យោធាដែលកំពុងកាន់អំណាចនៅប្រទេសមីយ៉ាន់ម៉ា អះអាងថា ការកាត់ទោសប្រហារជីវិតសកម្មជនបក្សប្រឆាំងចំនួន៤នាក់ជាទង្វើស្របច្បាប់ និងធ្វើឡើងដើម្បីរកភាពយុត្តិធម៌ជូនប្រជាជន។ នេះបើយោងតាមបណ្ដាញសារព័ត៌មាន Reuters ដែលបានចេញផ្សាយនៅថ្ងៃអង្គារនេះ។
អ្នកនាំពាក្យរបស់របបយោធាមីយ៉ាន់ម៉ា លោក ហ្ស័រ មីន ទុន (Zaw Min Tun) បាននិយាយថា ការប្រហារជីវិតនេះមិនមែនជារឿងផ្ទាល់ខ្លួននោះទេ ប៉ុន្តែធ្វើឡើងដោយស្របច្បាប់ ហើយបុរសទាំងនោះត្រូវបានផ្ដល់ឱកាសដើម្បីការពារខ្លួន។ លោកបន្តថា រដ្ឋាភិបាលយោធាដឹងថា ការប្រហារជីវិតនេះនឹងនាំឱ្យមានការរិះគន់ជាលើកដំបូង ក្នុងរយៈពេលជាច្រើនទសវត្សរ៍កន្លងមកនេះ ក្នុងប្រទេសមីម៉ាន់ម៉ា។
ការលើកឡើងរបស់របបយោធាមីយ៉ាន់ម៉ាបានធ្វើឡើង ក្រោយពីអង្គការសហប្រជាជាតិ និងបណ្តាប្រទេសមួយចំនួននៅលើពិភពលោក បានថ្កោលទោសជាបន្តបន្ទាប់ការដែលរបបយោធាមួយនេះប្រហារជីវិតសកម្មជនបក្សប្រឆាំងចំនួន៤រូប ដោយពួកគេចាត់ទុកករណីនេះថាជាការរំលោភសិទ្ធិមនុស្សធ្ងន់ធ្ងរ និងជាអំពើដ៏ឃោរឃៅមួយ។
គួរបញ្ជាក់ថា អាជ្ញាធរយោធារបស់ប្រទេសមីយ៉ាន់ម៉ាបានប្រហារជីវិតសកម្មជនប្រជាធិបតេយ្យចំនួន៤នាក់ ដែលត្រូវបានចោទប្រកាន់ថាបានចូលរួមអនុវត្ត «អំពើភេរវកម្ម» នៅក្នុងប្រទេស។ បុគ្គលទាំង៤នាក់នេះត្រូវបានតុលាការចោទប្រកាន់កាលពីខែមករាកន្លងទៅ ថាបានចូលរួមចំណែកជួយដល់កងជីវពល ក្នុងការប្រយុទ្ធដោយបង្ហូរឈាមតទល់នឹងកងទ័ពដែលទទួលបានអំណាចតាមរយៈរដ្ឋប្រហារ កាលពីឆ្នាំមុន។
យោងតាមសារព័ត៌មានរបស់មីយ៉ាន់ម៉ា Global New Light ក្នុងចំណោមអ្នកដែលត្រូវបានប្រហារជីវិតដោយព្យួរកទាំងនោះ រួមមាន សកម្មជនប្រជាធិបតេយ្យដ៏លេចធ្លោម្នាក់ លោក ក្យរ មីនយូ (Kyaw Min Yu) ឬត្រូវបានគេស្គាល់ថា ជីមី (Jimmy) អតីតសមាជិកគណបក្សរបស់លោកស្រី អ៊ុងសាន ស៊ូជី លោក ភ្យូ ហ្សេយ៉ា ថរ (Phyo Zeya Thaw) លោក ឡា មីយូ អោង (Hla Myo Aung) និងលោក អោង ធូរ៉ា ហ្ស (Aung Thura Zaw)៕
