រដ្ឋសភាគ្រោងបើកសម័យប្រជុំពេញអង្គពិភាក្សាលើសេចក្ដីព្រាងវិសោធនកម្មមាត្រាមួយចំនួននៃរដ្ឋធម្មនុញ្ញ និងមាត្រាចំនួន២នៃច្បាប់ធម្មនុញ្ញបន្ថែម នៅថ្ងៃព្រហស្បតិ៍ក្នុងសប្ដាហ៍នេះ។
សេចក្ដីប្រកាសព័ត៌មានរបស់រដ្ឋសភា ស្ដីពីលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍រដ្ឋសភា នៅថ្ងៃទី២៥ ខែកក្កដា ឆ្នាំ២០២២នេះ បានឱ្យដឹងថា អង្គប្រជុំនៃគណៈកម្មាធិការអចិន្ត្រៃយ៍រដ្ឋសភា បានសម្រេចយកថ្ងៃទី២៨ ខែកក្កដា ឆ្នាំ២០២២ សម្រាប់បន្តសម័យប្រជុំរដ្ឋសភា លើកទី៧ នីតិកាលទី៦ ដោយលើកយករបៀបវារៈមួយចំនួនមកពិភាក្សា។
បើតាមសេចក្ដីប្រកាសព័ត៌មាន របៀបវារៈដែលនឹងលើកយកមកពិភាក្សានោះ ក៏មានសេចក្ដីព្រាងច្បាប់ស្ដីពីវិសោធនកម្មមាត្រា១៩ថ្មី(មួយ) មាត្រា៨៩ មាត្រា៩៨ថ្មី មាត្រា១០២ថ្មី មាត្រា១១៩ថ្មី(មួយ) និងមាត្រា១២៥ថ្មី នៃរដ្ឋធម្មនុញ្ញ រួមនឹងមាត្រា៣ថ្មី និងមាត្រា៤ថ្មី នៃច្បាប់ធម្មនុញ្ញបន្ថែមផងដែរ។
រដ្ឋសភាបានទទួលសេចក្ដីព្រាងវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែម ពីគណៈរដ្ឋមន្ត្រី កាលពីថ្ងៃទី១៥ ខែកក្កដា ឆ្នាំ២០២២ ហើយគណៈកម្មាធិការអចិន្ត្រៃយ៍នៃរដ្ឋសភា បានសម្រេចប្រគល់សេចក្ដីព្រាងវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែម ទៅឱ្យគណៈកម្មការជំនាញ ដើម្បីពិនិត្យសិក្សា កាលពីថ្ងៃទី១៩ ខែកក្កដា ឆ្នាំ២០២២។
រដ្ឋមន្ត្រីក្រសួងយុត្តិធម៌ លោក កើត រិទ្ធ កាលពីថ្ងៃទី១៤ ខែកក្កដា បានគូសបញ្ជាក់តាមរយៈសន្និសីទសារព័ត៌មានមួយថា ការធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែម នូវមាត្រាចំនួន៨នោះ ក្នុងគោលបំណងបំពេញសេចក្តីខ្វះចន្លោះនៃរដ្ឋធម្មនុញ្ញដើម ដើម្បីឱ្យស្ថាប័នកំពូលរបស់ជាតិដំណើរការទៅដោយរលូន ធានាស្ថិរភាពនយោបាយ និងការពារប្រយោជន៍ជាតិ។
ក៏ប៉ុន្តែសម្រាប់គណបក្សក្រៅរដ្ឋាភិបាល និងអ្នកឃ្លាំមើលមួយចំនួន នៅតែយល់ថា ការធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមនេះ នឹងធ្វើឱ្យខាតប្រយោជន៍ជាតិច្រើនជាងផលចំណេញ។
កាលពីថ្ងៃទី២១ ខែកក្កដា គណបក្សក្រៅរដ្ឋាភិបាលចំនួន ៤ រួមមាន គណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ និងគណបក្សកែទម្រង់កម្ពុជា បានដាក់ញត្តិទៅកាន់រដ្ឋសភាស្នើកុំឱ្យអនុម័តលើសេចក្តីព្រាងវិសោធនកម្មរដ្ឋធម្មនុញ្ញ លើកទី១០ដែលស្នើឡើងដោយបក្សកាន់អំណាច ដោយសម្អាងថា ការស្នើកែច្បាប់កំពូលជាថ្មីទៀតនេះ នឹងកាត់បន្ថយអំណាចសភា រារាំងដល់ដំណើរការប្រជាធិបតេយ្យ សេរីពហុបក្ស ផ្ទុយនឹងស្មារតីរដ្ឋធម្មនុញ្ញដើម។
គិតចាប់តាំងពីការបង្កើតរដ្ឋធម្មនុញ្ញឡើងក្នុងឆ្នាំ១៩៩៣ រហូតមកដល់ពេលបច្ចុប្បន្ននេះ កម្ពុជាបានធ្វើវិសោធនកម្មរដ្ឋធម្មនុញ្ញចំនួន១០លើកមកហើយ ខណៈច្បាប់ធម្មនុញ្ញបន្ថែម ក៏ត្រូវយកមកធ្វើវិសោធនកម្មជាមួយគ្នាផងដែរ៕
