រដ្ឋសភាអនុម័តទាំងស្រុងលើសេចក្តីព្រាងវិសោធនកម្មធម្មនុញ្ញ និងច្បាប់ធម្មនុញ្ញបន្ថែម ដោយសំឡេង១០៥ លើ ១០៦សំឡេង។
រដ្ឋសភា នៅព្រឹកថ្ងៃទី២៨ ខែកក្កដា ឆ្នាំ២០២២នេះ បានបើកកិច្ចប្រជុំពេញអង្គរបស់ខ្លួន ដើម្បីពិភាក្សា និងអនុម័តលើរបៀបវារៈមួយចំនួន ក្នុងនោះមានសេចក្តីព្រាងច្បាប់ធម្មនុញ្ញ ស្តីពីវិសោធនកម្មមាត្រា ១៩ថ្មី(មួយ) មាត្រា៨៩ មាត្រា៩៨ មាត្រា១០២ថ្មី មាត្រា១១៩ថ្មី(មួយ) និងមាត្រា១២៥ថ្មី នៃរដ្ឋធម្មនុញ្ញ និងមាត្រា៣ថ្មី និងមាត្រា៤ថ្មីនៃច្បាប់ធម្មនុញ្ញបន្ថែម។
កិច្ចប្រជុំពេញអង្គរដ្ឋសភា នៅព្រឹកនេះ មានការចូលរួមពីសមាជិកសមាជិកាសភាសរុបចំនួន ១០៦រូប ក្នុងនោះក៏មានលោកនាយករដ្ឋមន្ត្រី ហ៊ុន សែន ផងដែរ។
ការសម្រេចអនុម័តទាំងស្រុងលើសេចក្តីព្រាងវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមទាំង ៨មាត្រា ដោយសំឡេង ១០៥ លើ ១០៦ សំឡេងនេះ មិនត្រូវបានសមាជិករដ្ឋសភាឯកបក្សឆ្លងកាត់ការពិភាក្សាច្រើននោះទេ។
រដ្ឋមន្ត្រីក្រសួងយុត្តិធម៌ លោក កើត រិទ្ធ បានថ្លែងនៅក្នុងកិច្ចប្រជុំនោះថា ការធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមនូវមាត្រាចំនួន៨នោះ ដើម្បីបំពេញសេចក្តីខ្វះចន្លោះនៃរដ្ឋធម្មនុញ្ញដើម ដើម្បីឱ្យស្ថាប័នកំពូលរបស់ជាតិដំណើរការទៅដោយរលូន មិនជាប់គាំង និងធានាស្ថិរភាពនយោបាយ និងការពារប្រយោជន៍ជាតិ។
ក៏ប៉ុន្តែសម្រាប់គណបក្សក្រៅរដ្ឋាភិបាល និងអង្គការសង្គមស៊ីវិលមួយចំនួននៅតែយល់ថា ការធ្វើវិសោធនកម្មរដ្ឋធម្មនុញ្ញ និងច្បាប់ធម្មនុញ្ញបន្ថែមនេះ នឹងធ្វើឱ្យខាតប្រយោជន៍ជាតិច្រើនជាងផលចំណេញ។
កាលពីថ្ងៃទី២១ ខែកក្កដា ឆ្នាំ២០២២ គណបក្សនយោបាយចំនួន៤ដែលនៅក្រៅរដ្ឋាភិបាលបានស្នើរដ្ឋសភាកុំឱ្យអនុម័តការស្នើកែរដ្ឋធម្មនុញ្ញលើកទី១០ ដែលស្នើឡើងដោយបក្សកាន់អំណាច ដោយសម្អាងថា កែស្នើកែច្បាប់កំពូលជាថ្មីទៀតនេះ បានកាត់បន្ថយអំណាចសភា រារាំងដល់ដំណើរការប្រជាធិបតេយ្យ សេរីពហុបក្សផ្ទុយនឹងស្មារតីរដ្ឋធម្មនុញ្ញដើម។
