលប្រទេសថៃ នៅកោះភូកេត នៅថ្ងៃទី២១ ខែកក្កដា។ ក្រសួងបន្តថា បច្ចុប្បន្នអ្នកកើតជំងឺអុតស្វារូបនេះ ត្រូវបានមន្ទីរសុខាភិបាលរាជធានីភ្នំពេញចាត់ចែងដឹកតាមរថយន្តសង្គ្រោះបន្ទាន់ បញ្ជូនទៅកាន់មន្ទីរពេទ្យមិត្តភាពខ្មែរ-សូវៀត ឬពេទ្យរុស្ស៊ី និងបានដាក់ឱ្យសម្រាកព្យាបាលនៅមន្ទីរពេទ្យនេះនៅម៉ោងជាង៧យប់ថ្ងៃទី២៣ ខែកក្កដានេះ។
ដើម្បីការពារការចម្លងពីជំងឺអុតស្វា ក្រសួងសុខាភិបាល បានអំពាវនាវឱ្យអ្នកដែលប៉ះពាល់ផ្ទាល់ជាមួយបុរសជនជាតិនីហ្សេរីយ៉ារូបនេះ ទាំងអស់ត្រូវដាក់ខ្លួននៅដាច់ដោយឡែក ហើយស្វែងរកការពិនិត្យសុខភាព ឬជូនដំណឹងទៅក្រុមគ្រូពេទ្យដែលនៅជិត។ បន្ថែមពីនេះ ត្រូវជូនព័ត៌មានទៅគ្រូពេទ្យជំនាញតាមលេខ ១១៥ ដើម្បីទទួលបានការជួយជ្រោមជ្រែង ពិនិត្យសុខភាព ស្វែងរកការចម្លងបន្ត និងដើម្បីចូលរួមកាត់ផ្តាច់ខ្សែចម្លងវីរុសអុតស្វាឱ្យបានទាន់ពេលវេលា។
ក្រសួងជំនាញដដែល ក៏បានណែនាំឱ្យពលរដ្ឋចូលរួមអនុវត្តវិធានការការពារការចម្លងជំងឺនេះ ពិសេសមិនត្រូវប៉ះពាល់អ្នកជំងឺនេះ មិនត្រូវប៉ះពាល់ជាមួយសត្វព្រៃ និងត្រូវបរិភោគអាហារឆ្អិនល្អ ព្រមទាំងរក្សាអនាម័យដៃ និងខ្លួនប្រាណឱ្យបានស្អាត ដោយត្រូវឧស្សាហ៍លាងដៃជាមួយសាប៊ូ ឬអាល់កុល ឬជែល។ បន្ថែមពីនេះត្រូវស្វែងរកការពិនិត្យជាបន្ទាន់ ប្រសិនបើមានបញ្ហាសុខភាព ឬសង្ស័យ។
កាលពីថ្ងៃទី១១ ខែកក្កដា ឆ្នាំ២០២២ ក្រសួងសុខាភិបាលបានចេញសេចក្តីណែនាំមួយដោយពន្យល់ថា អ្នកកើតជំងឺអុតស្វា មានសញ្ញា ដូចជា ចេញកន្ទួលរមាស់ដូចពងទឹកលើខ្លួន ហើយក្តៅខ្លួនលើសពី ៣៨,៥អង្សា ឈឺក្បាល ហើមកូនកណ្តុរ ឈឺសាច់ដុំ ឈឺចង្កេះ និង អស់កម្លាំងជាដើម៕
