ក្រុមភរិយារបស់សកម្មជនគណបក្សសង្គ្រោះជាតិដែលតុលាការបានរំលាយ ឬហៅថា «ក្រុមស្ត្រីថ្ងៃសុក្រ» ប្រមាណ១០នាក់ បាននាំគ្នាដាក់ញត្តិនៅស្ថានទូតអាមេរិកប្រចាំនៅកម្ពុជា ជួយជំរុញទៅរដ្ឋាភិបាលកម្ពុជា ឱ្យដោះលែងស្វាមីរបស់ពួកគាត់ ព្រមទាំងកញ្ញា សេង ធារី ដែលកំពុងជាប់ឃុំ ឱ្យមានសេរីភាពវិញ។
ភរិយាលោក កាក់ កុម្ភារ សកម្មជនគណបក្សសង្គ្រោះជាតិដែលត្រូវតុលាការរំលាយ គឺអ្នកស្រី ព្រំ ចាន់ថា មានប្រសាសន៍នៅថ្ងៃសុក្រនេះថា ស្វាមីរបស់អ្នកស្រីដែលជាអតីតប្រធានក្រុមប្រឹក្សារាជធានីភ្នំពេញ និងសកម្មជនបក្សប្រឆាំងមួយចំនួន រួមទាំងកញ្ញា សេង ធារី ត្រូវបានតុលាការកាត់ទោសឱ្យជាប់ពន្ធនាគាររយៈពេល៦ឆ្នាំយ៉ាងអយុត្តិធម៌។
អ្នកស្រីបន្តថា ការដែលពួកគាត់ទៅដាក់ញត្តិនៅស្ថានទូតអាមេរិកប្រចាំនៅកម្ពុជានេះ គឺស្នើសុំឱ្យប្រទេសកាន់លទ្ធិប្រជាធិបតេយ្យមួយនេះ ជួយអន្តរាគមន៍ជំរុញទៅអាជ្ញាធរកម្ពុជា ឱ្យមានការដោះលែងស្វាមីនិងសាច់ញាតិរបស់ពួកគាត់ ព្រមទាំងកញ្ញា សេង ធារី ដែលជាមេធាវីខ្មែរសញ្ជាតិអាមេរិក។
អ្នកស្រីនិយាយថា៖ «ប្រព័ន្ធតុលាការក៏ដោយ គឺអត់មានអ្វីដែលសុក្រឹតភាព ឯករាជ្យអ្វីទាំងអស់! ប្រសិនជាប្រព័ន្ធតុលាការគាត់រៀនច្បាប់ដែលការពារប្រជាពលរដ្ឋ អ៊ីចឹងគាត់[តុលាការ]ត្រូវមានឯករាជ្យ តែនេះអត់ទេ គាត់ធ្វើតាមខ្សែញាក់តាមរបបឯកបក្ស ឬក៏អ្នកនយោបាយតែប៉ុណ្ណោះ។ អ៊ីចឹងខ្ញុំអត់មានអ្វីត្រូវសង្ឃឹមលើតុលាការ អ៊ីចឹងបានខ្ញុំរកគ្រប់ស្ថានទូតដែលមានប្រជាធិបតេយ្យពិតប្រាកដទាំងអស់ អ៊ីចឹងខ្ញុំត្រូវរត់រកស្ថានទូតដើម្បីឱ្យមានដំណោះស្រាយ ដើម្បីជួយកញ្ញា សេង ធារី និងក្រុមគ្រួសាររបស់ពួកខ្ញុំផ្ទាល់»។
អ្នកនាំពាក្យស្ថានទូតអាមេរិកប្រចាំនៅកម្ពុជា លោក Chad Roedemeier ប្រាប់វីអូឌីតាមរយៈសារអ៊ីម៉ែល នៅថ្ងៃទី២៩ ខែកក្កដានេះ មន្ត្រីស្ថានទូតអាមេរិកបានទទួលយកលិខិតមួយពីតំណាងក្រុមស្ត្រីថ្ងៃសុក្រ ដែលសមាជិកគ្រួសាររបស់ពួកគេត្រូវបានគេឃុំខ្លួន ឬដាក់ពន្ធនាគារ ដោយសារតែការបង្ហាញពីទស្សនៈនយោបាយរបស់ខ្លួនដោយសន្តិវិធី។
