រដ្ឋាភិបាលបានកាត់ផ្ទៃដី «បឹងជើងឯក» ទំហំជាង១២ហិកតា ស្ថិតក្នុងខណ្ឌមានជ័យ និងខណ្ឌដង្កោ រាជធានីក្នំពេញ និងក្រុងតាខ្មៅ ខេត្តកណ្ដាល ទៅឱ្យឧកញ៉ា ឡោក ហ៊ួរ និងក្រសួងមហាផ្ទៃ។
យោងតាមអនុក្រឹត្យចុះថ្ងៃទី៩ ខែមីនា ឆ្នាំ២០២២ ដែលវីអូឌីទើបទទួលបានថ្ងៃនេះ បានឱ្យដឹងថា ផ្ទៃដីបឹងជើងឯកទំហំ១៨ ១២៦ម៉ែត្រក្រឡា ស្ថិតនៅភូមិទួលរកា៣ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ត្រូវបានរាជរដ្ឋាភិបាលធ្វើអនុបយោគទៅជាទ្រព្យសម្បត្តិឯកជនរបស់រដ្ឋ និងបានប្រទានកម្មជាកម្មសិទ្ធិជូនក្រសួងមហាផ្ទៃ។
ចំណែកអនុក្រឹត្យចុះថ្ងៃទី២៣ ខែមីនា ឆ្នាំ២០២២ បានឱ្យដឹងថា ផ្ទៃដីបឹងជើងឯកចំនួន២ទីតាំង សរុបទំហំ១០៦ ៤២៩ម៉ែត្រក្រឡា ស្ថិតនៅសង្កាត់ចាក់អង្រែលើ និងសង្កាត់ចាក់អង្រែក្រោម ខណ្ឌមានជ័យ ត្រូវបានរាជរដ្ឋាភិបាលធ្វើអនុបយោគទៅជាទ្រព្យសម្បត្តិឯកជនរបស់រដ្ឋ និងបានប្រទានកម្មជាកម្មសិទ្ធិជូនទៅលោកឧកញ៉ា ឡោក ហ៊ួរ ផងដែរ។
វីអូឌី មិនអាចសុំការឆ្លើយតបពាក់ព័ន្ធនឹងករណីនេះពីអភិបាលរាជធានីភ្នំពេញ លោក ឃួង ស្រេង និងអ្នកនាំពាក្យ លោក ម៉េត មាសភក្តី បានទេ នៅថ្ងៃអង្គារនេះ។
ប្រធានគម្រោងសិទ្ធិលំនៅឋាន និងស្រាវជ្រាវ នៃអង្គការសមាគមធាងត្នោត លោក ស៊ាង មួយឡៃ មានប្រសាសន៍ថា ករណីរដ្ឋាភិបាលបន្តកាត់ដីផ្ទៃបឹងជើងឯក ទៅឱ្យឯកជន និងស្ថាប័នរដ្ឋ ដើម្បីអភិវឌ្ឍន៍នេះ បានបង្កឱ្យមានការបារម្ភពីផលប៉ះពាល់បរិស្ថាន ដូចជា ប្រព័ន្ធស្តុកទឹក និងរំដោះទឹកចេញពីរាជធានីភ្នំពេញ ខណៈដីផ្ទៃបឹងធម្មជាតិមួយនេះកំពុងតែរួមតូច។
មន្ត្រីសង្គមស៊ីវិលរូបនេះបន្តថា កន្លងមក រដ្ឋាភិបាលបានកាត់ដីផ្ទៃបឹងនានាជាច្រើននៅក្នុងរាជធានីភ្នំពេញ ឱ្យទៅក្រុមហ៊ុនឯកជន ស្ថាប័នរដ្ឋ និងបុគ្គលឯកជនមានលុយមានអំណាចមួយចំនួន សម្រាប់ធ្វើការអភិវឌ្ឍ។ លោកថា ការកាត់ផ្ទៃដីបឹងនេះបានធ្វើឱ្យប៉ះពាល់ដល់បរិស្ថាននិងសង្គមផងដែរ។
