សាលាក្រុង​ចាប់ផ្ដើម​ស្ថាបនា​ផ្លូវ​ដែល​ខូចខាត​ដោយសារ​តែ​ករណី​បាក់ច្រាំង​ទន្លេ​ក្នុង​ខណ្ឌជ្រោយចង្វារ​ឡើងវិញ

​​អ្នកស្រី រស់ បូរ៉ានី អាយុ៣៤ឆ្នាំ បច្ចុប្បន្នមានផ្ទះ​ចម្ងាយ​មិនដល់​១ម៉ែត្រ​ពី​មាត់​ទន្លេ ឈរមើលនៅផ្នែកខាងក្រោយផ្ទះជាប់នឹងច្រាំងដែលបានបាក់មួយផ្នែក នៅតាមបណ្ដោយទន្លេសាប ក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ថ្ងៃទី២៦ ខែកក្កដា ឆ្នាំ២០២២។ (ហ៊ាន រង្សី)

មន្ត្រីសាលារាជធានីភ្នំពេញបានឱ្យដឹងថា ពួកគេនឹងចាប់ផ្ដើមសាងសង់ឡើងវិញនូវកំណាត់ផ្លូវមួយខ្សែតាមដងទន្លេសាប ក្នុងសង្កាត់ព្រែកតាសេក ខណ្ឌជ្រោយចង្វារ ដែលរងនូវការខូចខាតដោយសារតែករណីបាក់ច្រាំងចូលទន្លេ ក្នុងខណ្ឌជ្រោយចង្វារ កាលពីដើមឆ្នាំនេះ។

ការអះអាងនេះត្រូវបានធ្វើឡើង ខណៈអភិបាលរាជធានីភ្នំពេញ លោក ឃួង ស្រេង បានចុះទៅពិនិត្យតំបន់នេះដោយផ្ទាល់កាលពីថ្ងៃអង្គារកន្លងទៅ និងសន្យាថានឹងសាងសង់ផ្លូវនេះឡើងវិញឱ្យបានឆាប់តាមដែលអាចធ្វើទៅបាន។

ទាក់ទិននឹងករណីនេះ មន្ត្រីសង្កាត់មួយរូបក៏​បាន​ឱ្យដឹង​កាលពី​ថ្ងៃ​ពុធផងដែរ​ថា សម្ភារសម្រាប់ស្ថាបនាផ្លូវនេះឡើងវិញ​ត្រូវ​បាន​ដឹកជញ្ជូន​ទៅកាន់​តំបន់​នោះ​រួចរាល់​ហើយ។

ចៅសង្កាត់ព្រែកតាសេក លោក អឿ ស៊ីផុន បានបញ្ជាក់ថា ខ្សាច់និងថ្មធំៗត្រូវបានដឹកជញ្ជូនទៅកាន់តំបន់នោះរួចរាល់ហើយ ដើម្បីត្រៀមចាប់ផ្ដើមការស្ថាបនាសាងសង់ផ្លូវមួយខ្សែនេះឡើងវិញ។

លោក​​បន្តថា សម្រាប់ដំណាក់កាលដំបូង សាលាក្រុងនឹង​ស្ថាបនាគ្រោងផ្លូវជា​បណ្ដោះអាសន្ន​សិន ខណៈកិច្ចការបន្ថែម​ទៀត​នឹង​ត្រូវ​សាងសង់នៅ​ពេលដែលរដូវភ្លៀងបញ្ចប់ទៅ។

ផ្លូវមួយខ្សែត្រូវបានដាក់បម្រាមឆ្លងកាត់ធ្វើដំណើរ ក្រោយពីរងនូវការបាក់ច្រាំង នៅតាមបណ្ដោយទន្លេសាប ក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ថ្ងៃទី២៦ ខែកក្កដា ឆ្នាំ២០២២។
ផ្លូវមួយខ្សែត្រូវបានដាក់បម្រាមឆ្លងកាត់ធ្វើដំណើរ ក្រោយពីរងនូវការបាក់ច្រាំង នៅតាមបណ្ដោយទន្លេសាប ក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ថ្ងៃទី២៦ ខែកក្កដា ឆ្នាំ២០២២។ (ហ៊ាន រង្សី)

សម្រាប់ករណីបាក់ច្រាំងចូលទៅក្នុងទន្លេនេះ លោក អឿ ស៊ីផុន មិនអាចបញ្ជាក់ពីហេតុផលច្បាស់លាស់ឡើយ។ ទោះជាយ៉ាងណា លោកថា វាអាចបណ្តាលមកពីដីជ្រាបទឹកចេញពីព្រែកតាគង់ ដែលធ្វើឱ្យដីផ្នែកខាងក្រោមជ្រាយ ទើបឈានទៅដល់ការបាក់ចូលទៅក្នុងទន្លេ ខណៈករណីនេះបានកើតឡើងចំនួន៣ដងរួចមកហើយ។

