កូនប្រុសមួយរូបរបស់នាយឧត្ដមសេនីយ៍ គន់ គីម ដែលស្ថិតនៅក្នុងបញ្ជីខ្មៅរបស់អាមេរិក ត្រូវបានតែងតាំងជាអភិបាលខេត្តព្រះវិហារថ្មី ខណៈគិតរហូតមកដល់ពេលនេះ មានសែស្រឡាយមន្រ្តីជាន់ខ្ពស់មកពីគណបក្សកាន់អំណាចចំនួន៩រូបហើយដែលកំពុងតែកាន់តំណែងជាអភិបាលខេត្តទូទាំងប្រទេស។
លោក គីម រិទ្ធី ដែលគេដឹងថាជាកូនប្រុសរបស់លោក គន់ គីម ត្រូវបានតែងតាំងជាអភិបាលខេត្តព្រះវិហារថ្មី ដោយព្រះរាជក្រឹត្យរបស់ព្រះមហាក្សត្រនរោត្ដម សីហមុនី ដែលបានឡាយព្រះហស្តកាលពីថ្ងៃអង្គារកន្លងទៅ។
កូនប្រុសរបស់នាយឧត្ដមសេនីយ៍ជាន់ខ្ពស់រូបនេះ កាលពីពេលកន្លងទៅ ក៏ធ្លាប់កាន់តំណែងជាអភិបាលរងខេត្តកណ្ដាលនៅអំឡុងឆ្នាំ២០១៤ រហូតដល់ខែកុម្ភៈ ឆ្នាំ២០២២ ទើបរដ្ឋាភិបាលបានសម្រេចផ្ទេរភារកិច្ចលោកពីអភិបាលរងខេត្តកណ្ដាល ឱ្យមកកាន់តំណែងជាអគ្គនាយករងនៃអគ្គនាយកដ្ឋានរដ្ឋបាលក្រសួងមហាផ្ទៃវិញ។
គួរបញ្ជាក់ថា បច្ចុប្បន្ន យ៉ាងហោចណាស់មានសែស្រឡាយមន្រ្តីជាន់ខ្ពស់មកពីគណបក្សកាន់អំណាចចំនួន៨រូបផ្សេងទៀតក៏កំពុងតែកាន់តំណែងជាអភិបាលខេត្តនេះផងដែរ ដែលក្នុងនោះរួមមាន៖
- អភិបាលខេត្តកំពត លោក ម៉ៅ ធនិន ដែលត្រូវជាក្មួយប្រសារបស់លោកនាយករដ្ឋមន្ត្រី ហ៊ុន សែន។
- អភិបាលខេត្តកែប លោក សោម ពិសិដ្ឋ ដែលត្រូវជាកូនប្រុសរបស់តំណាងរាស្រ្ត លោក សោម ចិន។
- អភិបាលខេត្តកោះកុង លោកស្រី មិថុនា ភូថង ដែលត្រូវជាកូនស្រីរបស់អតីតអភិបាលខេត្តកោះកុង លោក យុទ្ធ ភូថង និងជាចៅស្រីរបស់លោក សាយ ភូថង អតីតសមាជិកគណៈអចិន្ត្រៃយ៍គណបក្សប្រជាជនកម្ពុជា។
- អភិបាលខេត្តមណ្ឌលគិរី លោក ថង សាវុន ដែលត្រូវជាកូនប្រុសអតីតរដ្ឋមន្ត្រីក្រសួងការពារជាតិ និងសមាជិកព្រឹទ្ធសភាគណបក្សប្រជាជនកម្ពុជា លោក ប៊ូ ថង។
- អភិបាលខេត្តឧត្ដរមានជ័យ លោក ប៉ែន កុសល ដែលត្រូវជាកូនប្រសាប្រធានរដ្ឋសភា លោក ហេង សំរិន។
- អភិបាលខេត្តព្រៃវែង លោក ជា សុមេធី ដែលត្រូវជាកូនប្រុសរបស់លោក ជា ស៊ីម អតីតប្រធានគណបក្ស និងជាអតីតប្រធានព្រឹទ្ធសភា។
- អភិបាលខេត្តសៀមរាប លោក ទៀ សីហា ដែលត្រូវជាកូនប្រុសរបស់រដ្ឋមន្ត្រីក្រសួងការពារជាតិ លោក ទៀ បាញ់។
- អភិបាលខេត្តត្បូងឃ្មុំ លោក ជាម ច័ន្ទសោភ័ណ ដែលត្រូវជាកូនប្រុសលោក ជាម យៀប តំណាងរាស្រ្តមកពីគណបក្សប្រជាជនកម្ពុជា។
