អ្នកឃ្លាំមើលមួយចំនួនបង្ហាញការព្រួយបារម្ភថា របត់នយោបាយនឹងទាញទម្លាក់ការទទួលខុសត្រូវរបស់រដ្ឋាភិបាលចំពោះម្ចាស់ឆ្នោតបន្ថែមទៀត និងមានការកើនឡើងនូវអំពើពុករលួយ ក្រោយរដ្ឋសភាអនុម័តវិសោធនកម្មរដ្ឋធម្មនុញ្ញលើកទី១០ ទាំងទាត់ចោលការព្រួយបារម្ភរបស់គណបក្សនៅក្រៅរដ្ឋាភិបាលចំនួន៤ដែលមានសំឡេងឆ្នោតនៅឃុំសង្កាត់។
កាលពីថ្ងៃព្រហស្បតិ៍ម្សិលមិញ រដ្ឋសភាបានអនុម័តទាំងស្រុងលើសេចក្ដីព្រាងច្បាប់វិសោធនកម្មរដ្ឋធម្មនុញ្ញលើកទី១០ ដែលរដ្ឋាភិបាលបានស្នើឡើង ខណៈគណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ និងគណបក្សកែទម្រង់កម្ពុជា ព្រមទាំងក្រុមអង្គការសង្គមស៊ីវិលចំនួន១០៤ស្ថាប័ន បានស្នើរដ្ឋសភាកុំអនុម័ត ដោយបារម្ភថា ការស្នើកែនេះនឹងកាត់បន្ថយអំណាចសភា និងប៉ះពាល់ដល់ប្រព័ន្ធសភានិយមអាស្រ័យធម្មនុញ្ញក្ដី។
បញ្ហានេះ អនុប្រធានបណ្ដោះអាសន្នគណបក្សកែទម្រង់កម្ពុជា លោក អ៊ូ ច័ន្ទរ័ត្ន មានប្រសាសន៍នៅថ្ងៃសុក្រនេះថា ក្នុងរបបប្រជាធិបតេយ្យ រដ្ឋសភាដើរតួនាទីសំខាន់ក្នុងការជំរុញដំណើរការប្រជាធិបតេយ្យ។ ប៉ុន្តែលោកថា ការដែលរដ្ឋសភាអនុម័តវិសោធនកម្មរដ្ឋធម្មនុញ្ញ នាថ្ងៃម្សិលមិញ ឆ្លុះបញ្ចាំងថា រដ្ឋសភាមិនបានបំពេញតួនាទីនេះទេ ដែលថា របត់នេះនឹងជំរុញឱ្យមានការរំលោភបំពានសិទ្ធិពលរដ្ឋកាន់តែខ្លាំង។
លោកថា៖ «រដ្ឋាភិបាលអាចនឹងប្រព្រឹត្តកំហុស ព្រោះជាអ្នកកាន់អំណាច ជាអ្នកមានកាំភ្លើងមានអាវុធ ហើយជាអ្នកអនុវត្តផ្ទាល់ ដូច្នេះប្រសិនបើសភាមិនមានអំណាចគ្រប់គ្រាន់ទេ ខ្ញុំជឿថា ការរំលោភបំពានទៅលើប្រជាពលរដ្ឋក្ដី វាអាចនឹងកើតឡើងងាយស្រួលមែនទែន»។
អគ្គលេខាធិការគណបក្សប្រជាធិបតេយ្យមូលដ្ឋាន លោក សាម អ៊ីន បង្ហាញការព្រួយបារម្ភប្រហាក់ប្រហែលនេះដែរ បើទោះជាលោកអះអាងថា មិនមានការភ្ញាក់ផ្អើលពីរបៀបធ្វើការរបស់រដ្ឋាភិបាលឯកបក្សក្ដី។
លោកថា៖ «រឿងហ្នឹង វាអាចរុញឱ្យមានការរំលោភអំណាច ការប្រើប្រាស់អំណាចមិនត្រឹមត្រូវរបស់ស្ថាប័ននីតិប្រតិបត្តិហ្នឹង [រដ្ឋាភិបាល] កាន់តែកើនឡើងធំ វារុញឱ្យមានអំពើពុករលួយកាន់តែខ្លាំង ដោយសារកង្វះការតាមដាន ការត្រួតពិនិត្យរបស់រដ្ឋសភាទៅលើរាជរដ្ឋាភិបាល។ រឿងហ្នឹងវានឹងមានផលប៉ះពាល់ធ្ងន់ធ្ងរ»។
ប្រធានគ្រប់គ្រងទូទៅនៃអង្គការការពារសិទ្ធិមនុស្សលីកាដូ លោក អំ សំអាត កត់សម្គាល់ថា ការធ្វើវិសោធនកម្មរដ្ឋធម្មនុញ្ញលើកទី១០នេះ ក៏ដូចការធ្វើវិសោធនកម្ម៩លើកកន្លងទៅដែរ អាចជាការបម្រើឱ្យផលប្រយោជន៍នយោយបាយច្រើនជាងការតម្កល់ស្មារតីដើមនៃរដ្ឋធម្មនុញ្ញ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា លើកឡើងថា ការដែលរដ្ឋសភាអនុម័តលើការស្នើកែរដ្ឋធម្មនុញ្ញ ទាំងច្រានចោលការព្រួយបារម្ភរបស់តំណាងអង្គការសង្គមស៊ីវិលជាង១០០ស្ថាប័ននោះ ជាការព្រួយបារម្ភមួយទៀតដល់ការស្ដារស្ថានភាពសិទ្ធិមនុស្ស និងប្រជាធិបតេយ្យ។