លោក​បន្ត​ថា​៖ «​នៅ​ពេល​ដែល​ព្រែកត្រូវបានចាក់បំពេញ ទឹក​បាន​ហូរច្រោះ​ចូល​ដីក្នុង​រយៈពេលពី៤ទៅ៥ឆ្នាំ ​និងបន្តហូរ​យឺតៗ​ចូល​ទន្លេ ដូច្នេះ​ហើយ​ទើប​វាអាចឈានដល់ករណីនៃការបាក់ច្រាំងបែបនេះ»។​

លោក អឿ ស៊ីផុន បន្ថែមថា ករណី​នេះ​បាន​ធ្វើ​ឱ្យពលរដ្ឋរស់​នៅ​តាម​មាត់​ទន្លេ ដែលភាគច្រើនមិនសូវជាមានជីវភាពធូរធារ ​មាន​ការ​ព្រួយ​បារម្ភយ៉ាងខ្លាំង ដោយពួកគេមានការភ័យខ្លាចថា វាអាចនឹង​បន្តបាក់​ទៀតនៅថ្ងៃខាងមុខ។

លោកថា៖ «ចំពោះអ្នក​ដែល​មាន​ផ្ទះសាងសង់​នៅ​តាម​ដង​ទន្លេ ពួកគេពិតជាប្រឈមនឹងគ្រោះថ្នាក់​ខ្លាំងណាស់ ដោយសារតែករណីបាក់ច្រាំងចូលទឹកទន្លេនេះ​អាចនឹង​កើត​មានឡើង​គ្រប់ពេល។ មានពេលខ្លះ ពួកគេទាំងអស់នោះមិនហ៊ានសូម្បីតែគេងនៅពេលយប់ ដោយសារតែមានការព្រួយបារម្ភពីការបាក់ដីនេះ»។

កាល​ពី​ខែ​ឧសភាកន្លងទៅ ករណីបាក់ច្រាំងទន្លេនេះក៏កើតមានឡើងក្នុង​ក្រុង​តាខ្មៅ ខេត្ត​កណ្ដាល ផងដែរ ដែលក្នុងនោះបានបណ្ដាលឱ្យហេដ្ឋារចនាសម្ពន្ធ រួមនឹងមួយផ្នែកនៃវិហារចិន ដែលត្រូវបានគេស្គាល់ថាជា «វិហារ​លោកតា សា​ថៃ​ជឺ» រងនូវការខូចខាតផងដែរ ដោយមន្រ្តីអះអាងថា ករណីនេះកើតឡើងដោយសារតែ​ភ្លៀង​ធ្លាក់​ខ្លាំង។

គួរបញ្ជាក់ថា ករណីបាក់ច្រាំងទន្លេនៅតាមដងទន្លេសាប ទន្លេមេគង្គ និងទន្លេបាសាក់ ដែលត្រូវបានរាយការណ៍ជាបន្តបន្ទាប់នេះ ក៏ត្រូវបានសង្កេតឃើញថា កើតមានឡើងបន្ទាប់ពីសកម្មភាពបូមខ្សាច់ចេញពីទន្លេទាំង៣នេះកើនឡើង ក្នុងរយៈពេលប៉ុន្មានឆ្នាំចុងក្រោយនេះផងដែរ។

ត្រលប់មកកាន់ពលរដ្ឋក្នុងសង្កាត់ព្រែកតាសេកវិញ ដែលបច្ចុប្បន្នរស់នៅចម្ងាយពីមាត់ទន្លេមិនដល់មួយម៉ែត្រផងដែរនោះ បានឱ្យដឹងថា ពួកគាត់ពិតជាមានការព្រួយបារម្ភយ៉ាងខ្លាំងអំពីបញ្ហាទឹកហូរច្រោះដីបន្ថែមទៀតនេះ ដែលអាចនឹងលេបត្របាក់ផ្ទះសម្បែងរបស់ពួកគេនៅពេលអនាគត ខណៈមួយចំនួនទៀតព្រួយបារម្ភអំពីបញ្ហាផ្លូវធ្វើដំណើរទៅកាន់ភូមិ ប្រសិនបើផ្លូវដែលរងនូវការខូចខាតមិនត្រូវបានសាងសង់ឡើងវិញ។

