អង្គការអភិរក្សសត្វព្រៃ និងប្រជាពលរដ្ឋមួយចំនួន បង្ហាញការព្រួយបារម្ភចំពោះការបាត់បង់ព្រៃឈើនៅក្នុងតំបន់ភ្នំតាម៉ៅ ខេត្តតាកែវ ថានឹងនាំឱ្យប៉ះពាល់ដល់ជម្រកសត្វ និងបរិស្ថានធ្ងន់ធ្ងរ ខណៈ ពួកគេសង្កេតឃើញកម្មករជាច្រើននាក់ បានចាប់ផ្តើមសម្រុកចូលកាប់ឈើធំៗ នៅតំបន់នេះ។
នាយកកម្មវិធីនៃអង្គការសម្ព័ន្ធមិត្តសត្វព្រៃ លោក នីច ម៉ាក (Nick Marx) មានប្រសាសន៍នៅថ្ងៃអាទិត្យនេះថា ប្រហែលជា៣ថ្ងៃកន្លងទៅនេះ លោកសង្កេតឃើញកម្មករមួយចំនួនបានចាប់ផ្តើមចូលទៅកាប់ដើមឈើធំៗ នៅលើផ្ទៃដីប្រហែលជា៥០០ហិកតា ដែលជាកន្លែងជម្រកសម្រាប់សត្វព្រៃច្រើនប្រភេទរស់នៅក្នុងតំបន់ភ្នំតាម៉ៅនោះ។
លោកអះអាងថា ដើមចមដែលនាំឱ្យមានការកាប់ព្រៃឈើនៅក្នុងតំបន់ភ្នំតាម៉ៅ ដោយសារតែកន្លងមក រដ្ឋាភិបាលបានផ្តល់ដីឱ្យក្រុមហ៊ុន ឡេង ណាវ៉ាត់ត្រា ដើម្បីអភិវឌ្ឍន៍នៅក្នុងតំបន់នោះ។ លោកបង្ហាញការសោកស្តាយ នៅពេលដែលមានការកាប់ព្រៃឈើដែលជាជម្រកសត្វ និងធ្វើឱ្យប៉ះពាល់ដល់ធនធានធម្មជាតិ និងបរិស្ថាន។
លោកអះអាងថា៖ «សំខាន់យើងការពារព្រៃឈើ នៅស្រុកខ្មែរមានព្រៃតែមួយនៅជិតភ្នំពេញ សម្រាប់ប្រជាជន សម្រាប់សត្វព្រៃ ការបំផ្លាញព្រៃឈើអត់ល្អសម្រាប់បរិស្ថាន»។
ពលរដ្ឋដែលរស់នៅក្បែរភ្នំតាម៉ៅ ស្ថិតនៅស្រុកបាទី ខេត្តតាកែវ សុំមិនបញ្ចេញឈ្មោះបានរៀបរាប់ថា ចាប់ពីថ្ងៃ២៨ ខែកក្កដា រហូតដល់ថ្ងៃ៣១ខែដដែលនេះ មានកម្មករជាច្រើននាក់បានយកម៉ាស៊ីនអាឈើ ចូលទៅកាប់ឈើក្នុងតំបន់ភ្នំតាម៉ៅ ដើម្បីទុកដីឱ្យក្រុមហ៊ុន ឡេង ណាវ៉ាត់ត្រា ត្រៀមឈូសឆាយបន្តទៅលើទំហំដីប្រហែល ៥០០ហិកតា។
ពលរដ្ឋរូបនោះ សោកស្តាយនៅពេលដែលរដ្ឋាភិបាលផ្តល់ដីព្រៃឱ្យក្រុមហ៊ុន ឡេង ណាវ៉ាត់ត្រា ក្រោមគម្រោងអភិវឌ្ឍន៍ ដែលជាមូលហេតុឈានដល់ការកាប់ព្រៃឈើល្អៗជាច្រើនប្រភេទ ដូចជា ឈើក្រញូង ត្បែង កកោះ ធ្នង់ និងឈើសុក្រំជាដើម។ លោកបន្តថា ការបាត់បង់ព្រៃឈើនៅតំបន់ភ្នំតាម៉ៅនោះ នឹងធ្វើឱ្យប៉ះពាល់ដល់ជម្រកសត្វ បរិស្ថាន និងធ្វើឱ្យប៉ះពាល់ដល់វិស័យទេសចរណ៍ជាមិនខាន។