លោកថា៖ «បើសិនជាការលើកឡើងទាំងអស់ហ្នឹងមិនត្រូវបានពិចារណា អ៊ីចឹងបញ្ហាទាំងឡាយហ្នឹងកាន់តែគរច្រើនឡើង ហើយវិបត្តិហ្នឹងនឹងមិនអាចដោះស្រាយបានទេ»។
អ្នកនាំពាក្យរដ្ឋសភា លោក ឡេង ប៉េងឡុង បានច្រានចោលការលើកឡើងនេះ ដោយថា ការអនុម័តច្បាប់ជាការសម្រេចចិត្តរបស់តំណាងរាស្ត្រនីមួយៗ ដែលតំណាងឱ្យពលរដ្ឋភាគច្រើន។
លោកថា៖ «សភាជាស្ថាប័នដែលបោះឆ្នោតដោយប្រជាពលរដ្ឋ ចំណែកគណបក្សនយោបាយ និងសង្គមស៊ីវិល មិនមែនតំណាងឱ្យអី[ពលរដ្ឋ]ណា ដូច្នេះហើយ […] ការដែលនិយាយថាការបោះឆ្នោត [អនុម័តច្បាប់] មិនត្រឹមត្រូវ ជាការខុសហើយ»។
បន្ថែមពីនេះ រដ្ឋមន្ត្រីក្រសួងយុត្តិធម៌ លោក កើត រិទ្ធ នៅពេលឡើងថ្លែងការពារសេចក្ដីស្នើកែរដ្ឋធម្មនុញ្ញលើកទី១០នៅរដ្ឋសភា កាលពីថ្ងៃម្សិលមិញ បានអះអាងថា ការរារាំងមិនឱ្យសភាអនុម័តរបស់គណបក្សទាំង៤ ជាចេតនាចង់ឱ្យមានការជាប់គាំងនយោបាយ ដើម្បីតថ្លៃនយោបាយសម្រាប់ជាប្រយោជន៍ក្រុមជំទាស់តែប៉ុណ្ណោះ។
លោកថា៖ «ការប្រកាសរបស់គណបក្សទាំង៤ ដែលថាមិនគាំទ្រការធ្វើវិសោធនកម្មលើកទី១០នៃរដ្ឋធម្មនុញ្ញ វាគឺជារឿងធម្មតា ប៉ុន្តែថាពុំមែនផ្អែកទៅហេតុផលដើម្បីការពាររបបសភានិយម ឬរបបប្រជាធិបតេយ្យសេរីពហុបក្សអ្វីនោះទេ ប៉ុន្តែគ្រាន់តែចង់ការពារនូវផលប្រយោជន៍ខាងនយោបាយរបស់ខ្លួនជាយថាហេតុនាពេលខាងមុខនេះតែប៉ុណ្ណោះ»។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា លើកឡើងថា សភាជាតិជាតំណាងប្រជាពលរដ្ឋ ដែលពាំនាំសេចក្ដីត្រូវការនិងកង្វល់របស់ពលរដ្ឋ ដើម្បីស្វែងរកដំណោះស្រាយ។ ប៉ុន្តែលោកថា នៅពេលមានការលើកឡើងពីក្រុមអង្គការសង្គមស៊ីវិល និងគណបក្សនយោបាយមួយចំនួន តែបែរជាមិនយកមកជជែកពិភាក្សាដេញដោលឱ្យសាធារណជនអស់ចិត្តទេ នោះបង្ហាញថា សភាស្ថិតក្រោមឥទ្ធិពលគណបក្សកាន់អំណាច ហើយរបត់នយោបាយបែបនេះមិនអាចឆ្លើយតបទៅនឹងតម្រូវការរបស់ពលរដ្ឋទេ។
លោកថា៖ «បញ្ហាប្រជាធិបតេយ្យ បញ្ហាយុត្តិធម៌សង្គម វាមិនអាចរកឱ្យបាន ហើយអ្វីដែលប្រជាពលរដ្ឋត្រូវការពិតប្រាកដហ្នឹង អ្នកនយោបាយមិនឆ្លើយតបតាមការលើកឡើងរបស់ប្រជាពលរដ្ឋទេ»។
គួរបញ្ជាក់ថា រដ្ឋសភា កាលពីថ្ងៃម្សិលមិញ បានអនុម័តទាំងស្រុងលើសេចក្តីព្រាងច្បាប់ធម្មនុញ្ញ ស្តីពីវិសោធនកម្មមាត្រា ១៩ថ្មី(មួយ) មាត្រា៨៩ មាត្រា៩៨ មាត្រា១០២ថ្មី មាត្រា១១៩ថ្មី(មួយ) និងមាត្រា១២៥ថ្មី នៃរដ្ឋធម្មនុញ្ញ និងមាត្រា៣ថ្មី និងមាត្រា៤ថ្មី នៃច្បាប់ធម្មនុញ្ញបន្ថែម ដោយសំឡេង១០៥លើ១០៦សំឡេង៕