​​អ្នកស្រី រស់ បូរ៉ានី អាយុ៣៤ឆ្នាំ ដែលបច្ចុប្បន្នមានផ្ទះ​ចម្ងាយ​មិនដល់​១ម៉ែត្រ​ពី​មាត់​ទន្លេ បានលើកឡើងថា អ្នកស្រីក៏មានការព្រួយបារម្ភថា ផ្ទះ​របស់​ខ្លួននៅថ្ងៃណាមួយក៏​អាច​នឹង​បាក់ចូលទៅក្នុងទឹកទន្លេផង​ដែរ។

ជាការឆ្លើយតប​ អ្នកស្រីបាន​ចាត់​វិធាន​ការ​បង្ការទុកមុន​មួយ​ចំនួន ដែលរួមមានដូចជាការច្រៀកគ្រឹះផ្ទះបង្ការកុំឱ្យផ្ទះរអិលធ្លាក់ចូលទៅក្នុងទន្លេទាំងមូល។

អ្នករស់នៅតាមមាត់ច្រាំងទន្លេ រៀបចំដាក់បាវខ្សាច់ទប់គ្រឹះផ្ទះបង្ការកុំឱ្យផ្ទះរអិលធ្លាក់ចូលទៅក្នុងទន្លេទាំងមូល នៅតាមបណ្ដោយទន្លេសាប ក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ថ្ងៃទី២៦ ខែកក្កដា ឆ្នាំ២០២២។
អ្នករស់នៅតាមមាត់ច្រាំងទន្លេ រៀបចំដាក់បាវខ្សាច់ទប់គ្រឹះផ្ទះបង្ការកុំឱ្យផ្ទះរអិលធ្លាក់ចូលទៅក្នុងទន្លេទាំងមូល នៅតាមបណ្ដោយទន្លេសាប ក្នុងសង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ ថ្ងៃទី២៦ ខែកក្កដា ឆ្នាំ២០២២។ (ហ៊ាន រង្សី)

អ្នកស្រីបន្ថែមថា នេះគឺ​ជា​លើក​ទី​មួយ​ហើយ​សម្រាប់អ្នកស្រីដែល​​ឃើញ​ច្រាំង​ទន្លេ​ក្បែរ​ផ្ទះ​ធ្លាក់​ចូល​ក្នុងទន្លេបែបនេះ។

អ្នកស្រី រស់ បូរ៉ានី បន្តថា៖ «ខ្ញុំបារម្ភថា ផ្ទះរបស់ខ្ញុំនៅពេលខាងមុខនេះក៏អាចនឹងធ្លាក់ចូលទៅក្នុងទឹកទន្លេផងដែរ។ ទោះជាយ៉ាងណា អារម្មណ៍ភ័យខ្លាចរបស់ខ្ញុំហាក់មានភាពធូរស្រាលបន្តិច ខណៈអភិបាលរាជធានីភ្នំពេញបានចុះមកពិនិត្យទីតាំង ដោយលោកសន្យាថានឹងចាប់ផ្តើមស្ថាបនាសាងសង់ផ្លូវឡើងវិញ»។

ពលរដ្ឋក្នុងតំបន់មួយរូបទៀត អ្នកស្រី កែម លឹម អាយុ៧៣ឆ្នាំ ដែលមានផ្ទះហាក់នៅឆ្ងាយពីច្រាំងទន្លេជាងអ្នកស្រី រស់ បូរ៉ានី បន្តិច បានលើកឡើងថា អ្នកស្រីក៏បានសង្កេតឃើញពីករណីបាក់ច្រាំងចូលទន្លេនេះបន្តិចម្ដងៗដែរ ខណៈអ្នកស្រីមានការព្រួយ​បារម្ភ​ថា ​ផ្ទះ​របស់​ខ្លួនក៏​អាចនឹងរងនូវ​ផល​ប៉ះពាល់​នៅថ្ងៃខាងមុខ។

ទាក់ទិននឹងករណីនេះ អ្នកស្រី​ចង់​ស្នើឱ្យ​រដ្ឋាភិបាល​សាងសង់​ផ្លូវ​នេះ​ឡើង​វិញ និង​ពង្រឹង​តាមច្រាំងទន្លេ​ ដើម្បី​ការពារ​កុំ​ឱ្យ​មាន​ឧបទ្ទវហេតុនេះ​កើតឡើង​នៅ​ពេល​អនាគត។

អ្នកស្រីបន្ថែម​ថា​៖ «​ករណីបាក់​ដីនេះ​បាន​កើតមាន​ឡើង​ជា​រៀង​រាល់​ឆ្នាំ ប៉ុន្តែ​វាមិន​ដែលធ្ងន់ធ្ងរ​ដូច​ឆ្នាំ​នេះ​ឡើយ»៕


បកប្រែនិងសម្រួលចេញពីអត្ថបទដើមភាសាអង់គ្លេស៖ City Hall Starts Rebuilding Road After Chroy Changva Riverbank Collapse

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