តុលាការកំពូល នៅថ្ងៃពុធនេះ បានបដិសេធបណ្ដឹងសុំនៅក្រៅឃុំបណ្ដោះអាសន្នរបស់លោក សៀម ភ្លុក ស្ថាបនិកគណបក្សបេះដូងជាតិ ដោយសម្អាងថា ការអនុញ្ញាតឱ្យនៅក្រៅឃុំបណ្ដោះអាសន្ន ប៉ះពាល់ដល់ដំណើរការនីតិវិធីតុលាការ។
លោក សៀម ភ្លុក ត្រូវបានតុលាការចោទប្រកាន់ពីបទ «ក្លែងបន្លំ និងប្រើប្រាស់លិខិតក្លែង» កាលពីថ្ងៃទី២៧ ខែមេសា ឆ្នាំ២០២២ និងត្រូវបានសមត្ថកិច្ចចាប់ខ្លួននិងបញ្ជូនទៅឃុំខ្លួននៅពន្ធនាគារព្រៃសភ្លាមៗនៅថ្ងៃដដែលនោះ។
លោក ជូង ជូងី មេធាវីការពារក្ដីឱ្យលោក សៀម ភ្លុក បានឱ្យដឹងថា តុលាការកំពូល នៅថ្ងៃទី២៧ ខែកក្កដា ឆ្នាំ២០២២ បានសម្រេចមិនដោះលែងកូនក្ដីលោកឱ្យនៅក្រៅឃុំបណ្ដោះអាសន្នទេ ដោយសម្អាងហេតុផលថា ការវិនិច្ឆយរបស់សាលាឧទ្ធរណ៍រាជធានីភ្នំពេញ មានភាពត្រឹមត្រូវហើយ។
លោកថា៖ «តុលាការកំពូលសម្រេចមិនដោះលែងលោក សៀម ភ្លុក ទេ! សម្អាងថា ការវិនិច្ឆយរបស់សាលាឧទ្ធរណ៍ត្រឹមត្រូវហើយ ដោយត្រូវរក្សាទុកជូនតុលារការចាត់ការតាមនីតិវិធី»។
លោក ជូង ជូងី យល់ឃើញថា ការសម្រេចរបស់តុលាការកំពូលនេះ បានប៉ះពាល់ខ្លាំងដល់សិទ្ធិកូនក្ដីរបស់លោក ដោយអះអាងថា លោក សៀម ភ្លុក មិនបានក្លែងឯកសារ ហើយក៏មិនបានដឹងថាឯកសារដែលបានដាក់ទៅក្រសួងមហាផ្ទៃ នាពេលកន្លងមកនោះ ជាឯកសារក្លែងដែរ។
កាលពីថ្ងៃទី២៦ ខែឧសភា ឆ្នាំ២០២២ សាលាឧទ្ធរណ៍រាជធានីភ្នំពេញ បដិសេធសំណើសុំនៅក្រៅឃុំជាបណ្តោះអាសន្នរបស់លោក សៀម ភ្លុក ដោយលើកហេតុផលថា ដើម្បីរក្សាជនត្រូវចោទជូនតុលាការបន្តនីតិវិធីទៀត។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត បង្ហាញការសោកស្ដាយដែលតុលាការមិនអនុញ្ញាតឱ្យលោក សៀម ភ្លុក នៅក្រៅឃុំ។ លោកបន្តថា ស្ថាបនិកគណបក្សបេះដូងជាតិ ដែលជាជនត្រូវចោទរូបនេះ មិនមានចេតនាក្នុងការក្លែងស្នាមមេដៃនោះទេ តែជាកំហុសខ្វះខាតមួយចំនួនប៉ុណ្ណោះ ហើយករណីនេះក៏មិនបានបង្កការប៉ះពាល់ដល់សង្គមជាតិ ឬនរណាម្នាក់នោះដែរ។
លោកថា៖ «យើងជាអង្គការសង្គមស៊ីវិល យើងមានការសោកស្ដាយដែលថាលោក សៀម ភ្លុក នេះ គួរតែអនុញ្ញាតឱ្យនៅក្រៅឃុំ ហើយដែលគាត់មានបំណងចង់បង្កើតគណបក្សនយោបាយ គួរតែធ្វើតាមផ្លូវច្បាប់ ហើយប្រកួតប្រជែងដោយសេរី ត្រឹមត្រូវ និងយុត្តិធម៌»។