លោកមានប្រសាសន៍ថា៖ «យើងបារម្ភថា វាបាត់បង់ជម្រករបស់សត្វ។ ទី២យើងបាត់ធនធានធម្មជាតិ ដែលយើងនៅថែទាំតាំងពីយូរលង់មកហើយ និងមានសត្វព្រៃជាច្រើនរស់នៅក្នុងហ្នឹង ហើយក៏ជាតំបន់ធម្មជាតិមួយនៅក្បែរក្រុង សម្រាប់ឱ្យភ្ញៀវទេសចរមកកម្សាន្តនៅទីកន្លែងហ្នឹងដែរ។ យើងស្តាយ ហើយថ្ងៃក្រោយយើងអត់មានព្រៃនៅទីនេះបន្តទៀតទេ»។
វីអូឌីមិនអាចស្វែងរកការឆ្លើយតបពីតំណាងក្រុមហ៊ុន ឡេង ណាវ៉ាត់ត្រា ដែលទទួលបានគម្រោងអភិវឌ្ឍន៍តំបន់ភ្នំតាម៉ៅបានទេនៅថ្ងៃអាទិត្យនេះ។
យ៉ាងណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ថា អាជ្ញាធរថ្នាក់ក្រោមបានកាប់ព្រៃឈើនៅក្នុងតំបន់ភ្នំតាម៉ៅ ដើម្បីយកឈើលក់ ហើយយកថវិកាចូលរដ្ឋ និងទុកដីឱ្យក្រុមហ៊ុន ឡេង ណាវ៉ាត់ត្រា ធ្វើការអភិវឌ្ឍន៍។ លោកអះអាងថា ការកាប់ឈើនោះ មិនធ្វើឱ្យប៉ះពាល់ដល់ជម្រកសត្វព្រៃ និងប៉ះពាល់ដល់បរិស្ថានដូចការលើកឡើងរបស់អង្គការ និងប្រជាពលរដ្ឋនោះទេ។
លោកមានប្រសាសន៍ថា៖ «ខ្ញុំបានជម្រាបជូនហើយថា អត់មានប៉ះពាល់អ្វីទេ។ កន្លែងសួនសត្វនៅតែសួនសត្វដដែល ដែលយើងធ្វើរបងព័ទ្ធជុំវិញជាង ៤០០ហិកតា អត់មានប៉ះពាល់អ្វីទេ។ អ្នកនិយាយបំភ្លើសចេះតែនិយាយទៅ ព្រោះនៅកន្លែងសួនសត្វមានដើមឈើ មានរបងការពារទាំងអស់ គ្រាន់តែយើងធ្វើការកសាងហេដ្ឋារចនាសម្ព័ន្ធក្នុងហ្នឹងបន្ថែមទៀត»។
លោកបន្ថែមថា តាមគម្រោងរដ្ឋាភិបាលផ្តល់ដីសម្បទានប្រមាណ ១ ៥០០ហិកតា ដល់ក្រុមហ៊ុនសម្រាប់អភិវឌ្ឍន៍នៅតំបន់ភ្នំតាម៉ៅ ដូចជា សង់ផ្ទះ ដាំស្មៅ និងចិញ្ចឹមសត្វគោយកទឹកដោះជាដើម។
យ៉ាងនេះក្តី ព្រះសង្ឃគង់នៅវត្តថ្មអន្ទង នៅលើភ្នំតាម៉ៅ ស្រុកបាទី ខេត្តតាកែវ ព្រះតេជព្រះគុណ សុត ផល្លី មានថេរដីកាថា ដីដែលត្រូវបានកម្មករកាប់ឈើធំៗ ក្នុងតំបន់ភ្នំតាម៉ៅ គឺស្ថិតនៅក្នុងឃុំចំនួន២ រួមមាន ឃុំត្រពាំងសាប និងឃុំកណ្តឹង ស្រុកបាទី។ ព្រះតេជព្រះគុណបន្តថា ព្រះអង្គមិនចង់ឱ្យមានការកាប់ព្រៃឈើដែលជាជម្រកសត្វនៅតំបន់ភ្នំតាម៉ៅ ក្រោមការអភិវឌ្ឍនោះទេ ព្រោះធ្វើឱ្យប៉ះពាល់ដល់ជម្រកសត្វ និងបរិស្ថានធ្ងន់ធ្ងរ ។
ព្រះតេជព្រះគុណមានថេរដីកាថា៖ «អាត្មាចង់ឱ្យទុកព្រៃនៅដដែល ព្រោះនៅក្នុងខេត្តតាកែវ មានតែនៅក្នុងស្រុកបាទី ហ្នឹងហើយមានព្រៃឈើធំជាងគេ។ បើអស់កន្លែងហ្នឹងទៀត វាប៉ះពាល់ដល់បរិស្ថានធ្ងន់ធ្ងរ»។