លោកបន្តថា៖ «យើងបន្តជំរុញឱ្យអាជ្ញាធរកម្ពុជាទម្លាក់ចោលរាល់ការចោទប្រកាន់គ្រប់បែបយ៉ាងលើសកម្មជនទាំងនោះ គោរពសិទ្ធិមនុស្សជាមូលដ្ឋាន ដែលធានាដោយរដ្ឋធម្មនុញ្ញកម្ពុជា និងបើកទូលាយឡើងវិញនូវលំហនយោបាយ និងលំហពលរដ្ឋ»។
ទោះយ៉ាងណា អ្នកនាំពាក្យក្រសួងយុត្តិធម៌ លោក ជិន ម៉ាលីន ធ្លាប់បានបញ្ជាក់កាលពីថ្ងៃទី២១ ខែកក្កដា ថាការអំពាវនាវរបស់អង្គការសង្គមស៊ីវិល បុគ្គលណាមួយ ឬស្ថានទូតអាមេរិកប្រចាំនៅកម្ពុជា គឺជារឿងមិនអាចទៅរួចនោះទេ ប៉ុន្តែលោកជំរុញឱ្យមានការចូលរួមសហការជាមួយតុលាការកម្ពុជា ក្នុងការបង្ហាញភស្តុតាងបញ្ជាក់ថាគ្មានកំហុស។ លោកថ្លែងការពារថា តុលាការកម្ពុជាមិនដែលប្រើប្រាស់ប្រព័ន្ធតុលាការ ដើម្បីផ្តន្ទាទោសលើពលរដ្ឋកម្ពុជា ដោយគ្រាន់តែប្រើប្រាស់សិទ្ធិសេរីភាពជាមូលដ្ឋាននោះទេ។
លោកថា៖ «ចង់ទាមទារដោះលែង ទាល់តែចូលរួមជាមួយតុលាការ ហើយការពារតាមនីតិវិធីច្បាប់ ព្រោះគាត់រងបទចោទពីតុលាការ។ អ៊ីចឹងមានតែតុលាការអាចដោះលែង គ្មាននរណាអាចបញ្ជាតុលាការដោះលែងបានទេ ទាល់តែយើងចូលរួមការពារក្ដីដើម្បីឱ្យរួចពីបទចោទ នេះគឺច្បាប់កម្ពុជា គឺអ៊ីចឹង»។
គួរបញ្ជាក់ថា កញ្ញា សេង ធារី ជាមេធាវីអាមេរិក ត្រូវបានសមត្ថកិច្ចចាប់បញ្ជូនខ្លួនទៅឃុំនៅពន្ធនាគារព្រៃស (ម២) ភ្លាមៗ កាលពីថ្ងៃទី១៤ ខែមិថុនា ឆ្នាំ២០២២ ក្រោយពីសាលាដំបូងរាជធានីភ្នំពេញ ចេញសាលក្រមផ្តន្ទាទោសគាត់ដាក់ពន្ធនាគាររយៈពេល៦ឆ្នាំ ក្រោមបទចោទ «រួមគំនិតក្បត់ និងញុះញង់»។
សកម្មជនគណបក្សសង្គ្រោះជាតិដែលត្រូវតុលាការរំលាយកាលពីឆ្នាំ២០១៧ ត្រូវបានចៅក្រមសាលាដំបូងរាជធានីភ្នំពេញចោទប្រកាន់ពីបទ «ញុះញង់ និងរួមគំនិតក្បត់» ពាក់ព័ន្ធនឹងការគាំទ្រដំណើរវិលត្រលប់របស់លោក សម រង្ស៊ី និងមន្ត្រីបក្សប្រឆាំងផ្សេងទៀត។
ក្រោយពីមានការកាត់ទោសក្រុមសកម្មជនបក្សប្រឆាំងក្នុងទ្រង់ទ្រាយធំចំនួន៤៣នាក់រួចមក អ្នកជំនាញសិទ្ធិមនុស្សនៅអង្គការសហប្រជាជាតិ កាលពីថ្ងៃទី២៩ ខែមិថុនា ឆ្នាំ២០២២ បានស្នើទៅរដ្ឋាភិបាលកម្ពុជាឱ្យពិនិត្យឡើងវិញលើករណីនេះ ដោយសម្អាងថា វិធាននោះមិនបានភ្ជាប់កាតព្វកិច្ចនៃការគោរពសិទ្ធិមនុស្សអន្តរជាតិ និងលំហនយោបាយពហុបក្សឡើយ៕