ទស្សនាវដ្ដី ឥណ្ឌូនេស៊ី Tempo បានរាយការណ៍ថា ស្ថានទូតឥណ្ឌូនេស៊ីបានអំពាវនាវឱ្យនគរបាលកម្ពុជាជួយសង្គ្រោះជនជាតិរបស់ខ្លួនចំនួន៥៣នាក់ ដែលស្ថានទូតមួយនេះជឿថា កំពុងជាប់ឃុំនៅទីកន្លែងឧស្សាហកម្មឆបោកក្នុងប្រទេសកម្ពុជា ដែលជាផ្នែកមួយនៃការកើនឡើងយ៉ាងខ្លាំងនៃជនរងគ្រោះនៅឆ្នាំនេះ។
យោងតាមទស្សនាវដ្ដី Tempo ដដែលនេះបានឱ្យដឹងថា អគ្គនាយកដ្ឋានការពារពលរដ្ឋ នៃក្រសួងការបរទេសឥណ្ឌូនេស៊ី បាននិយាយកាលពីថ្ងៃព្រហស្បតិ៍ថា ពលរដ្ឋឥណ្ឌូនេស៊ីទាំង៥៣នាក់ត្រូវបានឃុំខ្លួននៅ «ក្រុមហ៊ុនឧស្សាហកម្មឆបោក» ក្នុងខេត្តព្រះសីហនុ។ អគ្គនាយកដ្ឋានបាននិយាយថា របាយការណ៍នេះកំពុងត្រូវបានស៊ើបអង្កេតដោយនគរបាលកម្ពុជា។
ទស្សនាវដ្តីដដែលនេះបានរាយការណ៍ថា៖ «ស្ថានទូតបានទាក់ទងនគរបាលកម្ពុជា ហើយបានស្នើសុំជំនួយសម្រាប់ការដោះលែងពលរដ្ឋឥណ្ឌូនេស៊ីទាំងនោះ»។
ទស្សនាវដ្តីនេះបានបន្តទៀតថា មិនទាន់មានព័ត៌មានលម្អិតអំពីការជួញដូរមនុស្សជាក់ស្ដែងនៅឡើយទេ ប៉ុន្តែគេឃើញមានការបញ្ចេញមតិអំពីករណីនេះតាមប្រព័ន្ធផ្សព្វផ្សាយសង្គមនៅលើទំព័រហ្វេសប៊ុករបស់អភិបាលខេត្ត សិនត្រល ចាវ៉ា (Central Java)។
ទស្សនាវដ្តីនេះក៏បានបន្ថែមទៀតថា៖ «ករណីបែបនេះកើតមានជាបន្តបន្ទាប់ ស្របពេលមានការផ្សព្វផ្សាយពាណិជ្ជកម្មជាច្រើនអំពីដំណឹងជ្រើសរើសបុគ្គលិកនៅក្នុងប្រទេសកម្ពុជា ដែលបានផ្សព្វផ្សាយនៅលើប្រព័ន្ធផ្សព្វផ្សាយសង្គម»។
ទស្សនាវដ្ដីដដែលបន្តទៀតថា ជនជាតិឥណ្ឌូនេស៊ីចំនួន១១៩នាក់ត្រូវបានបញ្ជូនចេញពីប្រទេសកម្ពុជានៅឆ្នាំ២០២១ ខណៈគិតត្រឹមខែកក្កដា ឆ្នាំ២០២២នេះ ជនជាតិឥណ្ឌូនេស៊ីចំនួន១៣៣នាក់ត្រូវបានបញ្ជូនចេញពីកម្ពុជា ជាមួយជនរងគ្រោះចំនួន១៥៨នាក់ទៀត ដែលអាជ្ញាធរបានកត់ត្រា។ ឥណ្ឌូនេស៊ីបានប្រមូលទិន្នន័យអំពីក្រុមហ៊ុនជ្រើសរើសបុគ្គលិក និងសម្របសម្រួលឱ្យមានការស៊ើបអង្កេតនៅក្នុងប្រទេសកម្ពុជា។
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ Briefs: 53 Indonesians Allegedly Confined, Girl Dies Sleeping on Power Strip