ក្នុងលិខិតចុះថ្ងៃទី២៨ ខែមេសា ឆ្នាំ២០២២ របស់រដ្ឋមន្ត្រីក្រសួងកសិកម្ម លោក វេង សាខុន ដាក់ទៅទីស្ដីការគណៈរដ្ឋមន្ត្រីបានលើកឡើងថា ករណីទីស្តីការគណៈរដ្ឋមន្ត្រីសុំការអនុញ្ញាតជាគោលការណ៍ដោះដូរទីតាំងដីស្ថិតក្រោមការគ្រប់គ្រងរបស់ក្រសួងកសិកម្ម គឺមិនប៉ះជាន់លើផ្ទៃដីឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ ដែលមានទំហំជាង ៤០០ហិកតា មានរបងព័ទ្ធជុំវិញ និងហេដ្ឋារចនាសម្ព័ន្ធនានាដែលបានអភិវឌ្ឍកន្លងមកនោះឡើយ។
លោក វេង សាខុន បញ្ជាក់ទៀតថា ការអភិវឌ្ឍតំបន់នោះក៏មិនប៉ះពាល់ទៅដល់ការសហការជួយរបស់អង្គការសម្ព័ន្ធមិត្តសត្វព្រៃ ឬការអនុវត្តអនុស្សរណៈយោគយល់គ្នា រវាងក្រសួងកសិកម្ម រុក្ខាប្រមាញ់ និងនេសាទ និងអង្គការនេះដែរ។
រដ្ឋមន្ត្រីរូបនេះបន្តថា ការដោះដូរដីនៅតំបន់ភ្នំតាម៉ៅជាការចាំបាច់របស់រដ្ឋាភិបាលសម្រាប់ការអភិវឌ្ឍ ដើម្បីជំរុញកំណើនសេដ្ឋកិច្ច និងប្រាក់ចំណូលរបស់ប្រជាពលរដ្ឋនៅមូលដ្ឋាន ព្រមទាំងផ្តល់បន្ថែមទៀតនូវទុនសម្រាប់ការអភិវឌ្ឍគម្រោងយុទ្ធសាស្ត្រនានា ជំរុញនិងកែលម្អឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ អាចប្រកួតប្រជែងក្នុងបរិបទសេដ្ឋកិច្ចបច្ចុប្បន្ន ព្រមទាំងជំរុញកំណើនចំណូលធានានិរន្តរភាពផងដែរ។
លោក វេង សាខុន ឱ្យដឹងទៀតថា តំបន់ភ្នំតាម៉ៅមានផ្ទៃដីទំហំ ២ ៥០០ហិកតា ស្ថិតក្រោមការគ្រប់គ្រងរបស់ក្រសួងកសិកម្ម រុក្ខាប្រមាញ់ និងនេសាទ។ លោកថា កន្លងមក ក្រសួងបានយកដីមួយផ្នែកនៃតំបន់ភ្នំតាម៉ៅដែលមានទំហំជាង៤០០ហិកតា បង្កើតជាឧទ្យានសួនសត្វ និងមជ្ឈមណ្ឌលសង្គ្រោះសត្វព្រៃភ្នំតាម៉ៅ និងបានសម្ពោធដាក់ឱ្យប្រើប្រាស់ជាផ្លូវការកាលពីឆ្នាំ២០០០។
កាលពីថ្ងៃទី១៤ ខែមករា ឆ្នាំ២០២២ ទីស្ដីការគណៈរដ្ឋមន្ត្រីបានស្នើសុំដោះដូរដីចំនួន ២កន្លែងនៅតំបន់ភ្នំតាម៉ៅ ទៅឱ្យក្រុមហ៊ុន «ខ្មែរ ហ្វ្រេស មីល ឯ.ក» ធ្វើការអភិវឌ្ឍ ដោយមួយកន្លែងមានដី៣០០ហិកតា កាត់ចេញពីស្ថានីយចិញ្ចឹមគោពូជភ្នំតាម៉ៅ និងមួយកន្លែងទៀត មានផ្ទៃដីទំហំ ៥០០ហិកតា កាត់ចេញពីរដ្ឋបាលព្រៃឈើភ្នំតាម៉ៅ៕
