ប្រជាពលរដ្ឋដែលរងផលប៉ះពាល់ពីគម្រោងអភិវឌ្ឍន៍ផ្លូវដែក មកពីសង្កាត់ចំនួន៣ ក្នុងខណ្ឌទួលគោក និងខណ្ឌដូនពេញ បាននាំគ្នាទៅប្រមូលផ្ដុំនៅមុខរដ្ឋបាលរាជធានីភ្នំពេញ ទាមទារឱ្យអាជ្ញាធរពន្លឿនការដោះស្រាយរឿងដីធ្លី ដោយដោះស្រាយផ្ដល់សំណងដីនៅទីតាំងថ្មី នៅក្នុងខណ្ឌដែលពួកគាត់រស់នៅ។
សេចក្ដីជូនដំណឹងរបស់ពលរដ្ឋ កាលពីថ្ងៃម្សិលមិញ ឱ្យដឹងថា កាលពីថ្ងៃទី៨ និងទី១៣ ខែកក្កដា ឆ្នាំ២០២២ តំណាងប្រជាពលរដ្ឋនៅភូមិ១៦ ភូមិ១៧ ភូមិ២ និងភូមិ២៣ ស្ថិតក្នុងសង្កាត់បឹងកក់២ សង្កាត់ស្រះចក និងសង្កាត់ទឹកល្អក់១ ខណ្ឌទួលគោក និងខណ្ឌដូនពេញ បានជួបប្រជុំជាមួយអាជ្ញាធរខណ្ឌនិងសង្កាត់ ក្នុងនោះ អាជ្ញាធរបានជំរុញឱ្យគ្រួសារពួកគាត់ដែលរងផលប៉ះពាល់ទាំងស្រុង ទៅយកដីនៅតំបន់ 7NG ខេត្តកណ្តាល និងនៅសង្កាត់គោកខ្សាច់ ខណ្ឌកំបូល ជំនួសឱ្យការបាត់បង់ផ្ទះដែលពួកគេកំពុងរស់នៅបច្ចុប្បន្ន។ ករណីនេះ ពលរដ្ឋទាំងនោះបញ្ជាក់ថា ពួកគាត់មិនអាចទទួលយកបានទេចំពោះការដោះដូរដីនេះ ដោយសារតំបន់ទាំងនោះនៅឆ្ងាយពីទីតាំងដែលពួកគាត់ធ្លាប់រស់នៅ។
ក្រុមពលរដ្ឋបានស្នើសុំអាជ្ញាធរអភិវឌ្ឍនៅនឹងកន្លែង ឬស្នើសុំដីនៅក្រោយវត្តទួលអស់លោក ក្នុងខណ្ឌទួលគោក ដូចពលរដ្ឋផ្សេងទៀតក្នុងខណ្ឌឫស្សីកែវ ដែលអាជ្ញាធរបានផ្ដល់ដីឡូត៍ដល់ពួកគេក្នុងខណ្ឌដែលពួកគេរស់នៅ។
ក្នុងការប្រមូលផ្ដុំនៅមុខរដ្ឋបាលរាជធានីភ្នំពេញ នៅព្រឹកថ្ងៃសុក្រនេះ អ្នកស្រី មាស ស្រីភាព រស់នៅភូមិ១៦ សង្កាត់ទឹកល្អក់ទី១ ខណ្ឌទួលគោក មានប្រសាសន៍ថា ពលរដ្ឋជាង៤០គ្រួសារបានរងផលប៉ះពាល់ទាំងស្រុង ដោយសារគម្រោងអភិវឌ្ឍន៍ផ្លូវដែកទៅជាផ្លូវបេតុងរបស់រដ្ឋនេះ។
អ្នកស្រីបន្តថា ពួកគាត់មិនអាចទទួលយកដំណោះស្រាយរបស់អាជ្ញាធរ ដែលដោះដូរដីនៅតំបន់ឆ្ងាយពីទីតាំងដែលពួកគាត់ធ្លាប់រស់នៅនោះឡើយ ព្រោះនឹងធ្វើឱ្យប៉ះពាល់ដល់ជីវភាព និងឆ្ងាយពីទីតាំងប្រកបរបររបស់ពួកគាត់។
អ្នកស្រីនិយាយថា៖ «ពួកខ្ញុំសុំឱ្យពួកគាត់ [អាជ្ញាធររាជធានីភ្នំពេញ] ហ្នឹងជួយពន្លឿនការដោះស្រាយឱ្យខ្ញុំ ឱ្យដូច[ពលរដ្ឋ]នៅខាងខណ្ឌឫស្សីកែវ។ ហើយខ្ញុំចង់បានដីនៅក្រោយវត្តទួល នៅក្នុងខណ្ឌទួលគោក ដូចគេដែរ គេបានដីក្នុងខណ្ឌគេ ខ្ញុំក៏ចង់បានដីក្នុងខណ្ឌខ្ញុំដែរ»។
បើតាមអ្នកស្រី មាស ស្រីភាព ការដែលពលរដ្ឋនាំគ្នាទៅប្រមូលផ្ដុំនៅមុខរដ្ឋបាលរាជធានីភ្នំពេញនេះ ដោយសារតែពួកគាត់បារម្ភពីការបណ្ដេញចេញដោយបង្ខំ ខណៈគម្រោងអភិវឌ្ឍន៍ផ្លូវរថភ្លើងនោះនឹងចាប់ផ្ដើមនាពេលឆាប់ៗនេះ ហើយពួកគាត់នៅពុំទាន់ទទួលបានដំណោះស្រាយជាក់លាក់នៅឡើយ។
វីអូឌី មិនអាចសុំការបញ្ជាក់ពីអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានទេ នៅថ្ងៃនេះ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត ដែលតាមដានករណីនេះ ធ្លាប់អះអាងថា អាជ្ញាធរពាក់ព័ន្ធ ជាពិសេសអភិបាលរាជធានីភ្នំពេញ ត្រូវពន្លឿនដោះស្រាយបញ្ហាដីធ្លីជូនពលរដ្ឋទាំងនោះឱ្យបានឆាប់ និងទទួលបានសំណងសមរម្យ ដើម្បីបញ្ចៀសនូវអំពើហិង្សាកើតឡើងជាយថាហេតុ។
ប៉ុន្តែលោកថា បើរដ្ឋបាលរាជធានីភ្នំពេញមិនពន្លឿនដោះស្រាយបញ្ហាដីធ្លីជូនពលរដ្ឋឱ្យបានឆាប់ទេ ហើយធ្វើការអភិវឌ្ឍដោយបណ្ដេញពលរដ្ឋទាំងបង្ខំនោះ អាចនឹងធ្វើឱ្យមានអំពើហិង្សារវាងពលរដ្ឋនិងសមត្ថកិច្ច ហើយអ្នកដែលរងគ្រោះកាន់តែធ្ងន់ធ្ងរគឺជាប្រជាពលរដ្ឋ៕