ជាមួយគ្នានេះដែរ កាលពីថ្ងៃម្សិលមិញ ក្រុមអង្គការសង្គមស៊ីវិលជាង១០០ស្ថាប័នបង្ហាញការព្រួយបារម្ភជុំវិញការធ្វើវិសោធកម្មរដ្ឋធម្មនុញ្ញលើកទី១០នេះដែរ ដោយថា ការធ្វើវិសោធនកម្មរដ្ឋធម្មនុញ្ញនេះ អាចនឹងធ្វើឱ្យប៉ះពាល់ដល់ស្ថេរភាពអំណាចរដ្ឋ និងអំណាចនីតិប្រតិបត្តិ ការគោរពសិទ្ធិសេរីភាពពលរដ្ឋខ្មែរ ដែលបានចារិកនៅក្នុងរដ្ឋធម្មនុញ្ញ។
ទោះយ៉ាងណា លោក កើត រិទ្ធ បានច្រាលចោលនូវការលើកឡើង និងកង្វល់ទាំងនេះ ដោយថាជាការបំភ្លៃការពិត និងយកភាពខ្វះចន្លោះនៃរដ្ឋធម្មនុញ្ញ ទៅតថ្លៃផ្នែកនយោបាយ ដើម្បីជាប្រយោជន៍ដែលពួកគេចង់បាន។
បើតាមសេចក្តីព្រាងស្នើធ្វើវិសោធនកម្មរដ្ឋធម្មនុញ្ញលើកទី១០ រដ្ឋាភិបាលបានស្នើកែ៨មាត្រា ក្នុងនោះរួមមានមាត្រា៨៩ និង៩៨ ផងដែរ។
មាត្រា៩៨ថ្មី(មួយ)នោះ ចែងថា រដ្ឋសភាអាចទម្លាក់សមាជិកគណៈរដ្ឋមន្ត្រី ឬទម្លាក់រាជរដ្ឋាភិបាលពីតំណែង ដោយអនុម័តញត្តិបន្ទោសតាមសំឡេងឆ្នោតភាគច្រើនដាច់ខាតនៃចំនួនសមាជិករដ្ឋសភាទាំងមូល។ ក្នុងករណីរាជរដ្ឋាភិបាលត្រូវបានទម្លាក់ពីមុខតំណែងដោយរដ្ឋសភា រាជរដ្ឋាភិបាលដែលត្រូវចេញពីមុខតំណែងនេះមានតែភារកិច្ចដឹកនាំការងារប្រចាំថ្ងៃតែប៉ុណ្ណោះ រហូតដល់មានរាជរដ្ឋាភិបាលថ្មីចូលកាន់តំណែង។
ចំណែកក្នុងវាក្យខណ្ឌទី២នៃមាត្រាដដែល ចែងថា ញត្តិបន្ទោសរាជរដ្ឋាភិបាលត្រូវបានលើកឡើងជូនរដ្ឋសភា ដោយតំណាងរាស្ត្រចំនួនមួយភាគបី ឬស្មើ៤២រូបនៃចំនួនសមាជិកសភា១២៥រូប អាចលើកយកមកពិភាក្សាបាន ខណៈមាត្រា៩៨ចាស់កំណត់ថា ញត្តិបន្ទោសរាជរដ្ឋាភិបាលត្រូវបានលើកឡើងជូនរដ្ឋសភា ដោយតំណាងរាស្ត្រចំនួន៣០នាក់ប៉ុណ្ណោះ។
គិតចាប់តាំងពីការបង្កើតរដ្ឋធម្មនុញ្ញឡើងក្នុងឆ្នាំ១៩៩៣ រហូតមកដល់ពេលបច្ចុប្បន្ននេះ កម្ពុជាបានធ្វើវិសោធនកម្មរដ្ឋធម្មនុញ្ញចំនួន១០លើកមកហើយ ខណៈច្បាប់ធម្មនុញ្ញបន្ថែម ក៏ត្រូវយកមកធ្វើវិសោធនកម្មជាមួយគ្នាផងដែរ៕