លោកបន្ថែមថា៖ «ដោយសារតែទីតាំងដែលកាត់នោះជាទីតាំងមួយដែលភ្ជាប់ពីតំបន់បូមទឹកបឹងត្របែក ចាក់ទៅក្នុងបឹងទំពុន ឬបឹងជើងឯក អ៊ីចឹងចង់មិនចង់ វានឹងធ្វើឱ្យប្រឡាយនៅក្នុងនោះ វាកាន់តែតូចជាងមុន! ហើយកាលណាតូចជាងមុន ចង់មិនចង់ នៅពេលដែលមានភ្លៀងធ្លាក់ខ្លាំងម្តងៗ ធ្វើទឹកមិនអាចហូរទាន់ វាប្រាកដជាស្ទះ ហើយជាលទ្ធផលបញ្ហាទឹកជំនន់ជន់លិចរាជធានីភ្នំពេញ វាកាន់តែអាក្រក់នៅពេលខាងមុខៗ នេះជាការព្រួយបារម្ភរបស់ខ្ញុំ»។
បើតាមការចុះផ្សាយរបស់អង្គការសមាគមធាងត្នោត បឹងទំពុន និងបឹងជើងឯក នៅជាប់គ្នា ដែលមានផ្ទៃដីសរុបប្រមាណ២ ៦០០ហិកតា ស្ថិតក្នុងខណ្ឌមានជ័យ និងខណ្ឌដង្កោ រាជធានីភ្នំពេញ និងក្រុងតាខ្មៅ ខេត្តកណ្ដាល។
អង្គការមួយនេះឱ្យដឹងទៀតថា កាលពីឆ្នាំ២០០៨ រដ្ឋាភិបាលកម្ពុជាបានចេញអនុក្រឹត្យមួយកំណត់យកដីផ្ទៃបឹងនេះត្រឹម៥២០ហិកតាប៉ុណ្ណោះ ជាផ្ទៃបឹងរក្សាទុក និងកំណត់ជាទ្រព្យសម្បត្តិសាធារណៈរបស់រដ្ឋ។
អង្គការធាងត្នោត បន្តថា បឹងនេះមានមុខងារប្រើប្រាស់ច្រើនយ៉ាង ដូចជា អាងស្ដុកទឹក និងរំដោះទឹកភ្លៀងដ៏សំខាន់មួយពីការជន់លិចរាជធានីភ្នំពេញ ដោយរំដោះទឹកបានប្រមាណ៧០ភាគរយ និងជាអាងបន្សុទ្ធទឹកកខ្វក់ក្នុងក្រុងបែបធម្មជាតិ ហើយក៏ជាតំបន់ផ្តល់នូវបរិយាកាសត្រជាក់ដល់ទីក្រុង តំបន់កសិកម្ម ជម្រកពពួកត្រី និងបក្សាបក្សីជាច្រើនប្រភេទកំពុងរស់នៅផងដែរ។
កាលពីអំឡុងឆ្នាំ២០១៩ រដ្ឋាភិបាលក៏បានចេញអនុក្រឹត្យមួយកាត់ផ្ទៃដីបឹងជើងឯកទំហំ១០ហិកតា ឱ្យទៅក្រសួងមហាផ្ទៃ សម្រាប់សាងសង់អគ្គស្នងការដ្ឋាននគរបាលជាតិ ចំនួន៥ហិកតា, អគ្គស្នងការដ្ឋានអត្តសញ្ញាណកម្ម ទំហំ១ហិកតា, សាលារដ្ឋបាលមូលដ្ឋាន ទំហំ២ហិកតា និងមន្ទីរពេទ្យនគរបាលជាតិ ទំហំ២ហិកតា និងកាត់ជូនក្រសួងរៀបចំដែនដី ទំហំ៣២ ១២៣ម៉ែត្រក្រឡា សម្រាប់សាងសង់មន្ទីររៀបចំដែនដី និងកាត់ជូនពលរដ្ឋ៦នាក់ ទំហំ១៦១ ៣៥៧ម៉ែត្រក្រឡា។
ក្នុងឆ្នាំ២០១៩ដែរ រដ្ឋាភិបាលបានកាត់ដីផ្ទៃដីបឹងជើងឯកទំហំ១៩០៤ ២១១ម៉ែត្រក្រឡា ស្ថិតក្នុងសង្កាត់ជើងឯក សង្កាត់ខណ្ឌដង្កោ និងសង្កាត់ចាក់អង្រែក្រោម ឱ្យទៅឧកញ៉ា លាង ឃុន និងឧកញ៉ា ថៃ ជាហួត ធ្វើជាកម្មសិទ្ធិផងដែរ៕