ទាក់ទិននឹងករណីនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន បានលើកឡើងថា ការរៀបចំធនធានមនុស្សជំនាន់ក្រោយ គឺជាភារកិច្ចមួយរបស់គណបក្ស។
លោកថា៖ «គ្រប់គណបក្សទាំងអស់មានតួនាទីក្នុងការបណ្ដុះយុវជនជំនាន់ក្រោយឱ្យក្លាយជាអ្នកបន្តវេន។ ដូច្នេះហើយ ការដែលគណបក្សប្រជាជនកម្ពុជាកសាងយុវជន និងលើកកម្ពស់យុវជនរបស់ខ្លួនក្នុងការទទួលបានតំណែងសំខាន់ៗ គឺជារឿងធម្មតា»។
ទោះជាយ៉ាងណា អ្នកនាំពាក្យរូបនេះបន្ថែមថា វាមិនមែនមានន័យថា សាច់ញាតិរបស់ថ្នាក់ដឹកនាំគណបក្សទាំងអស់ត្រូវតែតែងតាំងជាអភិបាលខេត្តទាំងអស់ឡើយ។
លោកថា៖ «សម្រាប់កូនៗរបស់ពួកគេ [មន្រ្តីជាន់ខ្ពស់] គឺពួកគេក៏ត្រូវតែមានលក្ខណៈសម្បត្តិគ្រប់គ្រាន់ផងដែរ ក្នុងការទទួលបានតំណែងនានា [ក្នុងជួររដ្ឋាភិបាល]។ គណបក្សប្រជាជនកម្ពុជា មិនមែនចេះតែជ្រើសរើសមន្រ្តីទទួលបានតំណែង [ដោយមិនមានការគិតពិចារណា] ឡើយ។ ពួកគេទាំងអស់សុទ្ធសឹងតែទទួលបានការអប់រំនៅបរទេស ប្រកបដោយកម្រិតនៃការអប់រំវិញ្ញាបនបត្រ និងសីលធម៌ខ្ពស់ ជាមួយនឹងមុខតំណែងច្បាស់លាស់»។
ជាមួយគ្នានេះ លោកបន្តថា ពួកគេទាំងនោះជាច្រើនក៏មានស្មារតីស្នេហាជាតិពីឪពុកម្ដាយរបស់ពួកគេ និងទទួលបានគុណវុឌ្ឍិពីបរទេសផងដែរ ខណៈយុវជនជំនាន់ក្រោយរបស់គណបក្សកំពុងតែបំពេញតួនាទីយ៉ាងសំខាន់ដល់ប្រទេសជាតិ។
លោកបន្ថែមទៀតថា៖ «យុវជនទាំងអស់ គឺប្រៀបដូចទៅនឹងរាងកាយមនុស្សអ៊ីចឹង ដោយពួកគេនីមួយៗដើរតួជាបេះដូង សួត ថ្លើម ឬប្រមាត់ ឬក៏ដូចទៅនឹងឡានមួយគ្រឿងដែលត្រូវមានធាតុផ្សំ ដូចជា សំបកកង់ កង់ ឬផ្នែកផ្សេងទៀត។ ពួកគេម្នាក់ៗមានតួនាទីសំខាន់ៗរបស់ពួកគេរៀងៗខ្លួន»។
លោក សុខ ឥសាន បន្តថា សម្រាប់លោក គីម រិទ្ធី ដែលជាអភិបាលខេត្តព្រះវិហារថ្មីនេះ គឺរូបលោកបានរៀនសូត្រ និងមានបទពិសោធន៍ជាយូរណាស់មកហើយពីការចូលរួមក្នុងក្រុមការងារខេត្តរបស់គណបក្ស។
លោកថា៖ «ដូច្នេះហើយ ការតែងតាំងសម្រាប់តំណែងនេះដល់រូបលោក គឺគ្មានអ្វីខុសទេ។ វាពិតជាស័ក្តិសមសម្រាប់គាត់ ដោយគាត់នឹងអាចគ្រប់គ្រងដឹកនាំបានយ៉ាងរលូន»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ General’s Son Latest Ruling-Party Scion Made Provincial Governor