ដោយឡែក កាលពីថ្ងៃទី២២ ខែកក្កដា ឆ្នាំ២០២២នេះ តុលាការកំពូលបានសម្រេចឱ្យលោក ទេព ហ៊ុយ អតីតមេបញ្ជាការកងរាជអាវុធហត្ថក្រុងក្រចេះ ដែលជាប់ចោទពីបទ «ធ្វើទារុណកម្មកុមារី២នាក់ដោយបង្ខំឱ្យស៊ីអាចម៍ឆ្កែ» បាននៅក្រៅឃុំបណ្ដោះអាសន្ន ដោយសម្អាងហេតុថា «មិនមានបទល្មើសផ្សេង» ក្រោយពីជនជាប់ចោទរូបនោះបានជាប់ពន្ធនាគារ៩ខែរួចមក។
ជុំវិញករណីនេះ លោក អំ សំអាត មើលឃើញថា ចំពោះករណីអតីតមេបញ្ជាការកងរាជអាវុធហត្ថក្រុងក្រចេះ ដែលធ្វើទារុណកម្មលើកុមារី២នាក់ដោយបង្ខំឱ្យស៊ីអាចម៍ឆ្កែ ដែលជាការប្រើប្រាស់ទារុណកម្មឃោរឃៅ ហើយត្រូវបានសាធារណជនថ្កោលទោសយ៉ាងខ្លាំងនោះ បែរជាតុលាការកំពូលសម្រេចដោះលែងឱ្យនៅក្រៅឃុំបណ្តោះអាសន្ន ប៉ុន្តែករណីលោក សៀម ភ្លុក ដែលមិនបានបង្កការប៉ះពាល់ដល់សង្គមជាតិ ឬនរណាម្នាក់ បែរជាតុលាការមិនអនុញ្ញាតឱ្យនៅក្រៅឃុំបណ្តោះអាសន្នទៅវិញ។
លោក អំ សំអាត បានលើកឡើងថា៖ «ករណីទាំង២នេះមានភាពខុសគ្នា បើយើងនិយាយពីព្យសនកម្ម អតីតមេបញ្ជាការប៉េអឹមខេត្តក្រចេះ មានការប្រើប្រាស់នូវទារុណកម្មឃោរឃៅ ដែលធ្វើឱ្យសាធារណជនមិនអាចទទួលយកបាន ហើយមានការកាត់ទោស ប៉ុន្ដែទីបញ្ចប់ត្រូវបានតុលាការសម្រេចឱ្យនៅក្រៅឃុំបណ្ដោះអាសន្ន។ តែករណីលោក សៀម ភ្លុក យើងឃើញហើយថា សូម្បីតែក្នុងលិខិតរបស់លោកក៏បញ្ជាក់អំពីគ្មានចេតនាក្នុងការក្លែងមេដៃទេ តែជាកំហុស ជាការខ្វះខាតមួយចំនួន ហើយក៏មិនបង្កឱ្យមានព្យសនកម្មដល់សង្គមជាតិ ដល់នរណាម្នាក់ដែរ ដែលយើងឃើញមានការខុសគ្នាដែរ»។
លោក សៀម ភ្លុក ត្រូវបានក្រសួងមហាផ្ទៃ រកឃើញថា មានជាប់ពាក់ព័ន្ធនឹងការក្លែងស្នាមមេដៃ ដើម្បីបង្កើតគណបក្សបេះដូងជាតិ កាលពីខែមិថុនា ឆ្នាំ២០២១។ នេះបើតាមរបាយការណ៍របស់រដ្ឋមន្ត្រីក្រសួងមហាផ្ទៃ លោក ស ខេង ផ្ញើទៅលោកនាយករដ្ឋមន្ត្រី ហ៊ុន សែន កាលពីខែវិច្ឆិកា ឆ្នាំ២០២១។
ចំណែកលោក សៀម ភ្លុក ធ្លាប់ប្រាប់វីអូឌីថា បើស្ថិតក្នុងមន្ទិលសង្ស័យស្នាមមេដៃក្លែងក្លាយ និងស្នាមមេដៃខូចគុណភាព ឬមានស្នាមមេដៃស្ទួនមែន ក្រសួងមហាផ្ទៃ អាចមានសិទ្ធិបដិសេធឬទាត់ចោលបាន ដោយមិនត្រូវចាត់ទុកស្នាមមេដៃទាំងនោះ ប្រែក្លាយទៅជាបទល្មើសព្រហ្មទណ្ឌនោះទេ៕