ក្រសួងមហាផ្ទៃ និងអង្គការសង្គមស៊ីវិល នៅថ្ងៃព្រហស្បតិ៍នេះ បានសម្ពោធដាក់ឱ្យប្រើប្រាស់កម្មវិធីទូរសព្ទដៃ ឬ App ដែលមានឈ្មោះថា «មតិយើង» សម្រាប់ឱ្យពលរដ្ឋរិះគន់កែលម្អសេវាសាធារណៈនៅថ្នាក់ក្រោមជាតិ និងអាកប្បកិរិយាខ្វះខាតរបស់មន្ត្រីមូលដ្ឋាន ជាពិសេសអំពើពុករលួយ ដោយរក្សាការសម្ងាត់ និងលាក់អត្តសញ្ញាណអ្នករាយការណ៍។
សេចក្ដីថ្លែងការណ៍របស់អង្គការតម្លាភាពកម្ពុជា បញ្ជាក់ថា កម្មវិធីទូរសព្ទដៃ «មតិយើង» ត្រូវបានសហការផលិតឡើងដោយក្រសួងមហាផ្ទៃ អង្គការតម្លាភាពកម្ពុជា និងអង្គការអាក់សិនអេតកម្ពុជា ដែលផ្ដល់មូលនិធិដោយសហភាពអឺរ៉ុប និងរដ្ឋាភិបាលប្រទេសស៊ុយអែត សម្រាប់ឱ្យសាធារណជន ដាក់បណ្ដឹង ស្វែងរកជំនួយ សាកសួរព័ត៌មាន និងវាយតម្លៃសេវាសាធារណៈនៅតាមមូលដ្ឋានរបស់ខ្លួន ដោយឥតគិតថ្លៃ និងដោយសម្ងាត់។
ប្រភពដដែលបន្តថា គោលបំណងនៃការផលិតកម្មវិធីទូរសព្ទដៃនេះ គឺដើម្បីចូលរួមចំណែកក្នុងការធ្វើឱ្យសេវាសាធារណៈនៅកម្ពុជាកាន់តែមានតម្លាភាព បរិយាបន្ន និងគណនេយ្យភាពបន្ថែមទៀត ជាពិសេសសេវាសាធារណៈដែលឆ្លើយតបនឹងតម្រូវការយេនឌ័រ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី ថ្លែងថា ការដាក់ឱ្យដំណើរការជាផ្លូវការនូវកម្មវិធីទូរសព្ទដៃ «មតិយើង» នេះ ជាការបោះជំហានដ៏សំខាន់មួយទៀតឆ្ពោះទៅរកសេវាសាធារណៈប្រកបដោយប្រសិទ្ធភាព ខណៈការប្រើប្រាស់ទូរសព្ទឆ្លាតវៃ និងអ៊ីនធឺណិតនៅក្នុងប្រទេសមានអត្រាខ្ពស់។
លោកថា៖ «កម្មវិធីទូរសព្ទដៃនេះនឹងផ្ដល់ជូនប្រជាពលរដ្ឋ ជាពិសេសយុវជន នូវវេទិកាដ៏ទំនើប ប៉ុន្តែសាមញ្ញ ងាយស្រួលប្រើក្នុងការប្រាស្រ័យទាក់ទងនូវកង្វល់និងតម្រូវការរបស់ពួកគាត់ជាមួយនឹងអ្នកផ្ដល់សេវាសាធារណៈ ដែលនឹងនាំឱ្យមានភាពប្រសើរឡើងនៃអភិបាលកិច្ចល្អ និងការផ្តល់សេវាសាធារណៈកាន់តែឆាប់រហ័ស និងប្រកបដោយគណនេយ្យភាពនៅក្នុងប្រទេស»។
រដ្ឋលេខាធិការក្រសួងមហាផ្ទៃ លោក ងី ច័ន្ទ្រផល បង្ហាញសុទិដ្ឋិនិយមថា កម្មវិធីទូរសព្ទដៃនេះនឹងអាចរួមចំណែកក្នុងការបង្កើនការចូលរួមរបស់ពលរដ្ឋក្នុងការលើកកម្ពស់ការផ្ដល់សេវាសាធារណៈឱ្យកាន់តែមានភាពល្អប្រសើរថែមទៀត ជាពិសេសជួយដល់នាយកដ្ឋានមុខងារ និងធនធាន នៃក្រសួងមហាផ្ទៃ មានភាពងាយស្រួលក្នុងការគ្រប់គ្រងប្រព័ន្ធទិន្នន័យ ដូចជា សំណើ សំណួរ សំណូមពរ ឬបណ្តឹងផ្សេងៗ បានល្អប្រសើរ។
លោកជំរុញឱ្យពលរដ្ឋចូលរួមផ្តល់មតិយោបល់ ដើម្បីទទួលបាននូវសេវាប្រកបដោយគុណភាព តម្លាភាព គណនេយ្យភាព និងចំណេញពេលវេលា ដែលជាការរួមចំណែកដល់សិទ្ធិទទួលបានព័ត៌មាន និងឈានទៅលើកស្ទួយជីវភាពរស់នៅ និងការអភិវឌ្ឍប្រកបដោយសមភាព សមធម៌ និងបរិយាប័ន្ន។
លោកថា៖ «ខ្ញុំសូមឱ្យថ្នាក់ដឹកនាំរាជធានី-ខេត្តនៃតំបន់គោលដៅទាំងអស់ យកចិត្តទុកដាក់ធ្វើការគាំទ្រ និងបន្តផ្ដល់កិច្ចសហការដ៏ល្អ និងជិតស្និទ្ធថែមទៀតក្នុងការជួយសម្របសម្រួល ដើម្បីឱ្យការអនុវត្តកម្មវិធីទូរសព្ទដៃថ្មីនេះប្រព្រឹត្តទៅបានល្អ មានភាពរលូន និងទទួលបានជោគជ័យខ្ពស់»។
បើតាមអង្គការតម្លាភាពកម្ពុជា គិតត្រឹមដើមឆ្នាំ២០២២ កំណែចុងក្រោយនៃកម្មវិធីទូរសព្ទដៃ «មតិយើង» ត្រូវបានផលិតឡើង និងដាក់ឱ្យប្រើប្រាស់សាកល្បងនៅតាមរដ្ឋបាលថ្នាក់ក្រោមជាតិ ក្នុងតំបន់គោលដៅនៃគម្រោង រួមមាន អង្គភាពច្រកចេញចូលតែមួយ, ការិយាល័យប្រជាពលរដ្ឋថ្នាក់រាជធានី-ខេត្តចំនួន៣, ការិយាល័យច្រកចេញចូលតែមួយ និងការិយាល័យប្រជាពលរដ្ឋថ្នាក់ក្រុង-ស្រុកចំនួន៨ និងរដ្ឋបាលឃុំ-សង្កាត់ចំនួន៣០៕
